ശ്രീലങ്കയിൽ മരണ സംഖ്യ 100 കടന്നു, ഡിറ്റ് വാ ചുഴലികാറ്റ് വിഴുങ്ങിയത് ഒരു രാജ്യത്തെ മുഴുവൻ

പ്രളയം ദുരിതം വിതച്ച ശ്രീലങ്കയിൽ മരണസംഖ്യ ഉയരുകയാണ്. ശക്തമായ കാറ്റിനൊപ്പം തുടർച്ചയായ മഴയും രൂക്ഷമായതോടെ ശ്രീലങ്കയിൽ ഏകദേശം 100 പേർക്ക് ജീവൻ നഷ്ടമാകുകയും നിരവധിയാളുകളെ
കാണാതാവുകയും ചെയ്തിട്ടുണ്ട്.

അതേസമയം ശ്രീലങ്കയുടെ കിഴക്കൻ തീരത്താണ് ഡിറ്റ് വാ വെള്ളിയാഴ്ച രാവിലെ കരതൊട്ടത്. ചുഴലിക്കാറ്റ് ശ്രീലങ്കയെ ഗുരുതരമായി തന്നെ ബാധിച്ചു. ജനങ്ങൾ എന്തു ചെയ്യണമെന്നറിയാതെ ചിതറി ഓടുകയാണ്. കനത്ത മഴയെത്തുടർന്നുണ്ടായ മണ്ണിടിച്ചിലുകളാണ് കൂടുതൽ മരണങ്ങൾക്ക് ഇടയാക്കിയത്.

44000 പേരെ വെള്ളപ്പൊക്കം ബാധിച്ചു

ഡിറ്റ് വാ ചുഴലിക്കാറ്റ് വടക്കും വടക്കുപടിഞ്ഞാറുമായി തമിഴ്‌നാട് തീരത്തേക്ക് നീങ്ങുകയാണ്. ചില വിമാന ഷെഡ്യൂളുകൾ തടസ്സപ്പെട്ടതായി വ്യോമയാന അധികൃതർ അറിയിച്ചു. കൊളംബോ വിമാനത്താവളത്തിൻ്റെ പ്രവർത്തനം താറുമാറായ അവസ്ഥയിലാണിപ്പോൾ. കിഴക്കൻ, മധ്യ മേഖലകളിൽ 12 ഇഞ്ചിലധികം അതായത് 30 സെന്റീമീറ്റർ മഴ പെയ്തു. രാജ്യത്തൊട്ടാകെ 44,000 പേരെ വെള്ളപ്പൊക്കം ബാധിച്ചു. ആയിരക്കണക്കിന് ആളുകൾ സ്കൂളുകളിലും പൊതു അഭയകേന്ദ്രങ്ങളിലും അഭയം തേടി. മണ്ണിടിച്ചിലിലും വെള്ളപ്പൊക്കത്തിലും കുറഞ്ഞത് 3,000 വീടുകൾക്ക് കേടുപാടുകൾ സംഭവിച്ചു.

നദികൾ കരകവിഞ്ഞൊഴുകി

പതിനായിരക്കണക്കിനാളുകളെ വിവിധയിടങ്ങളിൽ നിന്ന് മാറ്റിപാർപ്പിച്ചു. റെഡ് അലേർട്ട് മുന്നറിയിപ്പ് 60,000ത്തിലധികം കുടുംബങ്ങളെയും 2,00,000 ആളുകളെയും നേരിട്ട് ബാധിച്ചു. പല നദികളും ജലസംഭരണികളും കരകവിഞ്ഞൊഴുകി.

2016 നു ശേഷം നടന്ന ഏറ്റവും വലിയ ദുരന്തം

അയൽരാജ്യമായ ശ്രീലങ്കയ്ക്ക് സഹായവുമായി ഇന്ത്യ സജീവമായി രംഗത്തു തന്നെയുണ്ട്. 6.5 മെട്രിക് ടൺ ഭക്ഷ്യവസ്തുക്കൾ ആണ് ഇന്ത്യ കൈമാറിയത്. നിലവിലെ വെള്ളപ്പൊക്കം 2016ന് ശേഷമുള്ള ഏറ്റവും മോശമായ അവസ്ഥയാണെന്ന് ശ്രീലങ്കൻ ഉദ്യോഗസ്ഥർ പറഞ്ഞു. 2016ൽ കനത്ത മഴയെത്തുടർന്നുണ്ടായ ദുരന്തത്തിൽ 100ൽ അധികം ആളുകൾ മരിക്കുകയും ലക്ഷക്കണക്കിന് ആളുകൾക്ക് വീടുകൾ നഷ്ടപ്പെടുകയും ചെയ്തിരുന്നു.

English Summary: A severe cyclone is moving towards Tamil Nadu's coast, disrupting flights and causing heavy rainfall. Thousands seek refuge as floods affect 44,000 people.