ഒക്ടോബറിലെ മഴയും മഞ്ഞും കുളിർക്കാറ്റും ആസ്വദിക്കാൻ യാത്രയ്ക്ക് ഒരുങ്ങാം, പക്ഷേ ജാഗ്രത വേണം

ഒക്ടോബറിലെ കാലാവസ്ഥ കേരളത്തിലെ ഹിൽ സ്റ്റേഷനുകൾ സന്ദർശിക്കാൻ അനുയോജ്യമായ കാലാവസ്ഥയാണ്. ചെറിയ മഴയ്ക്കൊപ്പമുള്ള കോടമഞ്ഞും തണുത്ത കാറ്റും പച്ചപ്പും സഞ്ചാരികൾക്ക് സുഖമുള്ള അനുഭവമാണ് സമ്മാനിക്കുന്നത്. തേയിലത്തോട്ടങ്ങളും പൈൻ കാടുകളും നിബിഡ വനങ്ങളും നിറഞ്ഞ മലമ്പ്രദേശങ്ങളിൽ പലയിടത്തും സുഖകരമായ കാലാവസ്ഥയാണ് നിലവിലുള്ളത്. അതുകൊണ്ട് തന്നെ ഒക്ടോബറിൽ ഈ സ്ഥലങ്ങൾ യാത്രയ്ക്കായി തിരഞ്ഞെടുക്കാം.

1. മൂന്നാർ

കോടമഞ്ഞും തേയിലത്തോട്ടങ്ങളും കൊണ്ട് സഞ്ചാരികളുടെ പ്രിയപ്പെട്ട ഇടമായി മാറുകയാണ് മൂന്നാർ. ഇവിടെ ഇപ്പോൾ തണുത്ത കാലാവസ്ഥയാണ്. പകൽ താപനില 22 മുതൽ 23 ഡിഗ്രി സെൽഷ്യസ് വരെയും രാത്രിയിൽ 17 ഡിഗ്രി വരെയും താഴാം. ഉച്ചയ്ക്ക് ശേഷവും വൈകുന്നേരങ്ങളിലും ഇടിയോടുകൂടിയ നേരിയ മഴയ്ക്കും സാധ്യതയുണ്ട്. ടോപ് സ്റ്റേഷൻ, മാട്ടുപ്പെട്ടി തുടങ്ങിയ സ്ഥലങ്ങളിലേക്കുള്ള യാത്രകൾക്ക് അനുയോജ്യമായ സമയമാണിത്. കുടയും ലൈറ്റ് ജാക്കറ്റും കരുതുന്നത് നല്ലതാണ്.

The Science Behind Storm Clouds: എന്തുകൊണ്ട് മഴയ്ക്ക് മുമ്പ് മേഘങ്ങൾ കറുക്കുന്നു? കാരണം ഇതാണ്
തെളിഞ്ഞ ആകാശത്തേക്ക് നോക്കുമ്പോൾ വെളുത്ത പഞ്ഞി പോലെ കാണുന്ന മേഘങ്ങൾ പക്ഷേ മഴയ്ക്ക് തൊട്ടുമുമ്പ് നിറം മാറുന്നു.
https://metbeatnews.com/why-do-clouds-look-black-before-rain

2. വയനാട്

വയനാടും സുഖകരമായ കാലാവസ്ഥയാണ് സമ്മാനിക്കുന്നത്. ചെമ്പ്ര മല, ലക്കിടി, എടയ്ക്കൽ ഗുഹകൾ തുടങ്ങിയ വിനോദസഞ്ചാര കേന്ദ്രങ്ങളുള്ള വയനാട്ടിലേക്കുള്ള യാത്ര വെറുതെയാകില്ല. പകൽ താപനില 29 മുതൽ 30 ഡിഗ്രി വരെയും രാത്രിയിൽ 20 മുതൽ 21 ഡിഗ്രി വരെയും ആയിരിക്കും. ഉച്ചതിരിഞ്ഞ് ഇടിമിന്നലോടുകൂടിയ ഇടവിട്ടുള്ള മഴയ്ക്കും സാധ്യതയുണ്ട്. മഴ നനഞ്ഞ കാട്ടുപാതകളും വെള്ളച്ചാട്ടങ്ങളും ആസ്വദിക്കാൻ അനുയോജ്യമായ സമയമാണിത്. ട്രെക്കിംഗിന് പോകുന്നവർ ആവശ്യമായ അനുമതിയും സുരക്ഷാ നിർദേശങ്ങളും ഉറപ്പാക്കണം.

3. പൊന്മുടി

തിരുവനന്തപുരത്തിന്റെ സ്വന്തം ഹിൽ സ്റ്റേഷനായ പൊന്മുടിയിൽ കോടമഞ്ഞ് നിറഞ്ഞ അന്തരീക്ഷമാണ്. പകൽ താപനില 28 മുതൽ 29 ഡിഗ്രി വരെയും രാത്രിയിൽ 22 ഡിഗ്രിയോളവും ആയിരിക്കും. ഉച്ചയ്ക്ക് ശേഷം മലമുകളിൽ പെട്ടെന്ന് മഴമേഘങ്ങൾ രൂപപ്പെടാനും ഇടിമിന്നലോടുകൂടിയ മഴയ്ക്കും സാധ്യതയുണ്ട്. അതിരാവിലെ പൊന്മുടിയിലേക്കുള്ള യാത്രയാണ് കൂടുതൽ മനോഹരം. മഴയ്ക്കിടെ മൊട്ടക്കുന്നുകളിൽ വഴുക്കൽ ഉണ്ടാകാൻ സാധ്യതയുള്ളതിനാൽ സഞ്ചാരികൾ ജാഗ്രത പാലിക്കണം.

4. വാഗമൺ

മഴ മാറിയതോടെ പച്ചപ്പിൽ മുങ്ങിനിൽക്കുകയാണ് വാഗമൺ. പകൽ താപനില 30 മുതൽ 31 ഡിഗ്രി വരെയായിരിക്കും. വൈകുന്നേരത്തോടെ താപനില 22 മുതൽ 23 ഡിഗ്രിയിലേക്ക് താഴാം. ഉച്ചയ്ക്ക് ശേഷവും രാത്രിയിലും ഇടിമിന്നലോടുകൂടിയ മഴയ്ക്ക് സാധ്യതയുണ്ട്. മൊട്ടക്കുന്നുകളിലെ സൂര്യാസ്തമയവും പൈൻ ഫോറസ്റ്റിലൂടെയുള്ള നടത്തവും ആസ്വദിക്കാൻ അനുയോജ്യമായ സമയമാണിത്. ലൈറ്റ് ജാക്കറ്റും കുടയും കരുതണം.

5. ഗവി

പത്തനംതിട്ടയിലെ ഗവിയിലെ കോടമഞ്ഞ് സിനിമകളിൽ മാത്രം കണ്ട് ആസ്വദിച്ചാൽ മതിയാവില്ല. ദാ ഒക്ടോബർ ഇവിടേക്കുള്ള യാത്രക്ക് അനുയോജ്യമായ സമയമാണ്. പകൽ താപനില 25 മുതൽ 26 ഡിഗ്രി വരെയും രാത്രിയിൽ 18 ഡിഗ്രിയോളവും ആയിരിക്കും. അതിരാവിലെ കനത്ത കോടമഞ്ഞിനും ഉച്ചതിരിഞ്ഞ് കാറ്റിനും ഇടിയോടുകൂടിയ മഴയ്ക്കും സാധ്യതയുണ്ട്. മുൻകൂട്ടി ബുക്ക് ചെയ്ത പാസുകളിലൂടെയോ കെഎസ്ആർടിസി ബജറ്റ് ടൂറിസം സംവിധാനത്തിലൂടെയോ ആണ് ഗവി സന്ദർശനം സാധ്യമാകുക. മഴയുള്ള സമയത്ത് കാട്ടുപാതകളിലൂടെ യാത്ര ചെയ്യുമ്പോൾ പ്രത്യേക ജാഗ്രത വേണം.

6. ഇലവീഴാപൂഞ്ചിറ

കോട്ടയം ജില്ലയിലെ ഇലവീഴാപൂഞ്ചിറയിൽ പകൽ താപനില 32 മുതൽ 33 ഡിഗ്രി വരെയാകാം. ഉയർന്ന പ്രദേശമായതിനാൽ ശക്തമായ കാറ്റും കനത്ത തണുപ്പും അനുഭവപ്പെടും. രാത്രിയിൽ താപനില 24 ഡിഗ്രിയോളമായി കുറയും. പൊതുവെ മേഘാവൃതമായ അന്തരീക്ഷമായിരിക്കും. ഉച്ചയ്ക്ക് ശേഷം ഇടിമിന്നലോടുകൂടിയ ശക്തമായ മഴയ്ക്കും സാധ്യതയുണ്ട്. മലമുകളിൽ പെട്ടെന്ന് ഇടിമിന്നലുണ്ടാകാൻ സാധ്യതയുള്ളതിനാൽ കനത്ത മേഘങ്ങൾ കണ്ടാൽ സുരക്ഷിതമായ ഇടങ്ങളിലേക്ക് മാറുന്നതാണ് നല്ലത്.

7. റാണിപുരം

വടക്കൻ മലബാറിന്റെ ഊട്ടി എന്നറിയപ്പെടുന്ന കാസർകോട് റാണിപുരത്തും സുഖകരമായ കാലാവസ്ഥയാണ്. പകൽ താപനില 29 മുതൽ 30 ഡിഗ്രി വരെയും രാത്രിയിൽ 22 ഡിഗ്രിയോളവും ആയിരിക്കും. ചാറ്റൽമഴയ്ക്കും ഉച്ചതിരിഞ്ഞ് ഇടിമിന്നലോടുകൂടിയ മഴയ്ക്കും സാധ്യതയുണ്ട്. ഒക്ടോബറിൽ പുൽമേടുകൾ കടുംപച്ച നിറത്തിലാകുന്നതിനാൽ ട്രെക്കിംഗിനും പ്രകൃതിഭംഗി ആസ്വദിക്കാനും അനുയോജ്യമായ സമയമാണിത്. മഴയ്ക്കുശേഷം വഴികൾ വഴുക്കലുള്ളതാകാൻ സാധ്യതയുള്ളതിനാൽ നല്ല ഗ്രിപ്പുള്ള ചെരിപ്പുകൾ ഉപയോഗിക്കണം.

8. കൊടൈക്കനാൽ

കേരള അതിർത്തിയോട് ചേർന്ന തമിഴ്നാട്ടിലെ കൊടൈക്കനാലിലും തണുത്ത കാലാവസ്ഥയാണ്. പകൽ താപനില 22 മുതൽ 23 ഡിഗ്രി വരെയും രാത്രിയിൽ 17 ഡിഗ്രിയോളവും ആയിരിക്കും. പൊതുവെ മേഘാവൃതമായ അന്തരീക്ഷത്തിനൊപ്പം നേരിയ ചാറ്റൽമഴയ്ക്കും കോടമഞ്ഞിനും സാധ്യതയുണ്ട്. തടാകക്കരയിലൂടെയുള്ള നടത്തവും പൈൻ ഫോറസ്റ്റ് സന്ദർശനവും സഞ്ചാരികൾക്ക് മികച്ച അനുഭവമാകും. തണുപ്പ് ശക്തമായതിനാൽ ചൂടുള്ള വസ്ത്രങ്ങൾ കരുതുന്നത് അനിവാര്യമാണ്.

ഏതായാലും കോടമഞ്ഞും കുളിർക്കാറ്റും പച്ചപ്പും ആസ്വദിക്കാൻ ആഗ്രഹിക്കുന്നവർക്ക് ഒക്ടോബർ മാസം മികച്ച അവസരമാണ് നൽകുന്നത്. എന്നാൽ കാലാവസ്ഥ പെട്ടെന്ന് മാറാൻ സാധ്യതയുള്ളതിനാൽ യാത്രയ്ക്ക് മുമ്പ് പ്രാദേശിക കാലാവസ്ഥാ മുന്നറിയിപ്പുകളും റോഡ് സാഹചര്യങ്ങളും പരിശോധിച്ച് സുരക്ഷ ഉറപ്പാക്കുന്നതാണ് ഉചിതം.

English Summary : Planning a trip to Kerala in October? Discover the best hill stations like Munnar, Wayanad, Vagamon, and Gavi featuring pleasant weather, misty mountains, and lush greenery. Read our complete guide for current temperature updates, top tourist spots, and essential safety tips for the monsoon-to-winter transition.