കന്യാകുമാരി മേഖലയിൽ ചക്രവാതച്ചുഴി; തുലാവർഷ മേഘങ്ങൾ എത്തുന്നു, കേരളത്തിൽ മഴ സാധ്യത

കന്യാകുമാരി മേഖലയിലെ ചക്രവാതച്ചുഴിയുടെ സ്വാധീനത്തിൽ കേരളത്തിൽ മഴ ശക്തമാകാൻ സാധ്യത. തുലാവർഷത്തിന് മുന്നോടിയായുള്ള മഴമേഘങ്ങൾ സജീവമാകുന്നതോടെ വരും ദിവസങ്ങളിൽ സംസ്ഥാനത്തെ കൂടുതൽ പ്രദേശങ്ങളിൽ ഇടിമിന്നലോടു കൂടിയ മഴ ലഭിക്കാൻ സാധ്യതയുണ്ട്. കിഴക്കൻ മലയോര മേഖലകളിൽ ശക്തമായ മഴ ലഭിച്ചാൽ മലവെള്ളപ്പാച്ചിലിനും മണ്ണിടിച്ചിലിനും സാധ്യതയുള്ളതിനാൽ ജാഗ്രത വേണം.

ശക്തമായ ചൂട്, ചില പ്രദേശങ്ങളിൽ മാത്രം മഴ

നിലവിൽ ശ്രീലങ്കയ്ക്കും തെക്കൻ തമിഴ്നാടിനും ഇടയിൽ നിലനിൽക്കുന്ന ചക്രവാതച്ചുഴിയുടെ സ്വാധീനത്തിലാണ് തെക്കൻ കേരളത്തിൽ മഴ ലഭിക്കുന്നത്. കഴിഞ്ഞ രണ്ട് മൂന്ന് ദിവസങ്ങളിലായി തിരുവനന്തപുരം, കൊല്ലം ജില്ലകളുടെ ചില ഭാഗങ്ങളിൽ ഉച്ചയ്ക്കുശേഷവും രാത്രി വൈകിയും ഇടത്തരം മുതൽ ശക്തമായ മഴ വരെ ലഭിച്ചിരുന്നു. അതേസമയം, കേരളത്തിലെ മറ്റു പ്രദേശങ്ങളിൽ ഉച്ചവരെ വെയിലും തുടർന്ന് മേഘാവൃതമായ അന്തരീക്ഷവും ശക്തമായ ചൂടുമാണ് അനുഭവപ്പെട്ടത്.

Kerala Weather : തുലാവർഷം വരുന്നു; ബംഗാൾ ഉൾക്കടലിനു മുകളിലായി ചക്രവാതച്ചുഴി, കേരളത്തിൽ 17 വരെ മഴയ്ക്ക് സാധ്യത
തെക്കുപടിഞ്ഞാറൻ മൺസൂൺ രാജ്യത്തിന്റെ ശേഷിക്കുന്ന ഭാഗങ്ങളിൽനിന്ന് അടുത്ത രണ്ട് ദിവസത്തിനുള്ളിൽ പിൻവാങ്ങാൻ സാധ്യത.
https://metbeatnews.com/imd-predicts-heavy-rains-and-strong-winds-in-kerala-through-october-17

നാളെ മുതൽ കൂടുതൽ പ്രദേശങ്ങളിൽ മഴ സാധ്യത

ഇന്ന് മുതൽ തെക്കൻ കേരളത്തിന് പുറമെ മധ്യ, വടക്കൻ കേരളത്തിലെ ചില പ്രദേശങ്ങളിലും ഇടിമിന്നലോടു കൂടിയ മഴ ലഭിച്ചേക്കും. നാളെ മുതൽ ഉച്ചയോടെയും ഉച്ചയ്ക്കുശേഷവും തുടങ്ങി പുലർച്ചെ വരെ നീളുന്ന സമയങ്ങളിൽ സംസ്ഥാനത്തെ മിക്ക ജില്ലകളിലും കൂടുതൽ പ്രദേശങ്ങളിൽ മഴ ലഭിക്കാനാണ് സാധ്യത. ഇടത്തരം മുതൽ ശക്തമായ മഴയ്ക്കുള്ള സാധ്യതയാണ് പ്രവചിക്കുന്നത്.

മലവെള്ളപ്പാച്ചിലും മണ്ണിടിച്ചിലും

തിരുവനന്തപുരം, കൊല്ലം, പത്തനംതിട്ട, കോട്ടയം, എറണാകുളം, ഇടുക്കി, പാലക്കാട്, മലപ്പുറം, വയനാട് തുടങ്ങിയ ജില്ലകളുടെ ചില കിഴക്കൻ, ഇടനാട് മേഖലകളിൽ കുറഞ്ഞ സമയത്തിനുള്ളിൽ ശക്തമായതോ അതിശക്തമായതോ ആയ മഴ ലഭിച്ചേക്കും. മഴ ശക്തമാകുന്ന പക്ഷം കിഴക്കൻ മലയോര മേഖലകളിൽ മലവെള്ളപ്പാച്ചിൽ, മണ്ണിടിച്ചിൽ തുടങ്ങിയ അപകടങ്ങൾക്കും സാധ്യതയുണ്ട്.

ജാഗ്രത പാലിക്കുക

മഴയ്ക്കൊപ്പം ശക്തമായ ഇടിമിന്നലിനും ചില പ്രദേശങ്ങളിൽ ശക്തമായ കാറ്റിനും സാധ്യതയുള്ളതിനാൽ പൊതുജനങ്ങൾ ജാഗ്രത പാലിക്കണം. മുന്നറിയിപ്പുകളും നിർദേശങ്ങളും കർശനമായി പിന്തുടരണമെന്നും നിർദേശമുണ്ട്.

എല്ലാ പ്രദേശങ്ങളിലും ഒരേ ദിവസം മഴ ലഭിക്കണമെന്നില്ല. വിവിധ പ്രദേശങ്ങളിൽ വ്യത്യസ്ത ദിവസങ്ങളിലായാകും മഴ ശക്തമാകുക. ചിലയിടങ്ങളിൽ തുടർച്ചയായ ദിവസങ്ങളിൽ ശക്തമായ മഴ ലഭിക്കാനും സാധ്യതയുണ്ട്. വരും ദിവസങ്ങളിലും ഈ മഴസാഹചര്യം തുടരാനാണ് സാധ്യത.

കലവർഷം പിൻവാങ്ങൽ രണ്ട് മൂന്ന് ദിവസത്തിനുള്ളിൽ അറിയാം

തെക്കുപടിഞ്ഞാറൻ കാലവർഷം കേരളത്തിൽനിന്ന് പിൻവാങ്ങിയതായി ഔദ്യോഗിക പ്രഖ്യാപനം അടുത്ത രണ്ടുമൂന്ന് ദിവസത്തിനുള്ളിൽ ഉണ്ടായേക്കും. കാലവർഷത്തിന്റെ പിൻവാങ്ങലിനൊപ്പം തുലാവർഷ മഴയുടെ വരവിനുള്ള സാഹചര്യമൊരുങ്ങുന്നു. അതിനാൽ കേരളത്തിൽ വരും ദിവസങ്ങളിൽ മഴ പ്രതീക്ഷിക്കാം.

English Summary : A cyclonic circulation positioned between Sri Lanka and south Tamil Nadu is triggering an increase in rainfall across Kerala, signaling the impending arrival of the Northeast Monsoon (Thulavarsham).