കാലാവസ്ഥാ ഉച്ചകോടി COP-31ന് ഇന്ന് തുടക്കം; 200ഓളം രാജ്യങ്ങളുടെ പ്രതിനിധികൾ പങ്കെടുക്കും

ഐക്യരാഷ്ട്രസഭയുടെ 31-ാമത് ആഗോള കാലാവസ്ഥാ വ്യതിയാന ഉച്ചകോടിയായ COP-31ന് തുർക്കിയെയിലെ അന്റാലിയയിൽ ഇന്ന് തുടക്കമാകും. ഇന്ത്യയുൾപ്പെടെ 200ഓളം രാജ്യങ്ങളിൽ നിന്നുള്ള പ്രതിനിധികൾ രണ്ടാഴ്ച നീളുന്ന ഉച്ചകോടിയിൽ പങ്കെടുക്കും. ഈ മാസം 20 വരെയാണ് സമ്മേളനം.

ശുദ്ധ ഊർജത്തിന്റെ ഉപയോഗം ത്വരിതപ്പെടുത്തുക, കാലാവസ്ഥാ ധനസഹായം വർധിപ്പിക്കുക, കാലാവസ്ഥാ വ്യതിയാനങ്ങളെ നേരിടാനുള്ള രാജ്യങ്ങളുടെ ശേഷി ശക്തിപ്പെടുത്തുക തുടങ്ങിയവയാണ് ഉച്ചകോടിയിലെ പ്രധാന ചർച്ചാവിഷയങ്ങൾ.

ഐക്യരാഷ്ട്രസഭയുടെ ആഭിമുഖ്യത്തിൽ വർഷംതോറും സംഘടിപ്പിക്കുന്ന ഉന്നതതല ആഗോള കാലാവസ്ഥാ സമ്മേളനമാണ് കോൺഫറൻസ് ഓഫ് പാർട്ടീസ് അഥവാ COP. കാലാവസ്ഥാ വ്യതിയാനത്തെ ചെറുക്കുന്നതിനുള്ള ആഗോളതലത്തിലുള്ള കൂട്ടായ പ്രവർത്തനങ്ങൾ ചർച്ച ചെയ്യുന്നതിനും ഏകോപിപ്പിക്കുന്നതിനുമുള്ള പ്രധാന വേദിയാണിത്.

31-ാമത് സമ്മേളനത്തിൽ ആഗോള കാലാവസ്ഥയെക്കുറിച്ചുള്ള ആധികാരിക ശാസ്ത്രീയ നിരീക്ഷണങ്ങളും വിവരങ്ങളും രാജ്യങ്ങൾക്ക് ലഭ്യമാക്കുന്നതിന് ലോക കാലാവസ്ഥാ സംഘടനയും പിന്തുണ നൽകും. കാലാവസ്ഥാ പ്രതിസന്ധി നേരിടാൻ രാജ്യങ്ങൾ സ്വീകരിക്കേണ്ട നടപടികളും ആഗോള സഹകരണത്തിന്റെ സാധ്യതകളും ഉച്ചകോടിയിൽ ചർച്ചയാകും.

English Summary : The 31st United Nations Climate Change Conference (COP31) has officially commenced in Antalya, Türkiye, bringing together representatives from around 200 nations, including India.