՝സെൻ യാർ’ ചുഴലിക്കാറ്റ് എത്തുന്നു, വരാൻ പോകുന്നത് അതിതീവ്ര ന്യൂനമർദം

തമിഴ്നാട്ടിലും കേരള മേഖലയിലും കിഴക്കൻ കാറ്റ് സജീവമാണ്. അതിനുകാരണം കന്യാകുമാരി കടലിനു മുകളിലെ ചക്രവാതചുഴിയാണ്. അതേസമയം, തെക്ക് കിഴക്ക് ബംഗാൾ ഉൾക്കടലിൽ ‘സെൻ യാർ’ ചുഴലിക്കാറ്റ് രൂപംകൊള്ളുമെന്ന പുതിയ റിപ്പോർട്ടാണ് ഇപ്പോൾ പുറത്തുവരുന്നത്.

ആൻഡമാൻ കടലിൽ രൂപംകൊണ്ട ന്യൂനമർദം അതിതീവ്ര ന്യൂനമർദമായേക്കും. നവംബർ 26ന് ബംഗാൾ ഉൾക്കടലിൽ സിസ്റ്റം ചുഴലിക്കാറ്റായി മാറാനാണ് സാധ്യത. നേരത്തെ ബംഗാൾ ഉൾക്കടലിൽ രൂപംകൊണ്ട മൻത ചുഴലിക്കാറ്റ് ആന്ധ്ര–ഒഡിഷ തീരത്തായിരുന്നു കരതൊട്ടത്.

എന്നാൽ ഇത്തവണത്തേത് ഭൂമധ്യരേഖയ്ക്ക് സമീപത്ത് നിന്നും തുടക്കം കുറിക്കുന്നതിനാൽ തമിഴ്നാട് തീരത്ത് കരതൊടുമെന്നാണ് കരുതപ്പെടുന്നത്. സിസ്റ്റത്തിന് ഏറെ ദൂരം സഞ്ചരിക്കാൻ സമയം ലഭിക്കുന്നതിനാൽ അതിതീവ്ര ചുഴലിക്കാറ്റായി മാറാനും സാധ്യത ഏറെയാണ്.

കന്യാകുമാരിക്കടലിനു മുകളിലെ ചക്രവാതചുഴി സ്വാധീനത്തിൽ തെക്കൻ തമിഴ്നാട്ടിലും കേരളത്തിലും കിഴക്കൻ കാറ്റ് സജീവമാണ്. നിലവിൽ ശക്തമായ മഴ മുഴുവൻ പശ്ചിമഘട്ട ഭാഗത്തുതട്ടി തമിഴ്നാട് ഭാഗത്ത് ലഭിക്കുന്നുണ്ട്. ബാക്കി വരുന്ന മഴ കേരളത്തിലും ലഭിക്കുന്നുണ്ട്. അന്തരീക്ഷം ഇരുണ്ടുമൂടി കെട്ടിയ അവസ്ഥയാണ്. ഇന്നു പകൽ മുഴുവനും ഈ അവസ്ഥയിലായിരുന്നു.

English News: A severe depression is forming in the Andaman Sea, potentially intensifying into a cyclone by November 26. Stay updated on its path towards Tamil Nadu.