നവംബറിൽ ആകാശവിസ്മയങ്ങളുടെ വിരുന്ന്; ഉൽക്കാവർഷങ്ങളും സൂപ്പർമൂണും നക്ഷത്രക്കൂട്ടവും കാണാം

ആകാശനിരീക്ഷണം ഇഷ്ടപ്പെടുന്നവർക്ക് കൗതുകക്കാഴ്ചകളുടെ വിരുന്നൊരുക്കി നവംബർ മാസം. ഉൽക്കാവർഷങ്ങൾ, നാല് ഗ്രഹങ്ങളുടെ വിന്യാസം, ചൊവ്വയും വ്യാഴവും തമ്മിലുള്ള അടുത്തുവരവ്, വർഷത്തിലെ ആദ്യ സൂപ്പർമൂൺ തുടങ്ങി നിരവധി ആകാശവിസ്മയങ്ങളാണ് ഈ മാസം ദൃശ്യമാകുക. തെളിഞ്ഞ ആകാശവും വെളിച്ചം കുറഞ്ഞ സ്ഥലവും തിരഞ്ഞെടുക്കാനായാൽ ഇവയിൽ പലതും നഗ്നനേത്രങ്ങൾകൊണ്ട് തന്നെ നിരീക്ഷിക്കാനാകും.

നവംബർ രണ്ടും മൂന്നും തീയതികളിൽ ചന്ദ്രൻ, ചൊവ്വ, വ്യാഴം, തിളക്കമുള്ള നക്ഷത്രമായ റെഗുലസ് എന്നിവ കിഴക്കൻ ആകാശത്ത് അടുത്തടുത്തായി കാണപ്പെടും. ബൈനോക്കുലറിന്റെയോ ദൂരദർശിനിയുടെയോ സഹായത്തോടെ ബീഹൈവ് നക്ഷത്രക്കൂട്ടവും നിരീക്ഷിക്കാം.

നവംബർ നാല്, അഞ്ച് തീയതികളിൽ ദക്ഷിണ ടോറിഡ് ഉൽക്കാവർഷം ഉച്ചസ്ഥായിയിലെത്തും. വേഗം കുറഞ്ഞതും തിളക്കമേറിയതുമായ ഉൽക്കകളും അപൂർവമായി അഗ്നിഗോളങ്ങളും ഈ ഉൽക്കാവർഷത്തിന്റെ പ്രത്യേകതയാണ്. മണിക്കൂറിൽ ഏതാനും ഉൽക്കകൾ മാത്രമേ കാണാനാകൂവെങ്കിലും അവയുടെ തിളക്കം ആകാശക്കാഴ്ചയെ മനോഹരമാക്കും. നവംബർ 11, 12 തീയതികളിൽ ഉത്തര ടോറിഡ് ഉൽക്കാവർഷവും പ്രതീക്ഷിക്കാം.

ഉൽക്കാവർഷം

മാസത്തിലെ മറ്റൊരു പ്രധാന ആകാശവിസ്മയമായ ലിയോണിഡ് ഉൽക്കാവർഷം നവംബർ 17, 18 തീയതികളിൽ ഉച്ചസ്ഥായിയിലെത്തും. അനുകൂല സാഹചര്യങ്ങളിൽ മണിക്കൂറിൽ 10 മുതൽ 15 വരെ ഉൽക്കകൾ കാണാനാകും. അതിവേഗത്തിൽ സഞ്ചരിക്കുന്ന ഉൽക്കകൾ ആകാശത്ത് തിളക്കമുള്ള പ്രകാശവരകൾ സൃഷ്ടിക്കും. നഗരവെളിച്ചത്തിൽനിന്ന് അകന്ന തുറസ്സായ സ്ഥലത്ത് നിരീക്ഷണം നടത്തുന്നതാണ് കൂടുതൽ ഉൽക്കകൾ കാണാൻ സഹായിക്കുക.

സൂപ്പർ ബീവർ മൂൺ

നവംബർ 24നാണ് മാസത്തിലെ പ്രധാന ആകർഷണമായ ‘സൂപ്പർ ബീവർ മൂൺ’ ദൃശ്യമാകുക. വർഷാവസാനത്തോടെ പ്രതീക്ഷിക്കുന്ന തുടർച്ചയായ മൂന്ന് സൂപ്പർമൂണുകളിൽ ആദ്യത്തേതാണിത്. സാധാരണ പൂർണചന്ദ്രനെ അപേക്ഷിച്ച് ചന്ദ്രൻ കൂടുതൽ വലുപ്പത്തിലും തിളക്കത്തിലും കാണപ്പെടും. ചന്ദ്രൻ ഉദിക്കുന്ന സമയത്തും അസ്തമിക്കുന്ന സമയത്തും ചക്രവാളത്തോട് ചേർന്ന് കൂടുതൽ വലുതായി തോന്നുന്ന ‘മൂൺ ഇല്യൂഷൻ’ പ്രതിഭാസവും ആസ്വദിക്കാം.

നഗരവെളിച്ചത്തിൽനിന്ന് മാറി തെളിഞ്ഞ ആകാശമുള്ള ഇടങ്ങൾ തിരഞ്ഞെടുക്കുന്നതിലൂടെ നവംബറിലെ ഈ ആകാശവിസ്മയങ്ങൾ കൂടുതൽ വ്യക്തമായി ആസ്വദിക്കാനാകും.

English Summary : November is set to deliver a breathtaking treat for stargazers, featuring a lineup of spectacular astronomical events including major meteor showers, rare planetary alignments, and the year's first Supermoon. On November 2–3, night skies will showcase a close grouping of the Moon, Mars, Jupiter, and the bright star Regulus in the eastern sky, with the Beehive Cluster visible using binoculars or telescopes.