ബംഗാള്‍ ഉള്‍ക്കടലില്‍ 'മുരശു' ചുഴലിക്കാറ്റ് രൂപപ്പെട്ടതായി കേന്ദ്ര കാലാവസ്ഥാ വകുപ്പ് അറിയിച്ചു. ഇന്ത്യ നിര്‍ദേശിച്ച പേരാണ് മുരശു. തെക്കുപടിഞ്ഞാറന്‍ ബംഗാള്‍ ഉള്‍ക്കടലിലാണ് ഇന്ന് വൈകിട്ടോടെ മുരശു രൂപപ്പെട്ടത്. ഇന്നു രാവിലെ ബംഗാള്‍ ഉള്‍ക്കടലിലെ ഈ മേഖലയില്‍ രൂപപ്പെട്ട തീവ്രന്യൂനമര്‍ദം (Deep Depression) വൈകിട്ടോടെ മുരശു ചുഴലിക്കാറ്റാകുകയായിരുന്നു.

ഈ വര്‍ഷം ബംഗാള്‍ ഉള്‍ക്കടലില്‍ രൂപപ്പെടുന്ന രണ്ടാമത്തെ ചുഴലിക്കാറ്റാണിത്. കഴിഞ്ഞ ആഴ്ചയാണ് ആദ്യ ചുഴലിക്കാറ്റ് അര്‍ണബ് രൂപപ്പെട്ടു ആന്ധ്രാ തീരത്ത് കരകയറിയത്.

രാവിലെ 11:30ഓടെ ലഭ്യമായ വിവരമനുസരിച്ച്, ചെന്നൈയില്‍ നിന്ന് ഏകദേശം 560 കിലോമീറ്റര്‍ കിഴക്ക്‌തെക്കുകിഴക്കായും ആന്ധ്രാപ്രദേശിലെ നെല്ലൂരില്‍ നിന്ന് 630 കിലോമീറ്ററും വിശാഖപട്ടണത്തുനിന്ന് 660 കിലോമീറ്ററും അകലെയാണ് ചുഴലിക്കാറ്റിന്റെ കേന്ദ്രം സ്ഥിതിചെയ്യുന്നത്.

തീവ്ര ചുഴലിക്കാറ്റാകും

പടിഞ്ഞാറ് വടക്കുപടിഞ്ഞാറന്‍ ദിശയില്‍ സഞ്ചരിക്കുന്ന ചുഴലിക്കാറ്റ്, നവംബര്‍ 2 രാവിേെലാടെ കൂടുതല്‍ ശക്തി പ്രാപിച്ച് 'തീവ്ര ചുഴലിക്കാറ്റായി' (Severe Cyclonic Storm) മാറുമെന്നും കാലാവസ്ഥാ വകുപ്പ് പറയുന്നു. തുടര്‍ന്ന് വടക്കുപടിഞ്ഞാറന്‍ ദിശയിലേക്ക് നീങ്ങി, നവംബര്‍ 2 അര്‍ദ്ധരാത്രിക്കും നവംബര്‍ 3 പുലര്‍ച്ചെയ്ക്കും ഇടയില്‍ (2330 IST 0400 IST) തെക്കന്‍ ആന്ധ്രാപ്രദേശ് തീരത്തെ നെല്ലൂരിനും നര്‍സാപൂരിനും ഇടയിലൂടെ തീരം തൊടാന്‍ സാധ്യതയുണ്ട്.

തീരം തൊടുമ്പോള്‍ 110 കി.മി വരെ വേഗത

തീരം തൊടുന്ന സമയത്ത് മണിക്കൂറില്‍ 100 മുതല്‍ 110 കിലോമീറ്റര്‍ വരെയും, ചില അവസരങ്ങളില്‍ പരമാവധി 120 കിലോമീറ്റര്‍ വരെയും വേഗതയില്‍ ശക്തമായ കാറ്റ് വീശിയടിച്ചേക്കാം.
അറബിക്കടലിലും തമിഴ്‌നാട്, ആന്ധ്രാപ്രദേശ് തീരങ്ങളിലും കടല്‍ പ്രക്ഷുബ്ധമാകാന്‍ സാധ്യതയുള്ളതിനാല്‍ ജാഗ്രതാ നിര്‍ദേശം പുറപ്പെടുവിച്ചിട്ടുണ്ട്. കൂടുതല്‍ വിവരങ്ങള്‍ Metbeat News വരും മണിക്കൂറുകളില്‍ പങ്കുവെക്കുന്നതാണ്.

English Summary: The Deep Depression over the southwest and adjoining southeast Bay of Bengal has intensified into Cyclonic Storm "Murasu". The cyclone is forecasted to cross the south Andhra Pradesh coast between Nellore and Narsapur between midnight of November 2 and early morning of November 3, 2026