മൻ ത ദുർബലമായി ; കേരളം പ്രസന്നമായ അന്തരീക്ഷ സ്ഥിതിയിലേക്ക്

മൻത ചുഴലിക്കാറ്റിന്റെയും തീവ്ര ന്യൂനമർദ്ദത്തിൻ്റെയും സ്വാധീനം കഴിഞ്ഞതോടെ കേരളം പ്രസന്നമായ കാലാവസ്ഥയിലേക്ക്. തുലാവർഷത്തിന്റെ ഭാഗമായ മഴയും അടുത്ത ഏതാനും ദിവസം വിട്ടുനിൽക്കും. പകൽ ചൂട് വർദ്ധിക്കും.

വടക്കൻ കേരളത്തിലാണ് വരും ദിവസങ്ങളിൽ ഒറ്റപ്പെട്ട ചാറ്റൽ മഴ പ്രതീക്ഷിക്കുന്നത്. മധ്യകേരളത്തിലും തെക്കൻ ജില്ലകളിലും ഏതാണ്ട് വരണ്ട കാലാവസ്ഥയിലേക്ക് മാറും. പുറം പണികൾ നടത്താനും കാർഷിക വിളകൾ ഉണക്കാനും ഈ സമയം പ്രയോജനപ്പെടുത്താം.

മൻ ത ചുഴലിക്കാറ്റ് ( Cyclone Montha) കരകയറി ദുർബലമായതോടെ ഇതേ തുടർന്നുള്ള മഴ കുറഞ്ഞു. മൻ ത ശക്തി കൂടിയ ന്യൂനമർദം (well marked low pressure WML) ആയി ദുർബലമായി. ഇപ്പോൾ വിദർഭയ്ക്ക് വടക്ക് കിഴക്ക് തുടരുന്നു. അടുത്ത 24 മണിക്കൂറിൽ ഇത് വീണ്ടും ശക്തി കുറഞ്ഞ് ന്യൂനമർദമായി (low pressure area) ആയി മാറും.

അറബിക്കടലിൽ ദിശ കിട്ടാതെ കിടന്ന തീവ്ര ന്യൂനമർദം (Depression ) ഗുജറാത്ത് തീരം ലക്ഷ്യമാക്കി യാത്ര തുടരുകയാണ്. ഗുജറാത്തിലെ വെരാവലിൽ നിന്ന് 360 കി.മി അകലെയാണ് തീവ്ര ന്യൂനമർദ്ദത്തിൻ്റെ നിലവിലെ സ്ഥാനം. ഇത് വരും ദിവസങ്ങളിൽ ഗുജറാത്ത്, മഹാരാഷ്ട്ര, ഗോവ എന്നിവിടങ്ങളിൽ മഴ നൽകും.

കേരളത്തിൽ എല്ലാ ജില്ലകളിലും സാധാരണ ചാറ്റൽ മഴ മുന്നറിയിപ്പാണ് കാലാവസ്ഥാ വകുപ്പ് നൽകിയത്. കേരള, ലക്ഷദ്വീപ് തീരങ്ങളിൽ മൽസ്യ തൊഴിലാളി മുന്നിയിപ്പും ഇല്ല.

Metbeat News

English Summary: Cyclone Montha weakened to WML; Kerala is heading towards a pleasant atmosphere