Cyclone Ditwah Update : 36 മണിക്കൂർ ശ്രീലങ്കൻ കരയോട് തൊട്ടുരുമ്മി നാശം വരുത്തി യാത്ര, ഇനി തമിഴ്നാട്ടിലേക്ക്

36 മണിക്കൂർ ശ്രീലങ്കയുടെ കിഴക്കൻ തീരത്തെ കരയെ തൊട്ടുരുമ്മി നീങ്ങി ശ്രീലങ്കയിൽ കനത്ത പേമാരിക്കും പ്രളയത്തിനും കാരണമായ ഡിറ്റ് വ (Cyclone Ditwah) ചുഴലിക്കാറ്റ് ഇനി ബംഗാൾ ഉൾക്കടലിലെ കടൽ മേഖലയിലേക്ക് നീങ്ങും. തമിഴ്നാട് തീരം ലക്ഷ്യം വച്ചാണ് ഇനിയുള്ള യാത്ര. കഴിഞ്ഞദിവസം ശ്രീലങ്കയിൽ അമ്പതോളം പേരുടെ മരണത്തിനിടയാക്കിയ, കനത്ത നാശനഷ്ടങ്ങൾക്ക് കാരണമായ ചുഴലിക്കാറ്റ് ഇനി ഇന്ത്യൻ തീരത്തെ ലക്ഷ്യമാക്കിയാണ് നീങ്ങുന്നത്.

ശ്രീലങ്കക്കു ശേഷം തമിഴ്നാട്ടിലും മഴ

തമിഴ്നാട്ടിൽ പ്രത്യേകിച്ച് കിഴക്കൻ തീരദേശത്ത് കനത്ത മഴയും കാറ്റും ഉണ്ടാകും. ചെന്നൈ ഉൾപ്പെടെയുള്ള നഗരങ്ങളിൽ വരും ദിവസങ്ങളിൽ ശക്തമായ മഴയും വെള്ളക്കെട്ടുകളും ഉണ്ടാകും. ഇന്നലെ വൈകിട്ട് തന്നെ പാമ്പൻ പാലത്തിലും രാമേശ്വരത്തും തിരമാലകളും കാറ്റും റിപ്പോർട്ട് ചെയ്തിരുന്നു. ഇന്ന് കടൽ കൂടുതൽ പ്രക്ഷുബ്ധമാകും.

കേരളത്തിലും ഒറ്റപ്പെട്ട മഴ

തെക്കൻ കേരളത്തിലും ഒറ്റപ്പെട്ട മഴ പ്രതീക്ഷിക്കാം. പുതുച്ചേരി തീരത്താണ് ഡിറ്റ് വ ചുഴലിക്കാറ്റ് തീരത്തോട് കൂടുതൽ അടുക്കുക. എന്നാൽ കരകയറുമെന്ന സൂചനകൾ ഇപ്പോൾ മോഡലുകൾ കാണിക്കുന്നില്ല. കടലിൽ അൽപനേരം യാത്ര ചെയ്യുമെങ്കിലും വീണ്ടും ശക്തിപ്പെടാൻ ഉള്ള ഊർജ്ജം ചുഴലിക്കാറ്റിന് ലഭിക്കില്ല. അതിനാൽ ചുഴലികാറ്റായി തന്നെ തുടരാനാണ് സാധ്യത.

ചുഴലിക്കാറ്റ് തമിഴ്നാട്ടിൽ കരകയറ്റുന്ന മേഘങ്ങൾ കേരളത്തിൽ ഇടിയോടുകൂടി മഴ നൽകാനും സാധ്യതയുണ്ട്. വടക്കൻ കേരളത്തിൽ ഉൾപ്പെടെ മേഘാവൃദ്ധമായ അന്തരീക്ഷവും വൈകിട്ട് മഴയ്ക്കും സാധ്യത തള്ളിക്കളയാൻ കഴിയില്ല. കൂടുതൽ വിവരങ്ങൾ Metbeat News വെബ്സൈറ്റിലെ ലൈവ് റിപ്പോർട്ടിങ്ങിൽ ഉണ്ടാകും. അതിനാൽ വെബ്സൈറ്റ് ഇടക്കിടയ്ക്ക് സന്ദർശിക്കണമെന്ന് അഭ്യർത്ഥിക്കുന്നു.

Cyclone Ditwah Update: After 36 hours of making landfall in Sri Lanka, it will now travel to Tamil Nadu