തുലാമഴയിലെ ഇടിമേഘത്തെ ഇടിച്ചൊതുക്കുന്നതെന്ത് ?

തുലാവര്‍ഷം എത്തിയിട്ടും ഇടിയില്ലാതെ നൂല്‍മഴയാണ് ആദ്യ രണ്ടു ദിവസവും കേരളത്തില്‍ ലഭിച്ചത്. എന്നാല്‍ ഒക്ടോബര്‍ 1 മുതല്‍ ശക്തമായ ഇടിമിന്നലോടെ മഴ ലഭിക്കുകയും ഇതേ തുടര്‍ന്ന് ജീവഹാനി സംഭവിക്കുകയും ചെയ്തിരുന്നു. എന്താണ് ഇപ്പോഴത്തെ മഴയില്‍ ഇടിമിന്നലില്ലാതെ ചൂടു കുറഞ്ഞ് ചെറു മഴ തുടരാന്‍ കാരണമെന്ന് പരിശോധിക്കാം.

ഇന്ന് രാവിലത്തെ അവലോകനത്തില്‍ സൂചിപ്പിച്ചതു പോലെ അറബിക്കടലില്‍ ലക്ഷദ്വീപിനു സമീപം രൂപപ്പെട്ട ചക്രവാതച്ചുഴി (cyclonic circulation) ആണ് പ്രധാന കാരണം. കൂടാതെ ചക്രവാതച്ചുഴിയില്‍ നിന്നുള്ള ന്യൂനമര്‍ദപാത്തി (trough) ഉം കാരണമാകുന്നുണ്ട്.

ഇത്തരത്തിലുള്ള അന്തരീക്ഷ ഘടന മൂലം കുത്തനെ ഉയരുന്ന കട്ടികൂടിയ ഇടിമേഘങ്ങള്‍ക്ക് (Cumulonimbus Cloud) പകരം അന്തരീക്ഷത്തിന്റെ താഴ്ന്ന തട്ടുകളില്‍ പരന്ന നേര്‍ത്ത Sratiform/Nimbotsratus മേഘങ്ങളാണ് പ്രധാനമായും രൂപപ്പെടുന്നത്.

ഇടിമേഘങ്ങളുടെ അഭാവം (Vertical Cloud Growth നില്ലാത്ത അവസ്ഥ)

തുലാവര്‍ഷത്തിന്റെ സ്വാഭാവിക സവിശേഷത ഉച്ചയ്ക്ക് ശേഷമുള്ള കനത്ത ചൂടും തത്ഫലമായി ഉയരത്തില്‍ വളരുന്ന വലിയ ഇടിമേഘങ്ങളുമാണ്. എന്നാല്‍ നിലവിലെ സമുദ്ര -അന്തരീക്ഷ പ്രതിഭാസങ്ങള്‍ മൂലം കാറ്റിന്റെ ഗതിയിലും ആര്‍ദ്രതയിലും വ്യതിയാനം വരികയും, കുത്തനെയുള്ള മേഘരൂപീകരണം നടക്കാതിരിക്കുകയും ചെയ്യുന്നു. ഇതിനാല്‍ ഇടിയും മിന്നലും കുറഞ്ഞ് തുടര്‍ച്ചയായ നൂല്‍മഴയോ നേരിയ മഴയോ ലഭിക്കുന്നു.

അന്തരീക്ഷത്തില്‍ ചൂട് കുറഞ്ഞതിന്റെ (താപനില താഴ്ന്നതിന്റെ) കാരണങ്ങള്‍

തുടര്‍ച്ചയായ മേഘാവൃതമായ അന്തരീക്ഷം (Cloud Cover)

സൂര്യപ്രകാശം നേരിട്ട് ഭൂമി പതിക്കുന്നത് തുടര്‍ച്ചയായ മേഘാവൃതമായ അന്തരീക്ഷം തടയുന്നു. പകല്‍ സമയത്തും അന്തരീക്ഷം മൂടിക്കെട്ടി നില്‍ക്കുന്നത് അന്തരീക്ഷ താപനില പ്രകടമായി കുറയുന്നതിന് കാരണമായി.

വടക്കുകിഴക്കന്‍ വരണ്ട തണുത്ത കാറ്റിന്റെ വരവ്

കാലവര്‍ഷം (തെക്കുപടിഞ്ഞാറന്‍ മണ്‍സൂണ്‍) പൂര്‍ണ്ണമായി പിന്‍വാങ്ങുകയും വടക്കുകിഴക്കന്‍ മണ്‍സൂണ്‍ കാറ്റ് സജീവമാകുകയും ചെയ്തതോടെ കരഭാഗത്തുനിന്നുള്ള തണുപ്പുള്ള കാറ്റും അന്തരീക്ഷത്തിലെ ഉയര്‍ന്ന ഈര്‍പ്പവും (High Humidtiy) ചേര്‍ന്ന് പകലും രാത്രിയും തണുപ്പുള്ള കാലാവസ്ഥ സൃഷ്ടിക്കുന്നു.

മഴയുടെ തുടര്‍ച്ചയായ സ്വഭാവം

വലിയ ഇടവേളകളില്ലാതെ നൂല്‍മഴ പോലെ തുടര്‍ച്ചയായി പെയ്യുന്ന മഴ അന്തരീക്ഷത്തെയും മണ്ണ്ഉപരിതലത്തെയും തണുപ്പിച്ചു നിര്‍ത്താന്‍ സഹായിക്കുന്നു.

മുന്നറിയിപ്പുകളും ഭാവി പ്രവചനവും

ഇടിമിന്നല്‍ ജാഗ്രത മാറ്റേണ്ടതില്ല

നിലവില്‍ ചാറ്റല്‍ മഴയും നൂല്‍മഴയുമാണ് അനുഭവപ്പെടുന്നതെങ്കിലും, തുലാവര്‍ഷ സീസണ്‍ ശക്തമാകുന്നതോടെ ഉച്ചയ്ക്ക് ശേഷം ഇടിമിന്നലോടു കൂടിയ മഴ പെയ്യാന്‍ സാധ്യതയുണ്ട്. ഇതിനാല്‍ മലയോര മേഖലകളിലും തീരദേശങ്ങളിലും കാലാവസ്ഥാ വകുപ്പിന്റെ ജാഗ്രതാ നിര്‍ദേശങ്ങള്‍ പാലിക്കേണ്ടതുണ്ട്.

വരും ദിവസങ്ങളിലെ സാധ്യത

അറബിക്കടലിലെയും ബംഗാള്‍ ഉള്‍ക്കടലിലെയും സിസ്റ്റങ്ങളുടെ (Low Pressure) ചലനത്തിനനുസരിച്ച് കാറ്റിന്റെ വേഗതയും മഴയുടെ സ്വഭാവവും മാറുമെന്നും ചില ജില്ലകളില്‍ ഇടവിട്ടുള്ള മഴ തുടരുമെന്നും റിപ്പോര്‍ട്ടുകള്‍ സൂചിപ്പിക്കുന്നു.

English Summary : The Malayalam article explores the shift in Kerala's early-season Thullavarsham (post-monsoon) rains from violent, lightning-filled thunderstorms to gentle, continuous drizzle accompanied by lower temperatures.