ഏലത്തിൽ നിറയെ ചിമ്പുകളും ചരങ്ങളും വേണോ? വിളവ് ഇരട്ടിയാക്കാൻ ശ്രദ്ധിക്കേണ്ട കാര്യങ്ങൾ

ഒരു ഏലത്തട്ടയുടെ ഇരുവശങ്ങളിലുമായി നാല് ചരങ്ങളും നാല് ചിമ്പുകളും വരാനുള്ള സ്വാഭാവിക ശേഷിയുണ്ടെങ്കിലും പല തോട്ടങ്ങളിലും എല്ലാ മുകുളങ്ങളും (Eye buds) പൂർണ്ണമായി വിരിയാറില്ല. ചെടിയുടെ ഈ ശേഷി നഷ്ടപ്പെടാതെ പരമാവധി ചിമ്പുകളും ചരങ്ങളും വിരിയിക്കാൻ താഴെ പറയുന്ന കാര്യങ്ങൾ ശ്രദ്ധിക്കാം

ചിമ്പുകളും ചരങ്ങളും കുറയാനുള്ള പ്രധാന കാരണങ്ങൾ

* സൂക്ഷ്മമൂലകങ്ങളുടെ കുറവ്: പ്രധാനമായും സിങ്ക് (Zinc), ബോറോൺ (Boron) എന്നിവയുടെ അഭാവം മുകുളങ്ങൾ കരിഞ്ഞുപോകാനോ വളർച്ച നിലയ്ക്കാനോ കാരണമാകുന്നു.

* മണ്ണിലെ അമിത പുളിരസം (Low pH): മണ്ണിലെ ഉയർന്ന അമ്ലത്വം കാരണം നൽകുന്ന വളങ്ങൾ ചെടിയുടെ വേരുകൾക്ക് കൃത്യമായി വലിച്ചെടുക്കാൻ കഴിയില്ല.

* ഫോസ്ഫറസ്, പൊട്ടാഷ് കുറവ്: പുതിയ ചിമ്പുകൾ പൊട്ടാൻ ഫോസ്ഫറസും, പൂക്കളും കായ്കളും പുഷ്ടിയോടെ നിൽക്കാൻ പൊട്ടാസ്യവും അനിവാര്യമാണ്.

* അമിത തണൽ: മൂട്ടിൽ ആവശ്യത്തിന് വെളിച്ചവും വായുസഞ്ചാരവും കിട്ടിയില്ലെങ്കിൽ ചരങ്ങളുടെ എണ്ണം പകുതിയായി കുറയും.

അധിക ചിമ്പുകൾക്കും ചരങ്ങൾക്കുമുള്ള വളപ്രയോഗങ്ങൾ

* ഡോളമൈറ്റ് / കുമ്മായ പ്രയോഗം: മഴക്കാലത്തിന് തൊട്ടുമുമ്പ് മൂടൊന്നിന് 100–150 ഗ്രാം ഡോളമൈറ്റ് നൽകി മണ്ണിന്റെ പി.എച്ച് (pH 5.5 - 6.5) ക്രമീകരിക്കുക.

* ജൈവ അടിവളം: മഴയുടെ തുടക്കത്തിൽ 5-10 കി.ഗ്രാം ഉണങ്ങിപ്പൊടിഞ്ഞ ചാണകം/കമ്പോസ്റ്റ്, ഒപ്പം 500 ഗ്രാം വേപ്പിൻപിണ്ണാക്കും ട്രൈക്കോഡെർമയും ചേർത്ത് ഇളക്കി കൊടുക്കുക.

* ചിമ്പ് പൊട്ടിക്കാൻ ഫോസ്ഫറസ്: കാലവർഷാരംഭത്തിൽ പുതിയ വേരുകൾ വരാനും ചിമ്പുകൾ പൊട്ടാനും റോക്ക് ഫോസ്ഫേറ്റ് (രാജ്ഫോസ്) അല്ലെങ്കിൽ DAP നൽകുക.

സന്തുലിത രാസവളം:

* വളർച്ചാ ഘട്ടത്തിൽ: 18:46:0 (DAP).
* കായ്പിടുത്ത ഘട്ടത്തിൽ: 10:26:26 അല്ലെങ്കിൽ 12:32:16 (മൂടൊന്നിന് 50-75 ഗ്രാം വീതം 45 ദിവസത്തെ ഇടവേളകളിൽ).

* മൈക്രോന്യൂട്രിയന്റ് സ്പ്രേ: ഐ.ഐ.എസ്.ആർ (IISR) ഏലം സ്പെഷ്യൽ അല്ലെങ്കിൽ അംഗീകൃത സൂക്ഷ്മമൂലക മിശ്രിതം ലിറ്ററിന് 2-3 ഗ്രാം തോതിൽ ഇലകളിലും തട്ടകളിലും തളിക്കുക (ഓഗസ്റ്റ്, ഒക്ടോബർ മാസങ്ങളിൽ).

* ഹോർമോൺ ഉത്തേജനം: ഉറങ്ങിക്കിടക്കുന്ന മുകുളങ്ങൾ പെട്ടെന്ന് പൊട്ടി വരാൻ സൈറ്റോകിനിൻ (Cytokinin) അടങ്ങിയ സീവീഡ് എക്സ്ട്രാക്റ്റ് (Seaweed Extract) തളിക്കുന്നത് ഫലപ്രദമാണ്.

ശ്രദ്ധിക്കേണ്ട കൃഷിപ്പണികൾ:

* തട്ട വൃത്തിയാക്കൽ (Trashing): മൂട്ടിലെ ഉണങ്ങിയ ഇലകളും പഴയ തട്ടകളും കൃത്യമായി നീക്കം ചെയ്ത് ചരങ്ങൾ വരുന്ന ഭാഗത്ത് നല്ല വായുസഞ്ചാരവും പ്രകാശവും ഉറപ്പാക്കുക.

* തണൽ ക്രമീകരണം: തോട്ടത്തിൽ 40-50% അരിച്ചെത്തുന്ന സൂര്യപ്രകാശം നിലനിർത്താൻ തണൽ മരങ്ങൾ കോതിക്കൊടുക്കുക.

* നന നിയന്ത്രണം: വേനൽക്കാലത്ത് മൂട്ടിൽ എപ്പോഴും നേരിയ ഈർപ്പം നിലനിർത്താൻ സ്പ്രിംഗ്ലർ നന നൽകുക.
കൃത്യമായ വളപ്രയോഗവും പരിചരണവും വഴി ഓരോ തട്ടയിൽ നിന്നും പരമാവധി ചരങ്ങളും ചിമ്പുകളും ഉത്പാദിപ്പിച്ച് മികച്ച വിളവെടുപ്പ് നേടാം

English Summary : Discover how to maximize cardamom tillers and panicles to double your farm's yield. Learn expert tips on correcting soil pH, applying essential micro-nutrients like zinc and boron, managing shade, and targeted fertilizer schedules for maximum cardamom production.