ബംഗാൾ ഉൾക്കടലിൽ നാളെ അർണബ് ചുഴലിക്കാറ്റ് രൂപപ്പെടും, അതി ശക്തമായ ചുഴക്കാറ്റായി കര തൊടും

തെക്കു കിഴക്കൻ ബംഗാൾ ഉൾക്കടലിൽ തീവ്ര ന്യൂനമർദം (Depression) രൂപപ്പെട്ടു. ഇന്നലെ രാത്രിയോടെയാണ് തീവ്ര ന്യൂനമർദ്ദം രൂപപ്പെട്ടത്. ഇത് നാളെയോടെ അർണബ് ചുഴലിക്കാറ്റായി മാറും. തിങ്കളാഴ്ച രാവിലെയോടെയാണ് ചുഴലിക്കാറ്റായി ശക്തി പ്രാപിക്കുക.

ഈ സിസ്റ്റം വീണ്ടും ശക്തിപ്പെട്ട് ശക്തമായ ചുഴലിക്കാറ്റായും (severe cyclonic storm) അതി ശക്തമായ ചുഴലിക്കാറ്റായും (very severe cyclonic storm) മാറി ബുധനാഴ്ച രാവിലെയോടെ ആന്ധ്രാപ്രദേശ് – യാനം തീരങ്ങൾക്കിടയിലൂടെ വിശാഖ പട്ടണത്തിനും ബാപട്‌ലക്കും ഇടയിൽ അതിശക്തമായ ചുഴലിക്കാറ്റായി കരകയറും.

മണിക്കൂറിൽ മണിക്കൂറിൽ പരമാവധി 140 കിലോമീറ്റർ വരെ വേഗതയിലാണ് കരതൊടാൻ സാധ്യതയുള്ളത്.

നിലവിൽ ഈ സിസ്റ്റം വിശാഖപട്ടണത്തുനിന്ന് 820 കിലോമീറ്റർ അകലെയും, ആൻഡമാൻ ദ്വീപിലെ വിജയപുരയിൽ നിന്ന് 510 കി.മി അകലെയുമാണ് സ്ഥിതിചെയ്യുന്നത്. ഈ സിസ്റ്റം തമിഴ്നാട്ടിലും, ആന്ധ്രപ്രദേശിലും, ഒഡീഷയിലും ശക്തമായ മഴ നൽകും.

ബംഗാൾ കടലിൽ നാളെ ചുഴലിക്കാറ്റ് രൂപപ്പെടുന്നതോടെ കേരളത്തിൽ മഴ കുറയും. ചുഴലിക്കാറ്റ് ശക്തിപ്പെടുന്നതോടെ കേരളത്തിൽ മഴക്ക് പകരം വെയിൽ വരാനാണ് സാധ്യത. ഇപ്പോൾ അറബിക്കടലിൽ ന്യൂനമർദ്ദത്തെ തുടർന്ന് രൂപപ്പെട്ട മഴമേഘങ്ങളും ഈർപ്പവും ബംഗാൾ ഉൾക്കടലിൽ സിസ്റ്റം വലിച്ചെടുക്കുകയും കേരളതീരം തെളിഞ്ഞ അന്തരീക്ഷത്തിലേക്ക് മാറുകയും ചെയ്യും. ഇതോടെ കേരളത്തിൽ വെയിൽ തെളിയും. കേരളത്തിൽ ഇന്നും ഒറ്റപ്പെട്ട മഴ തുടരും.

English Summary : Depression over the southeast Bay of Bengal is expected to intensify into Cyclone Arnab by Monday morning. The system will further strengthen into a Very Severe Cyclonic Storm and is projected to make landfall between Visakhapatnam and Bapatla (Andhra Pradesh–Yanam coasts) by Wednesday morning, with wind speeds reaching up to 140 km/h.