കേരളത്തിൽ ഇന്നലെ ഉണ്ടായ കനത്ത മഴയെ തുടർന്ന് ഇടുക്കിയിലും കോട്ടയത്തും 4 പേരും മലപ്പുറത്ത് 5 പേരും മരിച്ചു. മലപ്പുറം ജില്ലയിലെ കിഴക്കൻ പ്രദേശമായ പൂക്കോട്ടുംപാടത്ത് മലവെള്ളപ്പാച്ചിൽ ഉണ്ടായാണ് ഇന്നലെ 2 പേർ മരിച്ചത്. അഞ്ചു പേരെ കാണാതായി. തിരൂർ സ്വദേശികളായ പരന്ന പറമ്പൻ മുഹമ്മദ് കുട്ടി ( 65), മാങ്ങാടൻ അനസ് (27) എന്നിവരാണ് ഇന്നലെ മരിച്ചത്. സഞ്ചാരികളും പ്രദേശവാസിയായ സ്ത്രീയും ഉൾപ്പെടെ ഏഴുപേരെ ഒഴുക്കിൽപ്പെട്ട് കാണാതായി. ഇതിൽ മൂന്നുപേരുടെ മൃതദേഹം ഇന്ന് കണ്ടെത്തി.

പ്രതികൂല കാലാവസ്ഥയെ തുടർന്ന് രാത്രി ഒമ്പതു മണിയോടെ ഇവിടെ തെരച്ചിൽ അവസാനിപ്പിച്ചു. ഇന്ന് രാവിലെ വീണ്ടും തെരച്ചിൽ തുടങ്ങിയിട്ടുണ്ട്. ബന്ധുക്കളെ കാണാനില്ലെന്ന് പരാതിയുമായി നിരവധി പേർ പോലീസ് സ്റ്റേഷനിൽ എത്തുന്നുണ്ട്. ഇൻസ്റ്റഗ്രാമിലൂടെ വൈറലായ പ്രകൃതി രമണീയമായ പ്രദേശമാണ് ടി കെ കോളനി. ഇവിടെ കാടിൻറെ സ്വഭാവം അറിയാതെ എത്തുന്ന മറ്റു പ്രദേശത്തു നിന്നുള്ള ആളുകളാണ് അപകടത്തിൽപ്പെടുന്നത്. നാട്ടുകാർ നൽകുന്ന മുന്നറിയിപ്പും ജില്ലയുടെ വിവിധ ഭാഗങ്ങളിൽ എത്തുന്നവർ പാലിക്കാറില്ല.

കരുവാരക്കുണ്ട് സ്വദേശി റഹീം, മരിച്ച അനസിന്റെ കൂടെയുണ്ടായിരുന്ന മറ്റൊരാൾ, വണ്ടൂർ കോട്ടക്കുന്ന് കൂപ്പനത്ത് സജ്ജാദ് , ചെട്ടിയാറമ്മൽ കറുപ്പത്ത് റഫീഖ്, പുഴയിൽ അലക്കാൻ ഇറങ്ങിയ പ്രദേശവാസി ടി.കെ കോളനി സ്വദേശി സജിത എന്നിവരെയാണ് കാണാതായതെന്ന് പോലീസ് പറഞ്ഞു.

ടി.കെ കോളനി കോട്ടപ്പുഴയിൽ ഞായറാഴ്ച വൈകിട്ട് അഞ്ചുമണിയോടെയാണ് അപ്രതീക്ഷിത മലവെള്ളപ്പാച്ചിൽ ഉണ്ടായത്. തിരൂർ ഭാഗത്തുനിന്ന് വിനോദസഞ്ചാരത്തിന് എത്തിയവരാണ് അപകടത്തിൽപ്പെട്ടത്.

വളർവട്ടം കനാൽ മുതൽ ടി.കെ കോളനി വരെ നിരവധി സഞ്ചാരികളാണ് വൈകുന്നേരം പുഴയിൽ ഉണ്ടായിരുന്നത്. അവധി ദിവസമായതിനാൽ കെട്ടുങ്ങൽ ആനകൊണ്ട് , ബാലവാടി പടി, കോയിപ്ര മലയടിവാരത്തോട് ചേർന്നുള്ള വിവിധ ഭാഗങ്ങളിൽ നൂറുകണക്കിന് പേര് എത്തിയിരുന്നു.

വെള്ളമുയർന്നതോടെ പുഴയുടെ മധ്യത്തിൽ അകപ്പെട്ട 30 പേരെ നാട്ടുകാർ രക്ഷപ്പെടുത്തി. രക്ഷപ്പെടാൻ കഴിയാതെ പലഭാഗത്തും ആളുകൾ ഏറെ നേരം കുടുങ്ങിക്കിടന്നു.

മരിച്ചവരുടെ മൃതദേഹങ്ങൾ നിലമ്പൂർ ജില്ല ആശുപത്രിയിലേക്ക് മാറ്റി. നിലമ്പൂർ ഡിവൈ.എസ്.പി റഫീക്കിന്റെ നേതൃത്വത്തിൽ കാളികാവ് പൂക്കോട്ടുംപാടം പോലീസ് ഇൻസ്പെക്ടർമാരായ വി മനോജ് കുമാർ, അബ്ദുൽ കരീം എന്നിവരുടെ നേതൃത്വത്തിലുള്ള സംഘവും ചക്കിക്കൊടി വനം ഡെപ്യൂട്ടി റെയിഞ്ചർ ദിവാകരനും സംഘവും നിലമ്പൂർ ഫയർഫോഴ്സും സ്ഥലത്ത് തെരച്ചിലിന് നേതൃത്വം നൽകുന്നു.

ഇന്നും ശക്തമായ മഴ

ആൻഡമാൻ കടലിൽ കഴിഞ്ഞദിവസം രൂപംകൊണ്ട ന്യൂനമർദ്ദത്തെ തുടർന്നാണ് കേരളത്തിൽ ഇന്നലെ മഴ ശക്തിപ്പെട്ടത്. ഇന്നും മഴ ലഭിക്കുമെന്നാണ് Metbeat Weather ൻ്റെ പ്രവചനം. രാവിലെ എറണാകുളം, കൊല്ലം, ആലപ്പുഴ ഉൾപ്പെടെയുള്ള ജില്ലകളിൽ മഴ സാധ്യതയുണ്ട്. രാവിലത്തെ ഉപഗ്രഹ നിരീക്ഷണത്തിൽ കടലിൽ ശക്തമായ മഴ പെയ്യുന്നുണ്ട്. ഉച്ചയ്ക്കുശേഷം ഇവ കരകയറാം. ഇതോടെ മധ്യ, തെക്കൻ കേരളത്തിലെ കൂടുതൽ ജില്ലകളിൽ മഴ ലഭിക്കും.

6 ജില്ലകളിൽ മഞ്ഞ അലർട്ട്

സംസ്ഥാനത്ത് മഴ ശക്തിപ്പെട്ടതിനെ തുടർന്ന് ആറ് ജില്ലകളില്‍ രാവിലെ yellow അലര്‍ട്ട് പ്രഖ്യാപിച്ചു. ഇന്നലെ രാത്രിയുള്ള കാലാവസ്ഥ വകുപ്പിന്റെ പ്രവചന പ്രകാരം ഇന്ന് എല്ലാ ജില്ലകളിലും പച്ച അലർട്ട് ആയിരുന്നു.പത്തനംതിട്ട , ആലപ്പുഴ, കോട്ടയം, എറണാകുളം, ഇടുക്കി, തൃശ്ശൂർ ജില്ലകളിലാണ് യെല്ലോ അലർട്ട് നൽകിയത്.

മഴയുടെ സാഹചര്യത്തിൽ ഓരോ മണിക്കൂറിലും സ്ഥിതിഗതികൾ വിലയിരുത്താന്‍ മുഖ്യമന്ത്രി വി.ഡി സതീശൻ നിര്‍ദേശം നല്‍കി.

ഇടുക്കിയിലും കോട്ടയത്തും നാലുപേർ മരിച്ചു

ഇന്നലെ കനത്ത മഴയെ തുടർന്ന് ഇടുക്കിയിലും കോട്ടയത്തും നാലു പേരാണ് മരിച്ചത്. വട്ടവടയിൽ കൃഷിയിടത്തിലെ ഷെഡിന് മുകളിലേക്ക് മണ്ണും പാറയും ഇടിഞ്ഞുവീണു രണ്ടുപേരും , കോട്ടയത്ത് സ്കൂട്ടറിനും വീടിനും മുകളിലേക്ക് മണ്ണിടിഞ്ഞ് വീണ് രണ്ടുപേരും ആണ് മരിച്ചത്.

വട്ടവടയിൽ കൊട്ടാക്കമ്പൂർ സ്വദേശികളായ ബാലകൃഷ്ണൻ (
47) ചിന്നു (38) എന്നിവരാണ് മരിച്ചത്. ബാലകൃഷ്ണന്റെ ഭാര്യ മാരിയമ്മയ്ക്ക് സാരമായി പരുക്കേറ്റു. ഇന്നലെ ഉച്ചയോടെ കനത്ത മഴയ്ക്കിടെയാണ് ബാലകൃഷ്ണന്റെ കൃഷിയിടത്തിലെ ഷെഡിന് മുകളിലേക്ക് മണ്ണും പാറയും ഇടിഞ്ഞു വീണത്. അവിടെ ഉണ്ടായിരുന്ന മൂന്നു പേരും മണ്ണിനടിയിൽപ്പെട്ടു. നാട്ടുകാർ രക്ഷാപ്രവർത്തനം നടത്തി പുറത്തെടുത്തെങ്കിലും ബാലകൃഷ്ണനെയും ചിന്നുവിന്റെയും ജീവൻ രക്ഷിക്കാനായില്ല.

ബാലകൃഷ്ണന്റെ കൃഷിയിടത്തിൽ ജോലിക്ക് എത്തിയതായിരുന്നു ചിന്നു. മൃതദേഹങ്ങൾ അടിമാലി താലൂക്ക് ആശുപത്രിയിലേക്ക് മാറ്റി. ബാലകൃഷ്ണന്റെ മക്കൾ : വിജയലക്ഷ്മി, രാഗേഷ് നന്ദിനി .
ചിന്നുവിന്റെ ഭർത്താവ് : ചിന്നമണി . മക്കൾ : വിഷ്ണു, മേഘ.

കോട്ടയത്ത് രണ്ടുപേരാണ് മണ്ണിടിഞ്ഞ് മരിച്ചത്. ചെന്നൈ ജവഹർ നഗർ സ്വദേശിനി സംഗീത അരുൺ ലാൽ (35), പൂഞ്ഞാർ തെക്കേക്കരയിൽ ഗൃഹനാഥൻ ജോസഫ് (80) എന്നിവരാണ് മരിച്ചത്. ഈരാറ്റുപേട്ട വാഗമൺ റൂട്ടിൽ തീക്കോയിക്ക് സമീപം വേലത്തു ശേരിയിൽ സ്കൂട്ടറിന് മുകളിലേക്ക് മണ്ണിടിഞ്ഞ് വീണാണ് സംഗീത മരിച്ചത്. തമിഴ്നാട്ടിൽ നിന്ന് വാടകയ്ക്ക് എടുത്ത സ്കൂട്ടറിൽ വാഗമൺ സന്ദർശിച്ച് മടങ്ങുന്നതിനിടെയായിരുന്നു അപകടം. കൂടെയുണ്ടായിരുന്ന യുവതി പരുക്കുകളോടെ രക്ഷപ്പെട്ടു.

പൂഞ്ഞാർ തെക്കേക്കരയിലെ പെരിങ്ങുളത്ത് വീടിനു മുകളിലേക്ക് മണ്ണിടിഞ്ഞ് വീടാണ് ജോസഫ് മരിച്ചത് . ഇന്നലെ രാത്രി ഏഴരയോടെ ആയിരുന്നു അപകടം. മക്കളായ ജിമ്മി, ഡെന്നിസ് എന്നിവരെ പരുക്കുകളോടെ ആശുപത്രിയിൽ പ്രവേശിപ്പിച്ചു.

English Summary : Heavy Rains Lash Kerala: 9 Dead, Flash Floods in Malappuram, High Alert Issued. Severe rainfall across Kerala has claimed nine lives, triggered flash floods, and caused widespread mudslides.