കുവൈത്തിൽ തണുപ്പ് കൂടും; വ്യാഴാഴ്ച്ച മുതൽ ‘അൽ സമാഖ്’ സീസൺ, നിരവധി പ്രത്യേകതകൾ

കുവൈത്തിൽ രാത്രികാലങ്ങളിൽ തണുപ്പ് വർധിക്കുമെന്ന് മുന്നറിയിപ്പ്. പരമ്പരാഗത വസ്മ് സീസണിന്റെ രണ്ടാംഘട്ടമായ ‘അൽ സമാഖ്’ ഒക്ടോബർ 29ന് ആരംഭിക്കുമെന്ന് അൽ ഉജൈരി സയന്റിഫിക് സെന്റർ അറിയിച്ചു. നവംബർ 10 വരെ നീളുന്ന ഈ ഘട്ടത്തിൽ രാത്രിയിലെ തണുപ്പ് വർധിക്കുന്നതിനൊപ്പം മഴയ്ക്കുള്ള സാധ്യതയും കൂടും.

സീസണിൻ്റെ പ്രത്യേകതകൾ

സൂര്യോദയത്തോടനുബന്ധിച്ച് ഈർപ്പമുള്ള കാറ്റ് അനുഭവപ്പെടുക, പ്രഭാതത്തിൽ വെള്ളത്തിന് തണുപ്പ് കൂടുക, രാത്രിയുടെ ദൈർഘ്യം വർധിക്കുക എന്നിവയാണ് ഈ കാലയളവിന്റെ പ്രത്യേകതകൾ. സൂര്യൻ നേരത്തേ അസ്തമിക്കുന്നതും വർഷത്തിലെ ഏറ്റവും നേരത്തെയുള്ള ഉച്ചനമസ്കാര സമയമെത്തുന്നതും ഈ ഘട്ടത്തിലാണ്. കൂടുതൽ ദേശാടന പക്ഷികൾ കുവൈത്തിലെത്തുന്നതും വസ്മ് സീസണിന്റെ പ്രത്യേകതയാണ്.

ആടുകളുടെ പ്രസവം വർധിക്കുന്നതും മഴയ്ക്കുള്ള സാധ്യത കൂടുന്നതും പരിഗണിച്ചാണ് കുവൈത്തിലെ പൂർവികർ ഈ കാലഘട്ടത്തെ തിരിച്ചറിഞ്ഞിരുന്നതെന്ന് അൽ ഉജൈരി സയന്റിഫിക് സെന്റർ വ്യക്തമാക്കി.

Cyclone Arnab Weather Alert: അർണബ് ചുഴലിക്കാറ്റ് ശക്തിപ്രാപിക്കുന്നു; നാളെ അതിതീവ്ര ചുഴലിക്കാറ്റാകും
ബംഗാൾ ഉൾക്കടലിൽ രൂപംകൊണ്ട ‘അർണബ്’ ചുഴലിക്കാറ്റ് അതിതീവ്ര ചുഴലിക്കാറ്റായി ശക്തിപ്രാപിക്കുമെന്ന് കേന്ദ്ര കാലാവസ്ഥാ വകുപ്പ്.
https://metbeatnews.com/imd-issues-warning-as-bay-of-bengal-storm-heads-toward-andhra-pradesh

അതേസമയം, ഒക്ടോബർ പകുതി പിന്നിട്ടിട്ടും മുൻവർഷങ്ങളിലേതിന് സമാനമായ തണുപ്പ് കുവൈത്തിൽ അനുഭവപ്പെട്ടു തുടങ്ങിയിട്ടില്ല. പകൽ സമയങ്ങളിൽ ചൂടുള്ള കാലാവസ്ഥയാണ് തുടരുന്നത്. തീരപ്രദേശങ്ങളിൽ താരതമ്യേന ഈർപ്പമുള്ള അന്തരീക്ഷവും അനുഭവപ്പെടുന്നുണ്ട്.

മഴയ്ക്ക് സാധ്യത

വ്യാഴാഴ്ച വരെ കാലാവസ്ഥ താരതമ്യേന ചൂടും ഈർപ്പവും നിറഞ്ഞതായിരിക്കുമെന്നാണ് പ്രവചനം. പകൽ താപനില 35 മുതൽ 36 ഡിഗ്രി സെൽഷ്യസ് വരെയും രാത്രിയിൽ 21 മുതൽ 23 ഡിഗ്രി സെൽഷ്യസ് വരെയും രേഖപ്പെടുത്തും. തിങ്കളാഴ്ച ഒറ്റപ്പെട്ട നേരിയ മഴയ്ക്കും സാധ്യതയുണ്ട്.

English Summary : Kuwait is preparing for a drop in nighttime temperatures as the 'Al Samaq' season—the second phase of the traditional Wasm period—officially begins on October 29, according to the Al Ujeiri Scientific Center. Running through November 10, this phase marks a transition toward colder nights and an increased likelihood of rainfall across the region.