കേരളത്തിൽ ശക്തമായ കാറ്റിന് സാധ്യത; ജാഗ്രത പാലിക്കണമെന്ന് മുന്നറിയിപ്പ്

കേരളത്തിൽ ഇന്ന് (ഓഗസ്റ്റ് 14) ഒറ്റപ്പെട്ടയിടങ്ങളിൽ മണിക്കൂറിൽ 30 മുതൽ 40 കിലോമീറ്റർ വരെ വേഗതയിൽ ശക്തമായ കാറ്റിന് സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു. കാറ്റ് ശക്തമാകുന്ന സാഹചര്യത്തിൽ അപകടങ്ങൾ ഒഴിവാക്കാൻ പൊതുജനങ്ങൾ ജാഗ്രത പാലിക്കണമെന്ന് അധികൃതർ നിർദേശിച്ചു.

ശക്തമായ കാറ്റ് കേരളത്തിൽ നാശനഷ്ടങ്ങൾക്കും ജീവഹാനിക്കും കാരണമാകുന്ന പ്രധാന സംസ്ഥാന സവിശേഷ ദുരന്തങ്ങളിലൊന്നാണ്. കാറ്റിലും മഴയിലും മരങ്ങൾ കടപുഴകാനും ചില്ലകൾ ഒടിഞ്ഞുവീഴാനും സാധ്യതയുള്ളതിനാൽ മരങ്ങളുടെ ചുവട്ടിൽ നിൽക്കുകയോ അവിടെ വാഹനങ്ങൾ പാർക്ക് ചെയ്യുകയോ ചെയ്യരുത്.

Deep Depression System Active: തീവ്ര ന്യൂനമർദം; കേരളത്തിലും അടുത്ത ദിവസങ്ങളിൽ മഴയ്ക്ക് സാധ്യത, ഇന്ന് കൂടുതൽ ജാഗ്രത
ജാർഖണ്ഡിനും ഗംഗാതീര പശ്ചിമ ബംഗാളിനും മുകളിൽ തീവ്ര ന്യൂനമർദം (Depression) തുടരുന്നതായി കേന്ദ്ര കാലാവസ്ഥ വകുപ്പ് അറിയിച്ചു.
https://metbeatnews.com/imd-predicts-heavy-rainfall-as-deep-depression-forms-over-west-bengal

വീട്ടുവളപ്പിലെ അപകടകരമായ മരച്ചില്ലകൾ വെട്ടിയൊതുക്കണം. പൊതുസ്ഥലങ്ങളിൽ അപകടാവസ്ഥയിലുള്ള മരങ്ങൾ ശ്രദ്ധയിൽപ്പെട്ടാൽ ബന്ധപ്പെട്ട തദ്ദേശ സ്ഥാപനങ്ങളെ വിവരം അറിയിക്കണം. ഉറപ്പില്ലാത്ത പരസ്യബോർഡുകൾ, കൊടിമരങ്ങൾ, ഇലക്ട്രിക് പോസ്റ്റുകൾ തുടങ്ങിയവ കാറ്റിൽ വീഴാൻ സാധ്യതയുള്ളതിനാൽ കാറ്റും മഴയും ഇല്ലാത്ത സമയത്ത് അവ ബലപ്പെടുത്തുകയോ സുരക്ഷിതമായി അഴിച്ചുമാറ്റുകയോ വേണം.

ഓലമേഞ്ഞതോ ഷീറ്റ് പാകിയതോ അടച്ചുറപ്പില്ലാത്തതോ ആയ വീടുകളിൽ താമസിക്കുന്നവർ മുന്നറിയിപ്പ് ലഭിക്കുന്ന ഘട്ടങ്ങളിൽ അധികൃതരുടെ നിർദേശപ്രകാരം സുരക്ഷിതമായ കെട്ടിടങ്ങളിലേക്ക് മാറണം. ആവശ്യമായ സാഹചര്യത്തിൽ ഇവരെ ദുരിതാശ്വാസ ക്യാമ്പുകളിലേക്ക് മാറ്റാൻ തദ്ദേശ സ്ഥാപനങ്ങളും റവന്യൂ ഉദ്യോഗസ്ഥരും ജനപ്രതിനിധികളും നടപടി സ്വീകരിക്കണമെന്നും നിർദേശിച്ചു.

വൈദ്യുതി അപകടങ്ങളിൽ ജാഗ്രത

കാറ്റും മഴയും ശക്തമാകുമ്പോൾ വൈദ്യുതി കമ്പികളും പോസ്റ്റുകളും പൊട്ടിവീഴാനുള്ള സാധ്യതയുണ്ട്. ഇത്തരം അപകടങ്ങൾ ശ്രദ്ധയിൽപ്പെട്ടാൽ ഉടൻ KSEBയുടെ 1912 എന്ന കൺട്രോൾ റൂമിലോ 1077 എന്ന ജില്ലാ ദുരന്തനിവാരണ അതോറിറ്റിയുടെ കൺട്രോൾ റൂമിലോ വിവരം അറിയിക്കണം.

കാറ്റ് തുടരുന്ന സമയത്ത് വൈദ്യുതി തകരാറുകൾ പരിഹരിക്കാൻ സ്വയം ശ്രമിക്കരുത്. കാറ്റും മഴയും അവസാനിച്ച ശേഷം മാത്രമേ അറ്റകുറ്റപ്പണികൾ നടത്താവൂ. പൊതുജനങ്ങൾ നേരിട്ട് വൈദ്യുതി ലൈനുകളിലോ പോസ്റ്റുകളിലോ അറ്റകുറ്റപ്പണി നടത്തരുതെന്നും KSEB ജീവനക്കാരുമായി സഹകരിക്കണമെന്നും നിർദേശമുണ്ട്.

പത്രം, പാൽ തുടങ്ങിയവ വിതരണം ചെയ്യുന്നതിനായി അതിരാവിലെ യാത്ര ചെയ്യുന്നവരും പ്രത്യേക ജാഗ്രത പാലിക്കണം. വെള്ളക്കെട്ടുകളുള്ള പ്രദേശങ്ങളിലൂടെ പോകുമ്പോൾ വൈദ്യുതി ലൈനുകൾ പൊട്ടിവീണിട്ടുണ്ടോയെന്ന് ശ്രദ്ധിക്കണം. നിർമാണ തൊഴിലാളികൾ കാറ്റും മഴയും ശക്തമാകുന്ന സാഹചര്യത്തിൽ ജോലികൾ നിർത്തിവച്ച് സുരക്ഷിതമായ സ്ഥലത്തേക്ക് മാറിനിൽക്കണമെന്നും അധികൃതർ മുന്നറിയിപ്പ് നൽകി.

English Summary : The India Meteorological Department (IMD) has issued a warning for strong winds reaching speeds of 30 to 40 km/h across isolated places in Kerala on August 14.