കർഷകർക്ക് കൃത്യമായ കാലാവസ്ഥാ പ്രവചനം; എഐ സാങ്കേതികവിദ്യയുമായി യുഎഇയുടെ ആഗോള പദ്ധതി

ആഫ്രിക്ക, ഏഷ്യ, ലാറ്റിനമേരിക്ക തുടങ്ങിയ മേഖലകളിലെ കർഷകർക്ക് കൂടുതൽ കൃത്യമായ കാലാവസ്ഥാ പ്രവചനങ്ങൾ ലഭ്യമാക്കുന്നതിനുള്ള ആഗോള പദ്ധതിയുമായി യുഎഇ. എഐ ഉപയോഗിച്ചുള്ള കാലാവസ്ഥാ പ്രവചന സാങ്കേതികവിദ്യ കൃഷിമേഖലയിൽ പ്രയോജനപ്പെടുത്തുന്നതിനുള്ള പ്രത്യേക പരിശീലന പരിപാടിക്ക് അബുദാബിയിൽ തുടക്കമായി. 15 രാജ്യങ്ങളിൽ നിന്നുള്ള സർക്കാർ പ്രതിനിധികളാണ് അഞ്ചുദിവസത്തെ പരിശീലന പരിപാടിയിൽ പങ്കെടുക്കുന്നത്.

Photo: UAE Presidential Court

ഇന്ന് സമാപനം

നവംബർ 9 മുതൽ ആരംഭിച്ച പരിപാടി ഇന്ന് സമാപിക്കും. യുഎഇ പ്രസിഡൻഷ്യൽ കോർട്ടിലെ ഇന്റർനാഷണൽ അഫയേഴ്സ് ഓഫീസിന്റെ നേതൃത്വത്തിലാണ് പരിപാടി സംഘടിപ്പിക്കുന്നത്. മുഹമ്മദ് ബിൻ സായിദ് യൂണിവേഴ്സിറ്റി ഓഫ് ആർട്ടിഫിഷ്യൽ ഇന്റലിജൻസും (MBZUAI) ചിക്കാഗോ സർവകലാശാലയും സംയുക്തമായി സംഘടിപ്പിക്കുന്ന പരിപാടിയിൽ അഗ്രികൾച്ചറൽ ഇന്നൊവേഷൻ മെക്കാനിസം ഫോർ സ്കെയിൽ (AIM for Scale), ദേശീയ കാലാവസ്ഥാ നിരീക്ഷണ കേന്ദ്രം (NCM) എന്നിവയും സഹകരിക്കുന്നുണ്ട്.

കാലാവസ്ഥാ പ്രവചനരംഗത്ത് ആർട്ടിഫിഷ്യൽ ഇന്റലിജൻസ് വലിയ മാറ്റങ്ങൾ സൃഷ്ടിക്കുകയാണെന്ന് ലോക കാലാവസ്ഥാ സംഘടന (WMO) പ്രസിഡന്റ് കൂടിയായ ദേശീയ കാലാവസ്ഥാ നിരീക്ഷണ കേന്ദ്രം ഡയറക്ടർ ജനറൽ ഡോ. അബ്ദുല്ല അഹമ്മദ് അൽ മന്ദൂസ് പറഞ്ഞു. കാലാവസ്ഥയെയും കാലാവസ്ഥാ വ്യതിയാനത്തെയും ഏറെ ആശ്രയിക്കുന്ന കൃഷിപോലുള്ള മേഖലകൾക്ക് കൂടുതൽ കൃത്യവും സമയബന്ധിതവും പ്രായോഗികവുമായ വിവരങ്ങൾ ലഭ്യമാക്കാൻ എഐ സാങ്കേതികവിദ്യ സഹായിക്കുമെന്നും അദ്ദേഹം വ്യക്തമാക്കി.

2028 ഓടെ 30 രാജ്യങ്ങളിൽ

2025-ൽ ബംഗ്ലാദേശ്, ചിലി, എത്യോപ്യ, കെനിയ, നൈജീരിയ എന്നീ രാജ്യങ്ങളെ ഉൾപ്പെടുത്തി നടത്തിയ ആദ്യഘട്ട പരിശീലനത്തിന്റെ തുടർച്ചയായാണ് ഇത്തവണത്തെ പരിപാടി. ബൊളീവിയ, കൊളംബിയ, ഇന്തോനേഷ്യ, പാകിസ്താൻ, പെറു, ഫിലിപ്പീൻസ്, റുവാണ്ട, സെനഗൽ, സിയറ ലിയോൺ, യുഎഇ എന്നിവയാണ് ഇത്തവണ പുതുതായി പങ്കുചേരുന്ന രാജ്യങ്ങൾ. 2028-ഓടെ 30 രാജ്യങ്ങളിൽ ഈ സാങ്കേതികവിദ്യയുടെ ഉപയോഗത്തിനാവശ്യമായ ശേഷി വികസിപ്പിക്കുകയാണ് ലക്ഷ്യം.

എഐ സാങ്കേതികവിദ്യയുടെ യഥാർഥ മൂല്യം ശാസ്ത്രീയ കണ്ടുപിടിത്തങ്ങളെ കർഷകരുടെ ജീവിതത്തിൽ പ്രായോഗിക മാറ്റമുണ്ടാക്കുന്ന പരിഹാരങ്ങളാക്കി മാറ്റുന്നതിലാണെന്ന് യുഎഇ പ്രസിഡൻഷ്യൽ കോർട്ടിലെ ഇന്റർനാഷണൽ അഫയേഴ്സ് ഓഫീസിലെ മേധാവി ഫാത്തിമ അൽ മുല്ല പറഞ്ഞു.

പരിശീലനം രണ്ട് ഘട്ടങ്ങളിലായി

രണ്ട് പ്രധാന മേഖലകളിലാണ് പരിശീലനം. എഐ അധിഷ്ഠിത കാലാവസ്ഥാ പ്രവചന മാതൃകകൾ വികസിപ്പിക്കുകയും അവയുടെ കൃത്യത വിലയിരുത്തുകയും ചെയ്യുന്നതാണ് ആദ്യഘട്ടം. പ്രവചന വിവരങ്ങൾ കൃഷിയുമായി ബന്ധപ്പെട്ട നിർദേശങ്ങളാക്കി മാറ്റുകയും അതിതീവ്ര കാലാവസ്ഥാ പ്രതിഭാസങ്ങളെ നേരിടാൻ കർഷകരെ സജ്ജരാക്കുകയും ചെയ്യുന്നതാണ് രണ്ടാമത്തെ ഘട്ടം. പരിശീലനത്തിനു ശേഷം ഓരോ രാജ്യത്തെയും പ്രതിനിധികൾക്ക് സ്വന്തം രാജ്യത്തെ കാലാവസ്ഥാ സേവനങ്ങളിൽ എഐ സാങ്കേതികവിദ്യ ഉൾപ്പെടുത്തുന്നതിനുള്ള പ്രാഥമിക കർമപദ്ധതി തയ്യാറാക്കാനാകും.

ലക്ഷ്യം; 10 കോടി കർഷകരിലേക്ക് Al സാങ്കേതിക വിദ്യ എത്തിക്കുക

2025 ഡിസംബറിൽ ആരംഭിച്ച അബുദാബി എഐ ഇക്കോസിസ്റ്റം ഫോർ ഗ്ലോബൽ അഗ്രികൾച്ചറൽ ഡെവലപ്മെന്റ് പദ്ധതിയുടെ ഭാഗമായാണ് പരിശീലനം. കോപ്28 ഉച്ചകോടിക്കിടെ യുഎഇയും ഗേറ്റ്സ് ഫൗണ്ടേഷനും പ്രഖ്യാപിച്ച 200 ദശലക്ഷം യുഎസ് ഡോളറിന്റെ പങ്കാളിത്തമാണ് പദ്ധതിയുടെ അടിസ്ഥാനം. 2030-ഓടെ ലോകമെമ്പാടുമുള്ള 10 കോടി ചെറുകിട കർഷകരിലേക്ക് എഐ അധിഷ്ഠിത കാലാവസ്ഥാ വിവരങ്ങൾ എത്തിക്കുകയാണ് വിപുലമായ ലക്ഷ്യം.

പരിശീലനത്തിൽ പങ്കെടുക്കുന്ന രാജ്യങ്ങളിലെ സർക്കാർ സ്ഥാപനങ്ങൾക്ക് തുടർന്നും സാങ്കേതിക പ്രവർത്തനങ്ങൾ നടത്തുന്നതിനായി എൻവിഡിയ 14 ഡെൽ പ്രോ മാക്സ് ജിബി10 വർക്ക്‌സ്റ്റേഷനുകൾ സംഭാവന ചെയ്തിട്ടുണ്ട്.

കാലാവസ്ഥാ പ്രവചനരംഗത്ത് എഐ വലിയ സാധ്യതകൾ തുറക്കുന്നുണ്ടെങ്കിലും ഈ മുന്നേറ്റങ്ങൾ കർഷകരുടെ ജീവിതത്തിൽ എത്രത്തോളം പ്രയോജനപ്പെടുന്നു എന്നതാണ് വിജയത്തിന്റെ യഥാർഥ അളവുകോലെന്ന് AIM for Scale എക്സിക്യൂട്ടീവ് ഡയറക്ടറും നോട്രെ ഡാം സർവകലാശാല പ്രൊഫസറുമായ പോൾ വിന്റേഴ്സ് പറഞ്ഞു.

English Summary : The United Arab Emirates (UAE) has concluded a five-day international training program in Abu Dhabi designed to equip 15 nations across Asia, Africa, and Latin America with Artificial Intelligence (AI) weather forecasting capabilities for the agricultural sector.