കോഴിക്കോട്ട് മഴയുടെ സ്വഭാവം മാറുന്നു; മഴ കുറയുമ്പോഴും അതിതീവ്രമഴ കൂടും

കാലാവസ്ഥാ വ്യതിയാനത്തിന്റെ പശ്ചാത്തലത്തിൽ കോഴിക്കോട്ടെ മഴയുടെ സ്വഭാവത്തിൽ വലിയ മാറ്റങ്ങൾ സംഭവിക്കുന്നതായി പുതിയ പഠനം പറയുന്നു. വാർഷിക മഴയുടെ ആകെ അളവിൽ കുറവുണ്ടാകുമ്പോഴും കുറഞ്ഞ സമയത്തിനുള്ളിൽ ലഭിക്കുന്ന അതിതീവ്രമഴ ശക്തമാകുന്നതായാണ് കണ്ടെത്തൽ. വടക്കൻ കേരളത്തിലെ കനത്ത മഴ ലഭിക്കുന്ന കോഴിക്കോട് ജില്ലയിലെ ഒമ്പത് മഴമാപിനി കേന്ദ്രങ്ങളിലെ 1986 മുതൽ 2022 വരെയുള്ള 37 വർഷത്തെ മഴവിവരങ്ങൾ വിശകലനം ചെയ്താണ് പഠനം നടത്തിയത്.

പഠനത്തിൽ RX1day, RX5day, R95p, R99p ഉൾപ്പെടെയുള്ള 13 അതിതീവ്രമഴാ സൂചികകളാണ് പരിശോധിച്ചത്. ഒറ്റ ദിവസത്തിലും അഞ്ച് ദിവസത്തിലും ലഭിക്കുന്ന പരമാവധി മഴയുടെ തീവ്രത പല കേന്ദ്രങ്ങളിലും ഉയരുന്നതായി കണ്ടെത്തി. അതോടൊപ്പം ശക്തമായ മഴ ലഭിക്കുന്ന ദിവസങ്ങളുടെ എണ്ണത്തിലും വർധനയുണ്ട്.

Kerala Weather : അറബിക്കടലിൽ ചക്രവാതച്ചുഴി; കേരളത്തിൽ അഞ്ച് ദിവസം മഴ
സംസ്ഥാനത്ത് അടുത്ത അഞ്ച് ദിവസവും മഴയ്ക്ക് സാധ്യതയെന്ന് കേന്ദ്ര കാലാവസ്ഥ വകുപ്പ്.
https://metbeatnews.com/cyclonic-circulation-triggers-5-day-rain-alert

ആകെ മഴയുടെ അളവിൽ വലിയ മാറ്റമില്ലെന്ന് തോന്നുമ്പോഴും കുറഞ്ഞ സമയത്തിനുള്ളിൽ വലിയ തോതിൽ മഴ ലഭിക്കുന്ന സാഹചര്യം വർധിക്കുകയാണ്. പ്രത്യേകിച്ച് ജില്ലയുടെ 80 ശതമാനം പ്രദേശങ്ങളിലും വളരെ ശക്തമായ മഴ ലഭിക്കുന്ന ദിവസങ്ങളുടെ എണ്ണത്തിൽ ഗണ്യമായ വർധന രേഖപ്പെടുത്തി.

ജൂൺ–ജൂലൈ മഴ കുറയും; ഓഗസ്റ്റ്–സെപ്റ്റംബർ ശക്തമാകും

കോഴിക്കോട്ടെ കാലവർഷത്തിന്റെ സമയക്രമത്തിലും മാറ്റം കാണാം. സാധാരണ കാലവർഷത്തിന്റെ ആദ്യഘട്ടമായ ജൂൺ–ജൂലൈ മാസങ്ങളിൽ മഴ കുറയുകയും ഓഗസ്റ്റ്–സെപ്റ്റംബർ മാസങ്ങളിൽ മഴ കൂടുതൽ ശക്തമാകുകയും ചെയ്യുന്നതായാണ് പഠനം പറയുന്നത്. അതായത്, കാലവർഷത്തിന്റെ ഏറ്റവും സജീവമായ ഘട്ടം മുൻകാലത്തേക്കാൾ രണ്ട് മുതൽ മൂന്ന് മാസം വരെ പിന്നിലേക്ക് നീങ്ങുന്ന പ്രവണതയാണ് കാണുന്നത്.

മലയോര മേഖലയിൽ അപകടസാധ്യത കൂടുതൽ

കോഴിക്കോട്ടെ മലയോര ഉപജില്ലകളിലാണ് അതിതീവ്രമഴയുടെ ആഘാതം കൂടുതൽ പ്രകടമാകുന്നത്. മൂന്ന് ദിവസത്തിനിടെ പ്രതിദിനം 60 മില്ലിമീറ്ററിലധികം മഴയും ആകെ 100 മില്ലിമീറ്ററിലധികം മഴയും ലഭിക്കുന്ന സംഭവങ്ങൾ വർധിക്കുന്നതായി പഠനം ചൂണ്ടിക്കാട്ടുന്നു. ഇത്തരം മഴ മണ്ണിടിച്ചിൽ, ഉരുൾപൊട്ടൽ, മിന്നൽപ്രളയം (Flash Flood) തുടങ്ങിയ ദുരന്തങ്ങളുടെ സാധ്യത വർധിപ്പിക്കുമെന്നാണ് വിലയിരുത്തൽ.

ഭാവിയിലും മഴ കുറയും; തീവ്രമഴ കൂടും

കാലാവസ്ഥാ മാതൃകകളായ CMIP6 അടിസ്ഥാനമാക്കിയുള്ള ഭാവി പ്രവചനങ്ങളും പഠനത്തിന്റെ ആശങ്ക വർധിപ്പിക്കുന്നതാണ്. 2021–2050 കാലയളവിൽ കോഴിക്കോട് ജില്ലയിലെ വിവിധ കേന്ദ്രങ്ങളിൽ വാർഷിക മഴയുടെ അളവ് ചരിത്ര ശരാശരിയെ അപേക്ഷിച്ച് ഏകദേശം 30 മുതൽ 50 ശതമാനം വരെ കുറയാൻ സാധ്യതയുണ്ടെന്നാണ് വിവിധ കാലാവസ്ഥാ മാതൃകകളുടെ വിലയിരുത്തൽ.

എന്നാൽ ആകെ മഴ കുറയുമ്പോഴും അതിതീവ്രമഴയുടെ തീവ്രത വർധിക്കുമെന്നാണ് പ്രവചനം.
അതായത്, മഴ കുറയും പക്ഷേ പെയ്യുമ്പോൾ കൂടുതൽ ശക്തമായി പെയ്യും. കാലാവസ്ഥാ വ്യതിയാനത്തിന്റെ പശ്ചാത്തലത്തിൽ കേരളം നേരിടാൻ പോകുന്ന വലിയ വെല്ലുവിളികളിലൊന്നാണ് ഈ വിരോധാഭാസമെന്ന് പഠനം വ്യക്തമാക്കുന്നു.

പശ്ചിമഘട്ടവും അറബിക്കടലും

കോഴിക്കോട്ടെ മഴയുടെ മാറ്റങ്ങളിൽ പശ്ചിമഘട്ടത്തിന്റെ ഭൂപ്രകൃതിയും അറബിക്കടലുമായുള്ള ഇടപെടലുകളും നിർണായക സ്വാധീനം ചെലുത്തുന്നതായും പഠനം ചൂണ്ടിക്കാട്ടുന്നു. മലയോര മേഖലകളിലെ ഉയർന്ന പ്രദേശങ്ങളും തീരപ്രദേശങ്ങളും തമ്മിൽ മഴയുടെ സ്വഭാവത്തിൽ വലിയ പ്രാദേശിക വ്യത്യാസങ്ങളും കണ്ടെത്തിയിട്ടുണ്ട്.

37 വർഷത്തെ ദീർഘകാല മഴവിവരങ്ങളുടെ അടിസ്ഥാനത്തിലുള്ള പഠനം, വാർഷിക മഴയുടെ അളവ് മാത്രം നോക്കി കാലാവസ്ഥാ അപകടസാധ്യത വിലയിരുത്തുന്നത് മതിയാകില്ലെന്നും, കുറഞ്ഞ സമയത്തിനുള്ളിലെ മഴയുടെ തീവ്രത കൂടി കണക്കിലെടുക്കണമെന്നും വ്യക്തമാക്കുന്നു.

കാലാവസ്ഥാ വ്യതിയാനത്തെ നേരിടാനുള്ള കേരളത്തിന്റെ ദുരന്തനിവാരണ, നഗരാസൂത്രണ, മലയോര സംരക്ഷണ പദ്ധതികളിൽ ഇത്തരം പ്രാദേശിക മഴ പ്രവണതകൾ ഉൾപ്പെടുത്തേണ്ടതിന്റെ ആവശ്യകതയും പഠനം മുന്നോട്ടുവയ്ക്കുന്നു.

English Summary : A recent 37-year scientific study (1986–2022) reveals a major shift in Kozhikode's monsoon patterns due to climate change. While total annual rainfall is projected to drop by 30% to 50% between 2021 and 2050, the frequency of extreme, short-duration downpours is surging.