ചരിത്രത്തിലെ ഏറ്റവും വലിയ വേനലിനെ കാത്ത് ബംഗ്ലുളൂരു നഗരം

ഐഎംഡി(India Meteorological Department) പുറത്തുവിട്ട മുന്നറിയിപ്പുകൾ പ്രകാരം, ബംഗ്ലുളൂരുവിൽ മാർച്ച് 1 മുതൽ ഔദ്യോഗികമായി വേനൽക്കാലം ആരംഭിച്ചു. ഇത്തവണ നഗരത്തിന് കഠിനമായ വേനൽ അനുഭവപ്പെടാൻ സാധ്യതയുണ്ടെന്നാണ് കാലാവസ്ഥാ വിദഗ്ധരുടെ വിലയിരുത്തൽ.

നഗരത്തിൻ്റെ ഇതുവരെയുള്ള കാലാവസ്ഥാ ചരിത്രം പരിശോധിക്കുമ്പോൾ, മെയ് മാസത്തിലെ എക്കാലത്തെയും ഉയർന്ന താപനില 1931-ൽ രേഖപ്പെടുത്തിയ 38.9°C ആണ്. 2016 ഏപ്രിലിൽ 39.2°C വരെ ഉയർന്നിരുന്നു. ഈ വർഷം താപനില വീണ്ടും 39°C എത്താമെന്നാണ് ഐഎംഡി ഡാറ്റ സൂചിപ്പിക്കുന്നത്.

ഫെബ്രുവരിയിലെ കണക്ക് നോക്കുമ്പോൾ ശരാശരി ഉയർന്ന താപനില 30.1°C ആയിരുന്നു. പിന്നീട് അത് 31.7°C വരെ ഉയർന്നെങ്കിലും, സാധാരണയേക്കാൾ ഏകദേശം 1.1°C കുറവായിരുന്നു. എന്നാൽ ഈ സ്ഥിതി നീണ്ടുനിൽക്കില്ലെന്നാണ് സൂചന. മാർച്ച് ആദ്യ ആഴ്ചയോടെ തന്നെ പകൽ താപനില 34°C കവിഞ്ഞേക്കാമെന്നാണ് പ്രവചനം.

ഇതിനിടെ, കർണാടക സംസ്ഥാനത്തുടനീളം പരമാവധി താപനില സാധാരണയിൽക്കാൾ കൂടുതലാകാമെന്ന് ഐഎംഡി അറിയിച്ചു. വടക്കൻ ഉൾനാടൻ ജില്ലകളായ ബാഗൽകോട്ട്, കൊപ്പൽ, ബെലഗാവി എന്നിവിടങ്ങളിൽ ഉഷ്ണതരംഗ സാധ്യത കൂടുതലാണ്. മൈസൂരു, ദാവൻഗരെ തുടങ്ങിയ തെക്കൻ ഉൾനാടൻ പ്രദേശങ്ങളിലും ഉയർന്ന ചൂട് അനുഭവപ്പെടാൻ സാധ്യതയുണ്ട്.

തീരദേശ മേഖലകളായ ദക്ഷിണ കന്നഡ, ഉഡുപ്പി, ഉത്തര കന്നഡ ജില്ലകളിൽ ഉയർന്ന ആർദ്രത മൂലം താപനില 37°C മുതൽ 39°C വരെ ഉയരാനിടയുണ്ട്. എന്നാൽ, ഔദ്യോഗിക ഉഷ്ണതരംഗ മുന്നറിയിപ്പ് ഇതുവരെ പുറപ്പെടുവിച്ചിട്ടില്ല.

നിർദ്ദേശങ്ങളുമായി അധികൃതർ

ഉച്ചയ്ക്ക് 11 മുതൽ 3 വരെ നേരിട്ട് സൂര്യപ്രകാശം ഒഴിവാക്കുകയും കൂടുതൽ വെള്ളം കുടിക്കുകയും ചെയ്യുന്നത് നല്ലതാണ്. ആരോഗ്യപരമായ മുൻകരുതലുകൾ സ്വീകരിക്കുക, ശരീരത്തിൽ ജലാംശം നിലനിർത്തുക, ഉച്ചയോടെ നേരിട്ട് സൂര്യപ്രകാശം ഒഴിവാക്കുക തുടങ്ങിയ നിർദ്ദേശങ്ങളാണ് അധികൃതർ നൽകുന്നത്.

വൈകുന്നേര മഴ

പകൽ ചൂട് ഉയരുമ്പോൾ ചില പ്രദേശങ്ങളിൽ വൈകുനേരങ്ങളിൽ അപ്രതീക്ഷിതമായി ഇടിയോടുകൂടിയ മഴ പ്രതീക്ഷിക്കാം.

English Summary : Bengaluru is officially entering what could be one of its harshest summers on record, according to the India Meteorological Department (IMD). With the season kicking off on March 1st, experts predict the mercury could climb to 39°C, nearing the city's all-time historical highs.