അതി തീവ്ര ന്യൂനമർദ്ദം തീരത്തുനിന്ന് 100 കി.മി അകലെ , ഇന്ന് രാത്രി കരകയറും, മഴമേഘങ്ങൾ കേരളത്തിൽ എത്തും

മധ്യ പടിഞ്ഞാറ് വടക്കുപടിഞ്ഞാറ് ബംഗാള്‍ ഉള്‍ക്കടലിനോട് ചേര്‍ന്ന് സ്ഥിതി ചെയ്യുന്ന അതിതീവ്രന്യൂനമര്‍ദം (Deep Depression) ഇന്ന് രാത്രിയോടെ കരകയറും. നിലവില്‍ ഇന്ത്യൻ തീരത്തു നിന്ന് 100 കിലോമീറ്റർ അകലെയാണ് സിസ്റ്റം സ്ഥിതി ചെയ്യുന്നത്. ഇന്ന് രാത്രിയോടെ കലിംഗ പട്ടണത്തിനും ഗോപാൽപുരത്തിനും ഇടയിലൂടെ ന്യൂനമർദ്ദം കരകയറും.

ആന്ധ്രാപ്രദേശിലെ കലിംഗപട്ടണത്തിനും കിഴക്കു തെക്കുകിഴക്കു 100 കി.മി ഉം ഒഡിഷയിലെ ഗോപാല്‍പൂരില്‍ നിന്ന് 150 കി.മിഉം ഒഡിഷയിലെ പുരിയില്‍ നിന്ന് 220 കി.മി ഉം ആന്ധ്രാപ്രദേശിലെ വിശാഖപട്ടണത്തു നിന്ന് 180 കി.മി ഉം അകലെയാണ് അതിതീവ്ര ന്യൂനമർദ്ദം സ്ഥിതി ചെയ്യുന്നത്.

കേരളത്തിനു മുകളിൽ ന്യൂനമർദ്ദ പാത്തി

അതോടൊപ്പം തെക്കുകിഴക്കന്‍ അറബിക്കടലില്‍ നിന്ന് മധ്യ കേരളത്തിനു മുകളിലൂടെ അതിതീവ്ര ന്യൂനമര്‍ദത്തിലേക്ക് ന്യൂനമര്‍ദപാത്തി (ട്രഫ്) കടന്നുപോകുന്നുണ്ട്. കര്‍ണാടക, തീരദേശ ആന്ധ്രാപ്രദേശ് വഴിയാണ് ഇത് അതിതീവ്ര ന്യൂനമര്‍ദത്തിലേക്ക് ബന്ധിക്കപ്പെടുന്നത്. സമുദ്രനിരപ്പില്‍ നിന്ന് 3.1, 7.6 കി.മി ഉയരങ്ങളിലാണ് ന്യൂനമര്‍ദ പാത്തികള്‍ കടന്നു പോകുന്നത്.

മഴ മേഘങ്ങൾ കേരളത്തിൽ

ന്യൂനമർദ്ദത്തിന്റെ ഭാഗമായി ബംഗാൾ ഉൾകടലിൽ നിന്ന് കരകയറിയ മേഘങ്ങൾ തമിഴ്നാട്ടിലും ആന്ധ്രപ്രദേശിലും ഒഡീഷയിലും ഛത്തീസ്ഗഡിലും കർണാടകയിലും എത്തി. ഈ മേഘങ്ങൾ കേരളത്തിൻ്റെ വടക്കൻ ജില്ലകളിലെ കിഴക്കൻ മേഖലകളിലേക്കും എത്തും. പടിഞ്ഞാറൻ അറബിക്കടലിൽ നിന്ന് ഉച്ചയ്ക്കുശേഷം കാറ്റ് അനുകൂലമായാൽ കിഴക്കൻ മേഖലകളിൽ ഇന്ന് മഴ ലഭിക്കും.

അറബിക്കടലിൽ കഴിഞ്ഞ 12മണിക്കൂറായി മേഘ രൂപീകരണം കുറവാണ്. ന്യൂനമർദ്ദം കരയിലേക്ക് അടുക്കുന്നതോടെ പടിഞ്ഞാറൻ അറബിക്കടലിലെ കാറ്റിന്റെ പാറ്റേണിലും വ്യത്യാസം വരും. ഇതനുസരിച്ച് കേരളത്തിൽ മഴ ലഭിക്കുന്ന പ്രദേശങ്ങളിലും മാറ്റം വരും. തുടർച്ചയായ ശക്തമായ മഴക്കുള്ള സാധ്യത ഇപ്പോഴും കുറവാണ്.

കേരളത്തിൽ ഇന്ന് ഏഴു ജില്ലകളില്‍ യെല്ലോ അലര്‍ട്ട് നല്‍കിയിട്ടുണ്ട്. തിരുവനന്തപുരം, കൊല്ലം, പത്തനംതിട്ട, കോട്ടയം, ഇടുക്കി, കണ്ണൂര്‍, കാസര്‍കോട് ജില്ലകളിലാണ് നാളെ മഞ്ഞ അലര്‍ട്ടുള്ളത്.

മത്സ്യത്തൊഴിലാളികള്‍ കടലില്‍ പോകരുത്

കേരള കര്‍ണാടക ലക്ഷദ്വീപ് തീരങ്ങളില്‍ 23/09/2026 & 24/09/2026 തീയതികളില്‍ മത്സ്യബന്ധനത്തിന് പോകാന്‍ പാടില്ലെന്ന് കേന്ദ്ര കാലാവസ്ഥ വകുപ്പ് അറിയിച്ചു.

23/09/2026 & 24/09/2026: കേരള കര്‍ണാടക ലക്ഷദ്വീപ് തീരങ്ങളില്‍ മണിക്കൂറില്‍ 35 മുതല്‍ 45 കിലോമീറ്റര്‍ വരെയും ചില അവസരങ്ങളില്‍ മണിക്കൂറില്‍ 55 കിലോമീറ്റര്‍ വരെയും വേഗതയില്‍ ശക്തമായ കാറ്റിനും മോശം കാലാവസ്ഥയ്ക്കും സാധ്യത.

English Summary : A Deep Depression located in the Westcentral and adjoining Northwest Bay of Bengal approximately 100 km off the Indian coast is expected to cross the coast tonight between Kalingapatnam (Andhra Pradesh) and Gopalpur (Odisha).