കനത്തമഴയിൽ ഓട്ടോറിക്ഷ തോട്ടിലേക്ക് മറിഞ്ഞ് കാണാതായ ഡ്രൈവറുടെ മൃതദേഹം കണ്ടെത്തി

തിരുവനന്തപുരം വട്ടപ്പാറയിൽ ശക്തമായ മഴയെ തുടർന്ന് ഓട്ടോറിക്ഷ തോട്ടിലേക്ക് മറിഞ്ഞ് കാണാതായ ഡ്രൈവർ വിദ്യാധരന്റെ (65) മൃതദേഹം കണ്ടെത്തി. അപകടം നടന്ന സ്ഥലത്തുനിന്ന് ഏകദേശം 17 കിലോമീറ്റർ അകലെ ആറ്റിങ്ങൽ മാമം ഭാഗത്തുനിന്നാണ് ഇന്ന് ഉച്ചയോടെ മൃതദേഹം കണ്ടെടുത്തത്.

കഴിഞ്ഞ മൂന്ന് ദിവസമായി ഫയർഫോഴ്സ്, സ്കൂബ ടീം, എൻ.ഡി.ആർ.എഫ്, നാട്ടുകാർ എന്നിവർ ചേർന്ന് പ്രദേശത്ത് വ്യാപകമായ തിരച്ചിൽ നടത്തിവരികയായിരുന്നു. തുടർന്നാണ് മൃതദേഹം കണ്ടെത്തിയത്. പോലീസ് ഇൻക്വസ്റ്റ് നടപടികൾ പൂർത്തിയാക്കിയ ശേഷം മൃതദേഹം പോസ്റ്റ്മോർട്ടം പരിശോധനയ്ക്കായി ആശുപത്രിയിലേക്ക് മാറ്റി.

ഞായറാഴ്ച വൈകിട്ടുണ്ടായ ശക്തമായ മഴയിലാണ് അപകടം. മൂന്നുമുക്കിന് സമീപം റോഡരികിലൂടെ ഒഴുകുന്ന ചിറക്കോണം വേറ്റിനാട് വേളാവൂർ തോട് കരകവിഞ്ഞ് റോഡിലേക്ക് വെള്ളം കയറിയിരുന്നു. വിവാഹസൽക്കാരത്തിൽ പങ്കെടുക്കാനായി ഭാര്യ ലതാകുമാരിക്കൊപ്പം ഓട്ടോറിക്ഷയിൽ പോകുകയായിരുന്നു വിദ്യാധരൻ.

മൂന്നുമുക്കിലെത്തിയപ്പോൾ റോഡിലൂടെ വെള്ളം ഒഴുകുന്നത് കണ്ട് മറ്റൊരു വഴിയിലേക്ക് ഓട്ടോ തിരിക്കുന്നതിനിടെയാണ് നിയന്ത്രണം നഷ്ടപ്പെട്ട് തോട്ടിലേക്ക് മറിഞ്ഞത്. നാട്ടുകാർ ഉടൻ നടത്തിയ രക്ഷാപ്രവർത്തനത്തിൽ ലതാകുമാരിയെ രക്ഷപ്പെടുത്തി. എന്നാൽ വിദ്യാധരനെ കണ്ടെത്താനായില്ല.

തുടർന്ന് സ്കൂബാ സംഘം, അഗ്നിരക്ഷാസേന, എൻഡിആർഎഫ് എന്നിവർ സംയുക്തമായി തിരച്ചിൽ നടത്തിയെങ്കിലും ഫലമുണ്ടായില്ല. കനത്ത മഴയെ തുടർന്ന് തോട്ടിലുണ്ടായ ശക്തമായ അടിയൊഴുക്കിൽ വിദ്യാധരന്റെ മൃതദേഹം ദൂരേക്ക് ഒഴുകിപ്പോകുകയായിരുന്നു.

English Summary : A 65-year-old autorickshaw driver, Vidyadharan, went missing after his autorickshaw overturned into a swelling stream amidst heavy rainfall at Vattappara in Thiruvananthapuram.