കേരളം, തെക്കൻ തമിഴ്‌നാട്, കന്യാകുമാരി പ്രദേശങ്ങൾക്കു മുകളിലായി ന്യൂനമർദം; തിങ്കളാഴ്ച വരെ മഴയും ഇടിമിന്നലും

കേരളം, തെക്കൻ തമിഴ്‌നാട്, കന്യാകുമാരി പ്രദേശങ്ങൾക്കു മുകളിലായി ന്യൂനമർദം നിലനിൽക്കുന്നു. അതേസമയം, ബംഗാൾ ഉൾക്കടലിലും ആൻഡമാൻ ദ്വീപുകൾക്കു സമീപവും രൂപപ്പെട്ട ചക്രവാതച്ചുഴി നാളെയോടെ (ഒക്ടോബർ 23) ന്യൂനമർദമായി ശക്തിപ്രാപിക്കാൻ സാധ്യതയുണ്ടെന്ന് മെറ്റബീറ് വെതർ നേരത്തെ സൂചിപ്പിച്ചിരുന്നു. ഈ സാഹചര്യത്തിൽ കേരളത്തിൽ തിങ്കളാഴ്ച വരെ മഴയും ഇടിമിന്നലും കാറ്റും വർധിക്കാൻ സാധ്യതയുള്ളതിനാൽ ജാഗ്രത പാലിക്കണം.

കേന്ദ്ര കാലാവസ്ഥാ വകുപ്പിന്റെ ഏറ്റവും പുതിയ അറിയിപ്പുപ്രകാരം, തെക്കുപടിഞ്ഞാറൻ ബംഗാൾ ഉൾക്കടലിൽ തമിഴ്‌നാട്, വടക്കൻ ശ്രീലങ്ക, മന്നാർ ഉൾക്കടൽ എന്നിവിടങ്ങളോടു ചേർന്ന് നിലനിന്നിരുന്ന ന്യൂനമർദം കന്യാകുമാരി മേഖലയിലും സമീപ തെക്കൻ തമിഴ്‌നാട്ടിലും കേരളത്തോടു ചേർന്ന പ്രദേശങ്ങളിലുമായി സ്ഥിതിചെയ്യുകയാണ്. ഇതുമായി ബന്ധപ്പെട്ട ചക്രവാതച്ചുഴി സമുദ്രനിരപ്പിൽനിന്ന് 5.8 കിലോമീറ്റർ ഉയരംവരെ വ്യാപിച്ചുകിടക്കുന്നു. ഈ കാലാവസ്ഥാ സംവിധാനത്തിന്റെ സ്വാധീനം കേരളത്തിലും തെക്കൻ തമിഴ്‌നാട്ടിലും മഴയ്ക്ക് അനുകൂലമായ സാഹചര്യമൊരുക്കും.

ബംഗാൾ ഉൾക്കടലിൽ പുതിയ ന്യൂനമർദം

വടക്കൻ ആൻഡമാൻ കടലിൽ രൂപപ്പെട്ട ചക്രവാതച്ചുഴി പടിഞ്ഞാറ്-വടക്കുപടിഞ്ഞാറ് ദിശയിൽ നീങ്ങി തെക്കുകിഴക്കൻ ബംഗാൾ ഉൾക്കടലിലും സമീപ കിഴക്കൻ മധ്യ ബംഗാൾ ഉൾക്കടലിലും ആൻഡമാൻ ദ്വീപുകൾക്ക് സമീപവുമായി സ്ഥിതിചെയ്യുകയാണ്. ഇതിന്റെ സ്വാധീനത്തിൽ ഒക്ടോബർ 23-ഓടെ ബംഗാൾ ഉൾക്കടലിൽ പുതിയ ന്യൂനമർദം രൂപപ്പെടാൻ സാധ്യതയുണ്ട്.

അറബിക്കടലിൽ ന്യൂനമർദ്ദം ശക്തി കുറഞ്ഞു, പുതിയ ന്യൂനമർദ്ദം 25 ന്, ബംഗാൾ ഉൾക്കടൽ ന്യൂനമർദ്ദം തമിഴ്നാട്ടിൽ കര കയറും, നാളെ മറ്റൊരു ന്യൂനമർദ്ദവും രൂപപ്പെടും
Arabian Sea & Bay of Bengal Weather Update: New Low-Pressure Systems and Orange Alerts Issued for Kerala
https://metbeatnews.com/new-low-pressure-systems-and-orange-alerts-issued-for-kerala

രൂപപ്പെടുന്ന ന്യൂനമർദം തുടർന്നും പടിഞ്ഞാറ്-വടക്കുപടിഞ്ഞാറ് ദിശയിൽ നീങ്ങി കൂടുതൽ ശക്തിപ്രാപിക്കുമെന്നാണ് കാലാവസ്ഥാ വകുപ്പിന്റെ വിലയിരുത്തൽ. ഇതിന്റെ തുടർന്നുള്ള സഞ്ചാരപഥവും തീവ്രതയും അനുസരിച്ച് കേരളത്തിലടക്കമുള്ള മഴസാഹചര്യത്തിൽ മാറ്റങ്ങളുണ്ടാകാം.

തിങ്കളാഴ്ച വരെ ജാഗ്രത വേണം

നിലവിലെ ന്യൂനമർദത്തിന്റെയും ബംഗാൾ ഉൾക്കടലിൽ രൂപപ്പെടാൻ സാധ്യതയുള്ള പുതിയ ന്യൂനമർദത്തിന്റെയും പശ്ചാത്തലത്തിൽ സംസ്ഥാനത്ത് തിങ്കളാഴ്ച വരെ മഴയ്ക്കും ഇടിമിന്നലിനും കാറ്റിനും വർധനയുണ്ടാകാൻ സാധ്യതയുണ്ട്. മഴയ്ക്കൊപ്പം ഇടിമിന്നലും ശക്തമായ കാറ്റും ഉണ്ടാകുന്ന സമയങ്ങളിൽ പ്രത്യേക ജാഗ്രത ആവശ്യമാണ്.

English Summary : A low-pressure area currently lies over Kanyakumari, Southern Tamil Nadu, and adjoining parts of Kerala, with an associated cyclonic circulation extending up to 5.8 km above sea level.