ആഗസ്റ്റ് ലോകത്തിലെ ഏറ്റവും ചൂടേറിയ മാസം; സമുദ്രങ്ങളും ചുട്ടു പൊള്ളുന്നു

ലോക ചരിത്രത്തിൽ തന്നെ ഏറ്റവും കൂടുതൽ ചൂടേറിയ മാസമായി ആഗസ്റ്റ് മാസത്തെ രേഖപ്പെടുത്തി. യൂറോപ്യൻ യൂണിയന്റെ കാലാവസ്ഥാ നിരീക്ഷണ ഏജൻസിയായ കോപ്പർനിക്കസ് ക്ലൈമറ്റ് ചേഞ്ച് സർവീസ് (Copernicus Climate Change Service)ആണ് ഇക്കാര്യം അറിയിച്ചത്. ആഗസ്റ്റിലെ ആഗോള ശരാശരി താപനില 16.96 ഡിഗ്രി സെൽഷ്യസായി ഉയർന്നു. 2023 ജൂലൈയിൽ രേഖപ്പെടുത്തിയ മുൻ റെക്കോർഡിനേക്കാൾ 0.01 ഡിഗ്രി മാത്രമാണ് ഇത്തവണ അധികമായി വന്നത്. ചെറിയ വ്യത്യാസമാണെങ്കിലും രണ്ട് മാസങ്ങളും ഒരേ തോതിൽ ചൂടേറിയ മാസങ്ങളാണ്.

ഉയർന്ന ചൂടിലേക്ക് ലോകം നീങ്ങുന്നു

മനുഷ്യർ നൂറ്റാണ്ടുകളായി അനുഭവിച്ചിട്ടില്ലാത്ത തരത്തിലുള്ള ഉയർന്ന ചൂടിലേക്കാണ് ലോകം നീങ്ങുന്നതെന്ന് ശാസ്ത്രജ്ജഞർ മുന്നറിയിപ്പ് നൽകി കഴിഞ്ഞു. കരയിലെ താപനില മാത്രമല്ല സമുദ്രോപരിതലത്തിലെ ചൂടും ഞെട്ടിക്കുന്ന തരത്തിലേക്ക് ഉയരുകയാണ്. ഒരു കുറവുമില്ലാതെ തുടർച്ചയായ മൂന്നാം മാസവും ആഗോള സമുദ്രോപരിതല താപനില റെക്കോർഡ് നിലയിൽ തുടരുകയാണ്.

Kerala Heat Weather : വീടിനകം ചുട്ടുപൊള്ളുന്നു; ചൂട് കുറയ്ക്കാൻ ഈ മാർഗങ്ങൾ ചെയ്തു നോക്കൂ
പുറത്തെ താപനില ഉയരുകയാണ്. ചൂട് ഉയരുന്നതിനൊപ്പം വീടിനുള്ളിലും ചൂട് കനക്കുകയാണ്. രാത്രികളിൽ ചൂടുകാരണം ഉറങ്ങാൻ പറ്റാത്ത അവസ്ഥയാണുള്ളത്.
https://metbeatnews.com/beat-the-summer-heat-smart-home-cooling-hacks-without-ac

തീരദേശ സമൂഹങ്ങൾക്ക് ഭീഷണി

ഹരിതഗൃഹ വാതകങ്ങൾ മൂലമുണ്ടാകുന്ന ചൂടിന്റെ മുഴുവൻ ശതമാനവും സമുദ്രങ്ങളാണ് ആഗിരണം ചെയ്യുന്നത്. ഇത് കരയിലെ ചൂട് ഒരു പരിധിവരെ കുറയ്ക്കുന്നുണ്ടെങ്കിലും സമുദ്രജീവികൾക്കും പവിഴപ്പുറ്റുകൾക്കും തീരദേശ സമൂഹങ്ങൾക്കും വലിയ ഭീഷണിയാണ് സൃഷ്ടിക്കുന്നത്. അറ്റ്ലാന്റിക്, മെഡിറ്ററേനിയൻ, ഉഷ്ണമേഖലാ പസഫിക് സമുദ്ര മേഖലകളിൽ താപനിലയിൽ വലിയ വർധനവാണ് രേഖപ്പെടുത്തിയത്.

എൽ നിനോ പ്രതിഭാസം ശക്തി പ്രാപിക്കുന്നു

ഇതിനിടയിലാണ് എൽ നിനോ പ്രതിഭാസത്തിൻ്റെ ആഗമനം. എൽ നിനോ കൂടുതൽ ശക്തിപ്രാപിക്കാനുള്ള സാധ്യതയാണ് കാലാവസ്ഥാ നിരീക്ഷകർ ചൂണ്ടിക്കാട്ടുന്നത്. വലിയ അപകട സാധ്യതകളാണ് എൽ നിനോ ശക്തമായാൽ സംഭവിക്കാൻ പോകുന്നത്. പെറുവിൽ വെള്ളപ്പൊക്കം, ആഫ്രിക്കയിൽ വരൾച്ച, ഓസ്ട്രേലിയയിൽ കാട്ടുതീ തുടങ്ങി നമുക്ക് ചിന്തിക്കാൻ പോലും കഴിയാത്തത്രയും കാലവസ്ഥാ ദുരന്തങ്ങളായിരിക്കും സംഭവിക്കുക. ഒരു പക്ഷേ വരും മാസങ്ങളിൽ എൽ നിനോ ഉയർന്ന തീവ്രതയിലെത്തിയാൽ 2026ഉം 2027ഉം ചരിത്രത്തിലെ തന്നെ ഏറ്റവും വലിയ ചൂടേറിയ വർഷങ്ങളായി മാറാൻ സാധ്യതയുണ്ടെന്നും മുന്നറിയിപ്പുണ്ട്.

റെക്കോർഡ് ചൂട്

പടിഞ്ഞാറൻ യൂറോപ്പിൽ ഇത്തവണ റെക്കോർഡ് ചൂടാണ് അനുഭവപ്പെട്ടത്. 2003ലെ റെക്കോർഡാണ് ഈ വർഷത്തെ വേനൽക്കാലം മറികടന്നത്. ജൂലൈ പകുതി മുതൽ ആഗസ്റ്റ് പകുതി വരെയുള്ള കാലയളവിൽ മാത്രം യൂറോപ്പിൽ 32,000ലധികം പേർക്ക് ചൂടുമായി ബന്ധപ്പെട്ട കാരണങ്ങളാൽ ജീവൻ നഷ്ടപ്പെട്ടുവെന്നാണ് കണക്ക്. ഇതേ അവസ്ഥയിലൂടെയാണ്
അമേരിക്കയും കടന്നു പോയത്. കോപ്പർനിക്കസ് കണക്കുകൾ പ്രകാരം ജൂലൈയിൽ മാത്രം ലോകത്ത് ഏകദേശം 90 കോടി ആളുകൾ ഉയർന്ന താപനിലയുടെ ദുരിതത്തിന് സാക്ഷികളാകേണ്ടി വന്നിട്ടുണ്ട്.

അതേസമയം ആഗോള കാലാവസ്ഥാ പ്രതിസന്ധിയുടെ പ്രധാന കാരണമായി ഐക്യരാഷ്ട്രസഭയുടെ കാലാവസ്ഥാ വിഭാഗം മേധാവി സൈമൺ സ്റ്റീൽ ചൂണ്ടിക്കാട്ടുന്നത് ഫോസിൽ ഇന്ധനങ്ങളോടുള്ള മനുഷ്യരാശിയുടെ അമിതമായ ആശ്രിതത്വമാണ് എന്നതാണ്. കൽക്കരി, എണ്ണ, വാതകം എന്നിവയുടെ ഉപയോഗം കുറയ്ക്കുകയും കാർബൺ പുറന്തള്ളൽ നിയന്ത്രിക്കുകയും ചെയ്യാതെ കാലാവസ്ഥാ പ്രതിസന്ധിക്ക് ശാശ്വത പരിഹാരം കാണാനാകില്ലെന്നും അദ്ദേഹം മുന്നറിയിപ്പ് നൽകുന്നു.

English Summary : According to the EU's Copernicus Climate Change Service, August has recorded peak global temperatures, averaging 16.96°C. The report warns of accelerating global warming driven by fossil fuel reliance, severe marine heatwaves threatening coral reefs, and an intensifying El Niño pattern.