അതി തീവ്ര ചുഴലിക്കാറ്റ് ‘അസാനി’ മധ്യ പടിഞ്ഞാറൻ ബംഗാൾ ഉൾകടലിലെത്തി. അസാനി കേരളത്തിന് കുറുകെ കാറ്റിനെ സ്വാധീനിക്കുന്നുണ്ട്. അതിനാൽ കേരളം പൊതുവെ ഇന്ന് മേഘാവൃതമാകും. പലയിടത്തും ഇന്നും നാളെയും മഴ ലഭിക്കും. എല്ലാ ജില്ലകളിലും മഴ പ്രതീക്ഷിക്കാം.
അസാനി മെയ്‌ 10 വരെ വടക്ക് പടിഞ്ഞാറൻ ദിശയിൽ സഞ്ചരിച്ചു വടക്കൻ ആന്ധ്രാ പ്രദേശ് -ഒഡിഷ തീരത്തിനു സമീപമെത്തി അതിന് ശേഷം വടക്ക് വടക്ക് കിഴക്ക് ദിശ മാറി ഒഡിഷ തീരത്തിനു സമീപമെത്തി ചുഴലിക്കാറ്റായി ശക്തി കുറയും. തീരത്ത് കൂടെ സഞ്ചരിക്കുന്നതിനാൽ ആന്ധ്ര, ഒഡിഷ, ബംഗാൾ സംസ്ഥാനങ്ങളിലെ തീരത്ത് മഴയും കാറ്റും ഉണ്ടാകും. അസാനി കടലിൽ വച്ച് ദുർബലമാകാനാണ് സാധ്യത. കേരളത്തിൽ അസാനിയുടെ പരോക്ഷ സ്വാധീനം ഇന്നും നാളെയും ആയിരിക്കും. അതിനാൽ കൂടുതൽ മഴ അടുത്ത 24 മണിക്കൂറിൽ ആകും. എങ്കിലും അസാധാരണമായ അതിശക്തമായ മഴയൊന്നും പ്രതീക്ഷിക്കുന്നില്ല.
