ഡൽഹിയിൽ കൃത്രിമ മഴ പരീക്ഷണം വീണ്ടും

വായുമലിനീകരണം രൂക്ഷമാകുന്ന സാഹചര്യത്തിൽ കൃത്രിമ മഴ പെയ്യിക്കാനുള്ള പരീക്ഷണങ്ങൾ വീണ്ടും സജീവമാക്കി ഡൽഹി സർക്കാർ. ഇന്ദിരാഗാന്ധി രാജ്യാന്തര വിമാനത്താവളത്തിന് സമീപം കഴിഞ്ഞ 15 ദിവസത്തിനിടെ രണ്ട് ക്ലൗഡ് സീഡിങ് പരീക്ഷണങ്ങൾ നടത്തിയതായാണ് റിപ്പോർട്ട്. കൂടുതൽ പരീക്ഷണങ്ങൾ ദീപാവലിക്കും ഛഠ് പൂജയ്ക്കും ശേഷം നടത്താനും സർക്കാർ ആലോചിക്കുന്നുണ്ട്. എന്നാൽ ദീപാവലിക്ക് മുമ്പ് ഇക്കാര്യത്തിൽ ഔദ്യോഗിക പ്രഖ്യാപനമുണ്ടാകാൻ സാധ്യതയില്ലെന്നാണ് സർക്കാർ വൃത്തങ്ങളെ ഉദ്ധരിച്ച് പിടിഐ റിപ്പോർട്ട് ചെയ്യുന്നത്.

കഴിഞ്ഞ വർഷത്തെ പരീക്ഷണങ്ങളെ അപേക്ഷിച്ച് കൂടുതൽ ഉയരത്തിലാണ് ഇത്തവണ ക്ലൗഡ് സീഡിങ് നടത്തിയത്. ഏകദേശം 30,000 അടി ഉയരത്തിലാണ് പുതിയ പരീക്ഷണങ്ങൾ നടന്നതെന്നാണ് വിവരം. കഴിഞ്ഞ വർഷം ഏകദേശം 10,000 അടി ഉയരത്തിലായിരുന്നു സമാന പരീക്ഷണങ്ങൾ നടത്തിയത്.

Delhi Air Pollution : ഡൽഹിയിൽ വായു മലിനീകരണം രൂക്ഷം, ദീപാവലി പടക്കങ്ങൾക്ക് നിയന്ത്രണമുണ്ടാകുമോ ?
ഡൽഹിയിൽ വായുമലിനീകരണം വീണ്ടും രൂക്ഷമായി തുടരുന്നു. പലയിടത്തും വായു ഗുണനിലവാര സൂചിക ഗുരുതര വിഭാഗത്തിലേക്ക് കടന്നിരിക്കുകയാണ്.
https://metbeatnews.com/air-quality-index-crosses-400-as-authorities-enforce-diwali-firecracker-guidelin

അനുയോജ്യമായ മേഘങ്ങളിൽ സിൽവർ അയഡൈഡ്, സോഡിയം ക്ലോറൈഡ് തുടങ്ങിയ രാസവസ്തുക്കൾ വിതറി മഴയുടെ സാധ്യത വർധിപ്പിക്കുന്ന രീതിയാണ് ക്ലൗഡ് സീഡിങ്. ഇവ മേഘങ്ങളിൽ ജലത്തുള്ളികളോ ഐസ് പരലുകളോ രൂപപ്പെടാൻ സഹായിക്കുന്നു. ഇതിലൂടെ മഴ ലഭിക്കാനുള്ള സാധ്യത വർധിപ്പിക്കുകയാണ് ലക്ഷ്യം.

സൂക്ഷ്മ കണികാ മലിനീകരണത്തിന്റെ അളവ് കുറഞ്ഞു

മഴ പെയ്യുന്നതോടെ അന്തരീക്ഷത്തിലെ പൊടിപടലങ്ങളും സൂക്ഷ്മ മലിനീകരണ കണങ്ങളും താഴെയെത്തുമെന്ന പ്രതീക്ഷയിലാണ് വായുമലിനീകരണം കുറയ്ക്കാനുള്ള മാർഗമായി ഡൽഹി സർക്കാർ ഈ സാങ്കേതികവിദ്യ പരിഗണിക്കുന്നത്. എന്നാൽ മേഘങ്ങളുടെയും അന്തരീക്ഷത്തിന്റെയും അനുകൂല സാഹചര്യം ഉണ്ടെങ്കിൽ മാത്രമേ പരീക്ഷണം വിജയിക്കൂ. ലക്ഷ്യമിട്ട പ്രദേശങ്ങളിൽ സൂക്ഷ്മ കണികാ മലിനീകരണത്തിന്റെ അളവ് കുറഞ്ഞതായി പരീക്ഷണത്തിന് പിന്നാലെ സർക്കാർ പുറത്തുവിട്ട റിപ്പോർട്ടിൽ അവകാശപ്പെട്ടിരുന്നു.

അതിനിടെ, ഡൽഹിയിലെ വായുനിലവാരം വീണ്ടും ആശങ്കാജനകമായി തുടരുകയാണ്. കാറ്റിന്റെ വേഗം കുറഞ്ഞതും കനത്ത മൂടൽമഞ്ഞിന് സമാനമായ പുകമഞ്ഞ് നിലനിൽക്കുന്നതുമാണ് മലിനീകരണം നീണ്ടുനിൽക്കാൻ കാരണമായത്. ശൈത്യകാലത്ത് വായുമലിനീകരണം കൂടുതൽ രൂക്ഷമാകുന്ന ഡൽഹിയിൽ കൃത്രിമ മഴയിലൂടെ മലിനീകരണ തോത് കുറയ്ക്കാനാകുമോയെന്നാണ് പുതിയ പരീക്ഷണങ്ങളിലൂടെ സർക്കാർ പരിശോധിക്കുന്നത്.

English Summary : The Delhi government has reactivated its plan to induce artificial rain via cloud seeding to combat severe winter air pollution across the National Capital Region (NCR). Over the past 15 days, authorities conducted two cloud seeding trials near Indira Gandhi International (IGI) Airport, using advanced technology to disperse silver iodide and sodium chloride into moisture-bearing clouds.