കൊച്ചിയെ മൂടി പുകമഞ്ഞ്; AQI 240 വരെ ഉയർന്നു, അടിയന്തര ഇടപെടലിന് മുഖ്യമന്ത്രിയുടെ ഉറപ്പ്

കൊച്ചി നഗരത്തെ ദിവസവും രാവിലെ മൂടുന്ന പുകമഞ്ഞും ഉയരുന്ന വായുമലിനീകരണ തോതും ആശങ്കയാകുന്നു. നഗരത്തിലെ വായുവിന്റെ ഗുണനിലവാരം മോശമാകുന്നുവെന്ന റിപ്പോർട്ടുകൾക്കിടെ വിഷയം മുഖ്യമന്ത്രിയുടെ ശ്രദ്ധയിൽപ്പെടുത്തി. പ്രശ്നത്തിൽ അടിയന്തര ഇടപെടൽ വേണമെന്ന ആവശ്യം ഉയർന്നതോടെ മലിനീകരണ നിയന്ത്രണ ബോർഡ് ഉദ്യോഗസ്ഥരുടെ യോഗം ഉടൻ വിളിക്കാമെന്ന് മുഖ്യമന്ത്രി ഉറപ്പുനൽകിയതായി ബന്ധപ്പെട്ടവർ അറിയിച്ചു.

#WATCH | Delhi: The Air Quality Index (AQI) in the area around Kalindi Kunj is 267, categorised as 'Poor', as per the CPCB (Central Pollution Control Board). pic.twitter.com/a7Qr4BMXkC
— ANI (@ANI) October 23, 2026

കൊച്ചിയിലെ പുകമഞ്ഞ് പ്രശ്നം ടി.ജെ. വിനോദ് എംഎൽഎയുടെ ശ്രദ്ധയിൽപ്പെടുത്തിയതായും തുടർന്ന് മുഖ്യമന്ത്രിക്ക് വീഡിയോ അയച്ചതായും സാമൂഹികമാധ്യമത്തിൽ പങ്കുവച്ച കുറിപ്പിൽ പറയുന്നു. രാവിലെ എട്ടുമണിക്കുപോലും മറൈൻ ഡ്രൈവിൽനിന്ന് സമീപ ദ്വീപുകൾ കാണാൻ കഴിയാത്തവിധം പുകമഞ്ഞ് വ്യാപിക്കുന്നുവെന്നാണ് കുറിപ്പിലെ പരാമർശം. കൊച്ചിയിലെ വായുഗുണനിലവാര സൂചികയായ AQI രാവിലെ 183 രേഖപ്പെടുത്തിയെന്നും കഴിഞ്ഞയാഴ്ച ഇത് 240 വരെ ഉയർന്നിരുന്നുവെന്നും കുറിപ്പിൽ പറയുന്നു.

240 മോശം വായു നിലവാരം

വായുവിലെ മലിനീകരണത്തിന്റെ തോത് വിലയിരുത്തുന്നതിനുള്ള സൂചികയാണ് എയർ ക്വാളിറ്റി ഇൻഡക്സ് അഥവാ AQI. കേന്ദ്ര മലിനീകരണ നിയന്ത്രണ ബോർഡിന്റെ മാനദണ്ഡപ്രകാരം 101 മുതൽ 200 വരെയുള്ള AQI മിതമായ വിഭാഗത്തിലും 201 മുതൽ 300 വരെയുള്ളത് മോശം വിഭാഗത്തിലുമാണ്. അതിനാൽ, 183 മിതമായ വിഭാഗത്തിലാണെങ്കിലും 240 മോശം വായുനിലവാരത്തെയാണ് സൂചിപ്പിക്കുന്നത്. പുകമഞ്ഞിന്റെ യഥാർഥ കാരണമെന്താണെന്നും മലിനീകരണത്തിൽ ഏതൊക്കെ ഘടകങ്ങൾക്കാണ് പങ്കെന്നും കണ്ടെത്തണമെന്ന ആവശ്യവും ശക്തമാണ്.

വേണ്ടത് അടിയന്തര പരിശോധന

കൊച്ചിയിലെ പുകമഞ്ഞിന്റെ ഉറവിടം കണ്ടെത്താനും വായുനിലവാരം കൃത്യമായി നിരീക്ഷിക്കാനും സംവിധാനം വേണമെന്നാണ് ഉയരുന്ന ആവശ്യം. നഗരത്തിലെ വിവിധ മേഖലകളിലെ AQI വിവരങ്ങൾ പരിശോധിക്കുക, മലിനീകരണത്തിന്റെ പ്രധാന സ്രോതസ്സുകൾ കണ്ടെത്തുക, നിലവിലുള്ള നിരീക്ഷണ സംവിധാനങ്ങൾ വിലയിരുത്തുക, വായുനിലവാരം മെച്ചപ്പെടുത്താൻ സർക്കാർ സ്വീകരിക്കുന്ന നടപടികൾ ജനങ്ങളെ അറിയിക്കുക തുടങ്ങിയ ആവശ്യങ്ങളാണ് മുഖ്യമന്ത്രിക്ക് നൽകിയ നിവേദനത്തിലുള്ളത്.

കൊച്ചിയിലെ വായുനിലവാരം സംബന്ധിച്ച് സർക്കാർ പഠനങ്ങൾ നടത്തിയിട്ടുണ്ടോ, കൂടുതൽ പഠനങ്ങൾ ആസൂത്രണം ചെയ്യുന്നുണ്ടോ, മലിനീകരണ നിയന്ത്രണ ബോർഡ് എന്തെല്ലാം നടപടികളാണ് സ്വീകരിക്കുന്നത് തുടങ്ങിയ കാര്യങ്ങളിൽ വ്യക്തത വരേണ്ടതുണ്ട്. പുകമഞ്ഞിന്റെ കാരണം സ്ഥിരീകരിക്കാതെ നിഗമനങ്ങളിലെത്തുന്നതിനു പകരം ശാസ്ത്രീയ പരിശോധന നടത്തി പരിഹാരനടപടികൾ സ്വീകരിക്കണമെന്നാണ് ആവശ്യം.

കൊച്ചിയിലെ വായുമലിനീകരണത്തിന്റെ യഥാർഥ കാരണവും അതിന്റെ വ്യാപ്തിയും ഔദ്യോഗിക പരിശോധനയിലൂടെ വ്യക്തമാകേണ്ടതുണ്ട്. മലിനീകരണ നിയന്ത്രണ ബോർഡിന്റെ ഇടപെടലും കൃത്യമായ നിരീക്ഷണവും എത്രയും വേഗം ഉണ്ടാകുമോയെന്നാണ് ഇനി അറിയേണ്ടത്.

ഗുരുതരമായ ആരോഗ്യ പ്രശ്‌നങ്ങൾ

വായുമലിനീകരണം ശ്വാസകോശത്തെ ബാധിക്കുകയും ആസ്ത്മ, ബ്രോങ്കൈറ്റിസ് തുടങ്ങിയ ശ്വാസകോശരോഗങ്ങൾ വഷളാക്കുകയും ചെയ്യാം. ദീർഘകാല മലിനീകരണ സമ്പർക്കം ഗുരുതരമായ ആരോഗ്യപ്രശ്നങ്ങൾക്കും കാരണമാകാം. കുട്ടികൾ, വയോധികർ, ശ്വാസകോശ-ഹൃദ്രോഗങ്ങളുള്ളവർ എന്നിവരാണ് കൂടുതൽ ജാഗ്രത പാലിക്കേണ്ടത്.

ഡൽഹിയിലും വായുനിലവാരം മോശമാകുന്നു

ഡൽഹിയിൽ ഒക്ടോബർ 28ന് വൈകിട്ട് നാലുമണിക്ക് AQI 229 രേഖപ്പെടുത്തി. തലേദിവസം ഇത് 197 ആയിരുന്നു. കേന്ദ്ര മലിനീകരണ നിയന്ത്രണ ബോർഡിന്റെ കണക്കനുസരിച്ച് നിരീക്ഷിച്ച 265 നഗരങ്ങളിൽ 23 നഗരങ്ങളിലാണ് വായുനിലവാരം മോശം വിഭാഗത്തിലായത്. ഒരു നഗരത്തിലും നഗരതല AQI വളരെ മോശം അല്ലെങ്കിൽ ഗുരുതര വിഭാഗത്തിൽ രേഖപ്പെടുത്തിയില്ല.

#WATCH | Delhi: An anti-smog gun is being used to spray water to curb air pollution in the Central Delhi area as GRAP-I measures to mitigate pollution are in effect in the national capital pic.twitter.com/4WzRHV1gwr
— ANI (@ANI) October 27, 2026

മധ്യപ്രദേശിലെ പിതാംപൂരിൽ 286 ആണ് രേഖപ്പെടുത്തിയ ഉയർന്ന AQI. ഉത്തർപ്രദേശിലെ ഖോറയിൽ 277ഉം ഹരിയാനയിലെ പാനിപ്പത്തിൽ 274ഉം രേഖപ്പെടുത്തി. ഡൽഹിക്ക് സമീപമുള്ള നോയിഡയിൽ 246, ഗ്രേറ്റർ നോയിഡയിൽ 220, ഗാസിയാബാദിൽ 210, ഗുരുഗ്രാമിൽ 203 എന്നിങ്ങനെയായിരുന്നു വായുനിലവാര സൂചിക.

നെൽവയലുകളിലെ വൈക്കോൽ കത്തിക്കൽ, വാഹനങ്ങളിൽനിന്നുള്ള പുക, നിർമാണപ്രവർത്തനങ്ങളിലെ പൊടി, വ്യാവസായിക മലിനീകരണം തുടങ്ങിയവ ഉത്തരേന്ത്യയിലെ വായുനിലവാര തകർച്ചയുമായി ബന്ധപ്പെട്ട പ്രധാന ഘടകങ്ങളാണ്. ഡൽഹി-എൻസിആറിൽ മലിനീകരണം നിയന്ത്രിക്കാൻ ഗ്രേഡഡ് റെസ്പോൺസ് ആക്ഷൻ പ്ലാനിന്റെ ഒന്നാം ഘട്ടം നടപ്പാക്കിയിട്ടുണ്ട്. റോഡുകൾ യന്ത്രവൽകൃതമായി വൃത്തിയാക്കുക, വെള്ളം തളിക്കുക, നിർമാണപ്പൊടി നിയന്ത്രിക്കുക, തുറസ്സായ സ്ഥലങ്ങളിൽ മാലിന്യം കത്തിക്കുന്നത് തടയുക തുടങ്ങിയ നടപടികളാണ് ഇതിന്റെ ഭാഗമായി സ്വീകരിച്ചത്.

ഡൽഹിയിലെ വായുനിലവാരം ഇന്ന്(ഒക്ടോബർ 29) മുതൽ 31 വരെ മിതമായ വിഭാഗത്തിലേക്ക് മെച്ചപ്പെടുമെന്നാണ് വായുനിലവാര മുന്നറിയിപ്പ് സംവിധാനത്തിന്റെ പ്രവചനം. തുടർന്നുള്ള ദിവസങ്ങളിൽ മിതമായതുമുതൽ മോശമായതുവരെയുള്ള സാഹചര്യം തുടരാനും സാധ്യതയുണ്ട്.

English Summary : Kochi is experiencing a severe surge in air pollution and thick morning smog, with the Air Quality Index (AQI) touching 240 (classified as "Poor"). Following public concern and direct intervention by local representatives, Kerala Chief Minister has assured an immediate meeting with Pollution Control Board (PCB) officials to investigate the source of pollution and take necessary corrective measures.