റഷ്യയിൽ വീണ്ടും കനത്ത ഭൂചലനം, 7.8 തീവ്രത, സുനാമി മുന്നറിയിപ്പ്

റഷ്യയുടെ കിഴക്കേ അറ്റത്തുള്ള കംചത്കയില്‍ വീണ്ടും ശക്തമായ ഭൂചലനം. റിക്ടർ സ്കെയിലിൽ 7.8 തീവ്രത രേഖപ്പെടുത്തി. ഇതേ തുടർന്ന് സുനാമി മുന്നറിയിപ്പ് പുറപ്പെടുവിച്ചു. പ്രാദേശിക സമയം വെള്ളിയാഴ്ച്ച രാവിലെയാണ് ഭൂചലനമുണ്ടായത്.

നിലവില്‍ ആളപായമോ നാശനഷ്ടങ്ങളോ റിപ്പോര്‍ട്ട് ചെയ്യപ്പെട്ടിട്ടില്ല. എന്നാല്‍ തീര പ്രദേശങ്ങളില്‍ അപകടകരമായ സുനാമി തിരമാലകള്‍ക്ക് സാധ്യതയുള്ളതായി അധികൃതര്‍ അറിയിച്ചു.

പെട്രോപാവിലോവ്‌സ്, കംചട്ക പ്രവിശ്യകളിൽ നിന്ന് 128 കിലോമീറ്റര്‍ കിഴക്കായാണ് ഭൂചലനത്തിന്റെ പ്രഭവകേന്ദ്രമെന്ന് യു.എസ് ജിയോളജിക്കല്‍ സര്‍വേ റിപ്പോര്‍ട്ട് ചെയ്തു. ഇവിടെനിന്ന് അമേരിക്കയിലെ അലസ് യിലേക്ക് ഏറെ ദൂരമില്ല.

ഭൂചലനത്തില്‍ കെട്ടിടങ്ങളും വീടുകളും കുലുങ്ങുന്നതിന്റെയും നിര്‍ത്തിയിട്ട കാര്‍ തനിയെ നീങ്ങുന്നതിന്റെയും ദൃശ്യങ്ങള്‍ പുറത്തുവന്നിരുന്നു. പരിഭ്രാന്തരായ ജനങ്ങള്‍ കെട്ടിടങ്ങളില്‍ നിന്ന് പുറത്തേക്ക് ഇറങ്ങിയോടുന്നതിന്റെ ദൃശ്യങ്ങളും സമൂഹ മാധ്യമങ്ങളില്‍ പ്രചരിച്ചിരുന്നു.

കഴിഞ്ഞ ജൂലൈയില്‍ ഇതേ മേഖലയിൽ പസഫിക് സമുദ്രത്തില്‍ 8.8 തീവ്രത രേഖപ്പെടുത്തിയ ഭൂചലനം അനുഭവപ്പെട്ടിരുന്നു. അന്ന് റഷ്യയുള്‍പ്പെടെ യു.എസ്, ജപ്പാന്‍, ചിലി എന്നിവിടങ്ങളില്‍ സുനാമി മുന്നിറിയിപ്പ് നല്‍കിയിരുന്നു.

റഷ്യയില്‍ ഇതുവരെ രേഖപ്പെടുത്തിയതില്‍ വച്ച് ആറാമത്തെ ഏറ്റവും വലിയ ഭൂകമ്പമാണ് അന്നുണ്ടായതെന്ന് യു.എസ് ജിയോളജിക്കല്‍ സര്‍വേ റിപ്പോർട്ട് ചെയ്തിരുന്നു.

പസഫിക്ക് റിംഗ് ഓഫ് ഫയർ മേഖലയിൽ വരുന്ന ഭൂകമ്പ സാധ്യതയുള്ള മേഖലയാണ് കാംചത്ക. ഈ വര്‍ഷം ജൂലൈ ആദ്യം പെട്രോപാവ്‌ലോവ്‌സ്‌ക്, കംചത്കിയില്‍ നിന്ന് 144 കിലോമീറ്റര്‍ അകലെ 7.4 തീവ്രതയുള്ള ഭൂകമ്പം ഉള്‍പ്പെടെ അഞ്ച് പ്രധാന ഭൂകമ്പങ്ങള്‍ ഈ മേഖലയില്‍ അനുഭവപ്പെട്ടിരുന്നു.

English Summary: Another strong earthquake hits Russia, magnitude 7.8, tsunami warning issued