വടക്ക് മഴ ശക്തം: കാസര്‍കോടും, കണ്ണൂരും ഓറഞ്ച് അലര്‍ട്ട്, കോഴിക്കോട് അതീവ ജാഗ്രതാ നിര്‍ദേശം, രാത്രി യാത്രാ നിരോധനം

കേരളത്തില്‍ ഇന്ന് വൈകിട്ടോടെ മഴ മുന്നറിയിപ്പില്‍ മാറ്റംവരുത്തി കേന്ദ്ര കാലാവസ്ഥാ വകുപ്പ്. ഉച്ചയ്ക്കു ശേഷം കനത്ത മഴ ലഭിച്ച കണ്ണൂര്‍, കാസര്‍കോട് ജില്ലകളില്‍ രാവിലെ ഉണ്ടായിരുന്ന മഞ്ഞ അലര്‍ട്ട് ഓറഞ്ച് അലര്‍ട്ടായി ഉയര്‍ത്തി.

മലപ്പുറം, കോഴിക്കോട്, വയനാട്, തിരുവനന്തപുരം ജില്ലകളില്‍ മഞ്ഞ അലര്‍ട്ടും തുടരുന്നു. ഇന്ന് വടക്കന്‍ ജില്ലകളില്‍ മഴ ലഭിക്കുമെന്നും കണ്ണൂര്‍, കാസര്‍കോട് ജില്ലകളില്‍ ശക്തമായ മഴക്ക് സാധ്യതയെന്നും മെറ്റ്ബീറ്റ് ന്യൂസ് രാവിലെ റിപ്പോര്‍ട്ടു ചെയ്തിരുന്നു.

Bay of Bengal Deep Depression: അതി തീവ്ര ന്യൂനമർദം വിശാഖപട്ടണത്ത് കരകയറി
ബംഗാൾ ഉൾക്കടലിലെ തീവ്രതീവ്രന്യൂനമർദ്ദം ചുഴലിക്കാറ്റായി ശക്തിപ്രാപിച്ചുവെന്ന് Joint Typhoon Warning Center(JTWC) അറിയിച്ചു
https://metbeatnews.com/jtwc-upgrades-deep-depression-to-tropical-storm-andhra-pradesh-odisha-high-alert

കോഴിക്കോട് കനത്ത മഴ

ഉച്ചയ്ക്കു ശേഷം കോഴിക്കോട് ജില്ലയുടെ മലയോര മേഖലയില്‍ കനത്ത മഴ തുടരുന്നുണ്ട്. കോഴിക്കോട് നഗരത്തില്‍ വൈകിട്ട് ചാറ്റല്‍മഴ ലഭിച്ചു. മലപ്പുറം ജില്ലയിലെ പൊന്നാനി, തിരൂര്‍ മേഖലയിലും മഴ ലഭിച്ചു. കനത്ത മഴ സാധ്യതയെ തുടര്‍ന്ന് കോഴിക്കോട് ജില്ലയില്‍ രാത്രിയാത്രയ്ക്ക് നിയന്ത്രണം ഏര്‍പ്പെടുത്തി.

മണ്ണിടിച്ചിലിനും ഉരുൾപൊട്ടലിനും സാധ്യത

മലയോര മേഖലകളിലും ഉയര്‍ന്ന പ്രദേശങ്ങളിലേക്കും അത്യാവശ്യമല്ലാത്ത യാത്ര ഇന്നു രാത്രി ഒഴിവാക്കണമെന്ന് ജില്ലാ കലക്ടര്‍ അറിയിച്ചു. തീവ്രന്യൂനമര്‍ദത്തിന്റെ പശ്ചാത്തലത്തില്‍ ജില്ലയില്‍ നാളെ വരെ ശക്തമായ മഴ പ്രതീക്ഷിക്കുന്നുണ്ട്. മലയോര മേഖലയില്‍ മണ്ണിടിച്ചിലിനും ഉരുള്‍പൊട്ടലിനും സാധ്യതയുണ്ടെന്നും മരംവീഴല്‍, മലവെള്ളപ്പാച്ചില്‍ എന്നിവയ്ക്കു സാധ്യതയുള്ളതിനാല്‍ പൊതു ജനങ്ങള്‍ അതീവ ജാഗ്രത പാലിക്കണമെന്നും ജില്ലാ ദുരന്ത നിവാരണ അതോറിറ്റി മുന്നറിയിപ്പ് നല്‍കി.

നാളെ രാവിലെ വരെ ശക്തമായ മഴ

മലപ്പുറം ജില്ലയുടെ കിഴക്കന്‍ മേഖലയിലും കോഴിക്കോട് ജില്ലയുടെ കിഴക്കന്‍ മേഖലയിലും നാളെ രാവിലെ വരെ അതിശക്തമായ മഴ സാധ്യതയുണ്ടെന്ന് മെറ്റ്ബീറ്റ് വെതറിലെ നിരീക്ഷകരും പറഞ്ഞു. ഈ മേഖലയില്‍ രാത്രി ജാഗ്രത തുടരണം. താമരശ്ശേരി, തിരുവമ്പാടി, കൂരാച്ചുണ്ട് തുടങ്ങിയ മലയോര മേഖലകളില്‍ മണ്ണിടിച്ചില്‍ സാധ്യതയുള്ളതിനാല്‍ റോഡുകളില്‍ ഗതാഗതം പൂര്‍ണമായും നിയന്ത്രിക്കും. ദുരന്ത നിവാരണവുമായി ബന്ധപ്പെട്ട അടിയന്തര വാഹനങ്ങള്‍ക്ക് മാത്രമാണ് ഇളവുള്ളത്.

English Summary : Kerala is experiencing heavy monsoon activity, prompting the India Meteorological Department (IMD) to upgrade Kasaragod and Kannur to an Orange Alert.