യുഎഇയിൽ ചൂടിന് ആശ്വാസം; കാലാവസ്ഥ മാറുന്നു, മഴയ്ക്ക് സാധ്യതയേറും, വരുന്നത് `അൽവസം' സീസൺ

ദുബായിലെയും യുഎഇയിലെ വിവിധ എമിറേറ്റുകളിലെയും കടുത്ത വേനൽച്ചൂടിന് ആശ്വാസമാകുന്ന കാലാവസ്ഥയാണ് ഇനി വരാൻ പോകുന്നത്. ഒക്ടോബർ രണ്ടാം പകുതിയോടെ രാജ്യത്തിന്റെ വിവിധ ഭാഗങ്ങളിൽ താപനില ക്രമേണ കുറയുകയും മഴയ്ക്കുള്ള സാധ്യത വർധിക്കുകയും ചെയ്യുമെന്നാണ് കാലാവസ്ഥാ നിരീക്ഷകരുടെ വിലയിരുത്തൽ.

വേനൽക്കാലത്തിനും ശൈത്യകാലത്തിനും ഇടയിലുള്ള മാറ്റത്തിന്റെ കാലമാണ് ഒക്ടോബർ. മാസത്തിന്റെ രണ്ടാം പകുതിയോടെ താപനിലയിൽ കാര്യമായ കുറവുണ്ടാകുമെന്നാണ് പ്രതീക്ഷ. ഒക്ടോബർ പകുതിയോടെ ആരംഭിക്കുന്ന ‘അൽ വസം’ സീസൺ (Al Wasam season)കൂടുതൽ കുളിർമയും മഴയ്ക്കുള്ള സാധ്യതയും കൊണ്ടുവരുമെന്നാണ് വിലയിരുത്തൽ.

ശക്തമായ കാറ്റിനും മഴയ്ക്കും സാധ്യത

യുഎഇയുടെ കിഴക്കൻ, പർവത മേഖലകളിൽ മഴമേഘങ്ങൾ രൂപപ്പെടാനുള്ള സാധ്യത കൂടുതലാണ്. ഈ പ്രദേശങ്ങളിലെ ഈർപ്പമുള്ള കാറ്റും ഭൂപ്രകൃതിയും മേഘരൂപീകരണത്തിന് അനുകൂല സാഹചര്യങ്ങൾ സൃഷ്ടിക്കും. ചില മേഖലകളിൽ ശക്തമായ മഴയ്ക്കും കാറ്റിനും സാധ്യതയുണ്ട്. കാറ്റ് ശക്തമാകുന്ന ഘട്ടങ്ങളിൽ പൊടിപടലങ്ങൾ ഉയർന്ന് കാഴ്ചപരിധി കുറയാനും സാധ്യതയുണ്ട്.

Uae Weather : യുഎഇയിൽ മൂടൽമഞ്ഞ് മുന്നറിയിപ്പ്; കിഴക്കൻ മേഖലയിൽ മഴയ്ക്ക് സാധ്യത
യുഎഇയിൽ ഇന്ന് പൊതുവേ തെളിഞ്ഞ കാലാവസ്ഥയായിരിക്കുമെങ്കിലും കിഴക്കൻ മേഖലകളിൽ മഴ മേഘങ്ങൾ രൂപപ്പെട്ട് ഉച്ചയോടെ ഇവിടെ മഴയ്ക്ക് സാധ്യതണ്ടെന്ന് ദേശീയ കാലാവസ്ഥ
https://metbeatnews.com/red-and-yellow-fog-alerts-issued-alongside-eastern-rains

ഒക്ടോബർ പകുതിയോടെ ശൈത്യകാലമെത്തും

ഒക്ടോബർ പകുതിയോടെ ശൈത്യകാല മേഘങ്ങൾ രൂപപ്പെടാൻ തുടങ്ങുമെന്നും ശരത്കാലത്തിന്റെ മധ്യത്തോടെ മഴയ്ക്കുള്ള സാധ്യത വർധിക്കുമെന്നും എമിറേറ്റ്സ് അസ്ട്രോണമി സൊസൈറ്റി ചെയർമാൻ ഇബ്രാഹിം അൽ ജർവാൻ നേരത്തെ വ്യക്തമാക്കിയിരുന്നു.

അറേബ്യൻ കടലിൽ നിന്നും ഒമാൻ ഉൾക്കടലിൽ നിന്നും ഈർപ്പമുള്ള കാറ്റ് യുഎഇയിലേക്ക് എത്തുന്നതോടെ പല മേഖലകളിലും അന്തരീക്ഷം അസ്ഥിരമാകാനും സാധ്യതയുണ്ട്. ഒക്ടോബർ അവസാനത്തോടടുക്കുമ്പോൾ കൂടുതൽ കുളിർമയുള്ള അന്തരീക്ഷവും മഴയും ലഭിക്കുമെന്നാണ് പ്രതീക്ഷ.

English Summary : The UAE is set to transition from intense summer heat to cooler weather as the Al Wasam season begins in mid-October 2026. According to meteorological forecasts, temperatures will gradually decrease, bringing much-needed relief across the Emirates.