തിരുവനന്തപുരം ആക്കുളത്ത് വൻ മണ്ണിടിച്ചിൽ; റോഡിന്റെ ഒരുവശം ഇടിഞ്ഞുതാഴ്ന്നു

തിരുവനന്തപുരം ആക്കുളത്ത് PRS Lake വില്ലയ്ക്ക് മുന്നിലെ റോഡ് അപകടകരമായ രീതിയിൽ ഇടിഞ്ഞുതാഴ്ന്നു. സ്വകാര്യ സ്കൂളിന്റെ നിർമാണ പ്രവർത്തനങ്ങൾക്കായി റോഡിനോട് ചേർന്ന് മണ്ണെടുത്തതാണ് അപകടത്തിന് കാരണമെന്നാണ് പ്രാഥമിക വിവരം. സംഭവത്തെ തുടർന്ന് പ്രദേശത്തെ 75-ലധികം കുടുംബങ്ങൾക്ക് അധികൃതർ ജാഗ്രതാനിർദേശം നൽകി. അപകടഭീഷണിയെത്തുടർന്ന് സമീപത്തെ ചില കുടുംബങ്ങൾ വീടുകളിൽനിന്ന് മാറിത്താമസിച്ചു.

ഇന്നലെ രാത്രിയാണ് റോഡ് തകർന്ന വിവരം സെക്യൂരിറ്റി ജീവനക്കാരൻ ആദ്യം അറിയിച്ചത്. റോഡിന്റെ ഒരു ഭാഗം പൂർണമായും ഇടിഞ്ഞുതാഴ്ന്നതോടെ പ്രദേശത്ത് ആശങ്കയുണ്ടായി.

സംഭവമറിഞ്ഞ് സ്ഥലത്തെത്തിയ എംഎൽഎ വി. മുരളീധരൻ പ്രദേശത്തെ സുരക്ഷ ഉറപ്പാക്കുന്നതിനുള്ള നടപടികൾ ഉടൻ സ്വീകരിക്കുമെന്ന് അറിയിച്ചു. അപകടത്തിന് ഉത്തരവാദികളായവർക്കെതിരെ നടപടിയെടുക്കുന്നതിനുള്ള നടപടികളും വേഗത്തിലാക്കുമെന്ന് അദ്ദേഹം വ്യക്തമാക്കി.

മൈനിങ് ആൻഡ് ജിയോളജി വകുപ്പ് ഉദ്യോഗസ്ഥരും സ്ഥലത്തെത്തി പരിശോധന നടത്തും. പരിശോധനയുടെ അടിസ്ഥാനത്തിലായിരിക്കും റോഡിന്റെ സുരക്ഷ ഉറപ്പാക്കുന്നതിനും കൂടുതൽ അപകടങ്ങൾ ഒഴിവാക്കുന്നതിനുമുള്ള പരിഹാരനടപടികൾ തീരുമാനിക്കുക.

English Summary : A major landslide struck Akkul in Thiruvananthapuram, causing a massive portion of the road near Good Shepherd School to cave in completely. The sudden collapse has triggered widespread concern among local residents. Stay tuned for live updates, traffic diversions, and official safety assessments.