മുംബൈയില്‍ നിന്ന് ബംഗാളിലെ ദുര്‍ഗാപൂരിലേക്ക് പറന്ന സ്‌പൈസ് ജെറ്റ് വിമാനം ആകാശച്ചുഴിയില്‍പ്പെട്ട് 12 യാത്രക്കാര്‍ക്ക് പരുക്ക് . പിന്നീട് വിമാനം ദുര്‍ഗാപൂരില്‍ സുരക്ഷിതമായി ഇറക്കി. വിമാനത്തിലെ യാത്രക്കാരുടെ ദേഹത്തേക്ക് ലഗേജുകളും മറ്റും വീഴുന്നതും യാത്രക്കാര്‍ പരിഭ്രാന്തരാകുന്നതിന്റെയും വിഡിയോ വൈറലായി. അപകടത്തിന്റെ പശ്ചാത്തലത്തില്‍ ഡയരക്ടറേറ്റ് ഓഫ് സിവില്‍ ഏവിയേഷന്‍ (ഡി.ജി.സി.എ) അന്വേഷണത്തിന് ഉത്തരവിട്ടു. പരുക്കേറ്റവരെ ദുര്‍ഗാപൂരിലെ ആശുപത്രിയില്‍ പ്രവേശിപ്പിച്ചെന്നും ചികിത്സാ ചെലവ് വഹിക്കുമെന്നും വിമാനക്കമ്പനി അറിയിച്ചു. എസ്ജി – 945 നമ്പര്‍ ബോയിങ് 737 വിമാനമാണ് രൂക്ഷമായ ആകാശച്ചുഴിയില്‍പ്പെട്ടത്. ചില യാത്രക്കാര്‍ക്ക് പ്രഥമ ശുശ്രൂഷ നല്‍കി വിട്ടയച്ചു. വിമാനം ദുര്‍ഗാപൂരില്‍ യാത്ര അവസാനിപ്പിച്ചു. മോശം കാലാവസ്ഥാ സാഹചര്യം മൂലം ദുര്‍ഗാപൂരിലെ സര്‍വിസുകള്‍ തടസപെട്ടേക്കുമെന്ന് വിമാനക്കമ്പനി പറഞ്ഞു.
എന്താണ് ആകാശ ചുഴി
അന്തരീക്ഷത്തിൽ മർദം കുറഞ്ഞ പോക്കറ്റുകളാണ് ഇത്. ഇവിടെ വിമാനം എത്തുമ്പോൾ വാഹനം കുഴിയിൽ വീണ അനുഭവം ഉണ്ടാകും.
