കൃഷിക്ക് പണം വേണോ? വായ്പ എടുക്കുമ്പോൾ ഈ കാര്യങ്ങൾ കർഷകർ മറക്കരുത്

ചിലയിനം കൃഷിയിറക്കിയാൽ വലിയ ലാഭം ലഭിക്കും. എന്നാൽ കൃഷിയിറക്കാൻ പണമില്ല. അതിനാൽ ആഗ്രഹങ്ങൾ പലരും മാറ്റിവെക്കുന്നു. കൃഷി മാറ്റിവയ്ക്കേണ്ട സാഹചര്യവും ഉണ്ടാകുന്നു. ഇന്ന് വിത്ത്, വളം, കീടനാശിനി, തൊഴിലാളികളുടെ കൂലി തുടങ്ങി കൃഷിയുടെ വിവിധ ചെലവുകൾക്കായി കർഷകർക്ക് ബാങ്കുകളിൽ നിന്ന് കാർഷിക വായ്പ ലഭിക്കും. കിസാൻ ക്രെഡിറ്റ് കാർഡ് (KCC) വഴിയുള്ള വായ്പയാണ് ഇതിൽ പ്രധാനപ്പെട്ടത്.

ലക്ഷ്യം കൃഷിക്ക് ആവശ്യമായ എല്ലാ സഹായവും ലഭിക്കുക

കൃഷിക്ക് ആവശ്യമായ എല്ലാ സഹായവും ലഭ്യമാക്കുക എന്ന ലക്ഷ്യത്തോടെയാണ് കിസാൻ ക്രെഡിറ്റ് കാർഡ് (KCC) സംവിധാനം നടപ്പാക്കുന്നത്. ചെറുകിട, നാമമാത്ര കർഷകർക്ക് പുറമെ പങ്കാളിത്ത കർഷകർ, കർഷക ഗ്രൂപ്പുകൾ തുടങ്ങിയവർക്കും വ്യവസ്ഥകൾക്ക് വിധേയമായി KCC വഴി വായ്പ ലഭ്യമാക്കുന്നുണ്ട്.

3 ലക്ഷത്തിൽ നിന്ന് 5 ലക്ഷമായി ഉയർത്തി വായ്പ

2025–26 സാമ്പത്തിക വർഷം മുതൽ KCC വഴി ലഭിക്കുന്ന കാർഷിക വായ്പയുടെ പരിധി 3 ലക്ഷത്തിൽ നിന്ന് 5 ലക്ഷം രൂപയായി ഉയർത്തിയിട്ടുണ്ട്. ജാമ്യമില്ലാതെ ലഭിക്കുന്ന കാർഷിക വായ്പയുടെ പരിധി 2 ലക്ഷം രൂപയായും ഉയർത്തിയിട്ടുണ്ട്. ഇതിനർത്ഥം ഓരോ കർഷകനും അഞ്ച് ലക്ഷം രൂപ വായ്പ ഉറപ്പാണെന്നല്ല. കർഷകന്റെ കൃഷിയിടത്തിന്റെ വിസ്തീർണം, വിള, കൃഷിയുടെ ചെലവ്, തിരിച്ചടവ് ശേഷി തുടങ്ങിയ ഘടകങ്ങൾ പരിഗണിച്ചാണ് ബാങ്ക് വായ്പാ പരിധി നിശ്ചയിക്കുക.

അതേസമയം KCC വഴിയുള്ള കാർഷിക വായ്പകൾക്ക് പലിശ ഇളവ് നൽകുന്ന പദ്ധതി സർക്കാർ ഏർപ്പെടുത്തിയിട്ടുണ്ട്. പറഞ്ഞസമയത്ത് തന്നെ വായ്പ തിരിച്ചടയ്ക്കുന്ന കർഷകർക്ക് അധിക ആനുകൂല്യവും ലഭിക്കുന്ന സംവിധാനമുണ്ട്. ഇതിലൂടെ കർഷകരുടെ പലിശഭാരം കുറയ്ക്കുകയാണ് ലക്ഷ്യം.
അതുകൊണ്ട് തന്നെ വായ്പ എടുക്കുന്നതിന് മുമ്പ് ബാങ്ക് ഈടാക്കുന്ന പലിശ, സർക്കാർ നൽകുന്ന പലിശ ഇളവ്, കൃത്യസമയത്ത് തിരിച്ചടച്ചാൽ ലഭിക്കുന്ന ആനുകൂല്യം എന്നിവ കർഷകർ വ്യക്തമായി ചോദിച്ചറിയണം.

എങ്ങനെയാണ് അപേക്ഷിക്കേണ്ടത്?

KCC ലഭിക്കുന്നതിനായി കർഷകർക്ക് ബാങ്ക് ശാഖകളെ സമീപിക്കാം. കർഷകന്റെ കൃഷിയുമായി ബന്ധപ്പെട്ട വിവരങ്ങൾ പരിശോധിച്ച ശേഷമാണ് വായ്പാ പരിധി നിശ്ചയിക്കുന്നത്.

. തിരിച്ചറിയൽ രേഖകൾ

. ഭൂമി/കൃഷി സംബന്ധമായ
രേഖകൾ

. ബാങ്ക് അക്കൗണ്ട് വിവരങ്ങൾ തുടങ്ങിയവ ആവശ്യമായി വരാം.

കാർഷിക വായ്പയുടെ ലഭ്യതയും നിബന്ധനകളും ബാങ്ക്, വിള, പ്രദേശം എന്നിവ അനുസരിച്ച് വ്യത്യാസപ്പെടാം. അതിനാൽ അപേക്ഷിക്കുന്നതിന് മുമ്പ് ബന്ധപ്പെട്ട ബാങ്കിൽ നിന്ന് ആവശ്യമായ രേഖകളുടെയും നിലവിലെ വ്യവസ്ഥകളുടെയും പട്ടിക വാങ്ങുന്നത് നല്ലതാണ്.

English Summary : To overcome initial farming costs—such as seeds, fertilizers, pesticides, and labor wages—farmers can utilize government-backed agricultural financing, primarily through the Kisan Credit Card (KCC) scheme. Available to small, marginal, and group farmers, KCC provides accessible credit tailored to farm operations.