പരിസ്ഥിതി പ്രവർത്തകനും അധ്യാപകനുമായ സലാം നടുക്കണ്ടി അന്തരിച്ചു

പ്രമുഖ പരിസ്ഥിതി പ്രവർത്തകനും അധ്യാപകനും മാധ്യമപ്രവർത്തകനുമായ സലാം നടുക്കണ്ടി അന്തരിച്ചു. കോഴിക്കോട്ടെ സ്വകാര്യ ആശുപത്രിയിൽ ചികിത്സയിലിരിക്കെയാണ് അന്ത്യം. ഖബറടക്കം ഇന്ന് വൈകിട്ട് 5.30ന് കാരശ്ശേരി ജുമാ മസ്ജിദ് ഖബർസ്ഥാനിൽ നടക്കും.

വിദ്യാഭ്യാസ, സാമൂഹിക, പരിസ്ഥിതി മേഖലകളിൽ സജീവ സാന്നിധ്യമായിരുന്നു സലാം നടുക്കണ്ടി. മികച്ച അധ്യാപകനുള്ള ‘ഗുരുശ്രേഷ്ഠ അധ്യാപക അവാർഡ്’ ഉൾപ്പെടെ നിരവധി അംഗീകാരങ്ങൾ നേടിയ അദ്ദേഹം, വിദ്യാർത്ഥികളുടെയും സഹപ്രവർത്തകരുടെയും ഇടയിൽ പ്രിയപ്പെട്ട അധ്യാപകനായിരുന്നു.

പ്രാദേശിക മാധ്യമരംഗത്തും അനൗൺസറായും പ്രവർത്തിച്ച അദ്ദേഹം പൊതുജന ബോധവൽക്കരണ പ്രവർത്തനങ്ങളിൽ ശ്രദ്ധേയമായ പങ്കുവഹിച്ചു. പരിസ്ഥിതി സംരക്ഷണ പ്രവർത്തനങ്ങളിൽ പ്രത്യേക താൽപര്യം പുലർത്തിയിരുന്ന സലാം നടുക്കണ്ടി, ഇരുവഴിഞ്ഞിപുഴ സംരക്ഷണ സമിതിയുടെ പ്രവർത്തനങ്ങളിൽ സജീവമായി ഇടപെട്ടിരുന്നു. നദീ സംരക്ഷണം, പരിസ്ഥിതി സംരക്ഷണം, ജലസ്രോതസ്സുകളുടെ സംരക്ഷണം എന്നിവയുമായി ബന്ധപ്പെട്ട നിരവധി ജനകീയ പ്രവർത്തനങ്ങൾക്ക് അദ്ദേഹം നേതൃത്വം നൽകിയിരുന്നു.

സലാം നടുക്കണ്ടിയുടെ നിര്യാണത്തിൽ വിദ്യാഭ്യാസ, സാമൂഹിക, പരിസ്ഥിതി രംഗങ്ങളിലെ നിരവധി പേർ അനുശോചനം രേഖപ്പെടുത്തി.

English Summary: Salam Nadukkandi, a well-known environmental activist, teacher, and journalist, passed away while undergoing treatment at a private hospital in Kozhikode. The funeral is scheduled for 5:30 PM today at the Karassery Juma Masjid burial ground.