വായുമലിനീകരണം ആത്മഹത്യയ്ക്ക് പ്രേരിപ്പിക്കുന്നു; നമ്മളെ മാനസിക രോഗികളാക്കുന്നുവെന്ന് പഠനം

വായുമലിനീകരണം (Air Pollution) കാരണം ശാരീരികമായി നമ്മൾ ബുദ്ധിമുട്ടുന്നു. പക്ഷേ മാനസികമായും വായുമലിനീകരണം നമ്മളെ ബാധിക്കുന്നു വെന്ന് പറഞ്ഞാൽ തള്ളികളയേണ്ട അത് സത്യമാണ്. പുതിയ പഠനം പറയുന്നത് മാനസികാരോഗ്യത്തെയും വായുമലിനീകരണം ബാധിച്ചേക്കാമെന്നാണ്. ‘എപ്പിഡമിയോളജി ആൻഡ് കമ്മ്യൂണിറ്റി ഹെൽത്ത്’ (Journal of Epidemiology and Community Health)ജേണലിലാണ് പഠനം പ്രസിദ്ധീകരിച്ചത്. അതായത് ചില വായുമലിനീകരണ വസ്തുക്കളുമായി സമ്പർക്കം പുലർത്തുന്നത് വിഷാദരോഗത്തിനുള്ള സാധ്യതയും ആത്മഹത്യാചിന്തകളും വർധിപ്പിക്കാമെന്നാണ് പഠനത്തിലെ കണ്ടെത്തൽ.

വിവിധ ജനവിഭാഗങ്ങളിൽ നടത്തിയ പഠനങ്ങളിലെ തെളിവുകൾ പരിശോധിച്ച് ക്വീൻസ് യൂണിവേഴ്സിറ്റി ബെൽഫാസ്റ്റിലെ ഗവേഷകരാണ് ഈ വിലയിരുത്തൽ നടത്തിയത്.
PM2.5, PM10, നൈട്രജൻ ഡൈഓക്സൈഡ് (NO₂) തുടങ്ങിയ മലിനീകരണ വസ്തുക്കളെയാണ് ഗവേഷകർ പ്രധാനമായും പരിശോധിച്ചത്.

ഏക പോംവഴി വായുമലിനീകരണം കുറയ്ക്കുക

അതേ സമയം വായുമലിനീകരണം ശരീരത്തിൽ വീക്കം (Inflammation) ഉണ്ടാക്കുകയും ഇത് നാഡീവ്യവസ്ഥയെ ബാധിക്കുകയും ചെയ്യാമെന്നാണ് ഗവേഷകരുടെ വിലയിരുത്തൽ. നാഡീവ്യവസ്ഥയിലുണ്ടാകുന്ന ഇത്തരം മാറ്റങ്ങൾ മസ്തിഷ്കത്തിന്റെ പ്രവർത്തനത്തെയും ബാധിച്ച് വിഷാദം, ഉത്കണ്ഠ തുടങ്ങിയ മാനസികാരോഗ്യ പ്രശ്നങ്ങൾക്ക് കാരണമാകാനുള്ള സാധ്യതയുണ്ടെന്നും പഠനം ചൂണ്ടിക്കാട്ടുന്നു.

ഏക പോംവഴി വായുമലിനീകരണം കുറയ്ക്കുക എന്ന് മാത്രമാണ്. ഇതിനുവേണ്ട നടപടികളും പൊതുജനാരോഗ്യ ഇടപെടലുകളും ശക്തമാക്കുന്നത് മാനസികാരോഗ്യം മെച്ചപ്പെടുത്താനും ആത്മഹത്യാപ്രവണത കുറയ്ക്കാനും സഹായിക്കാമെന്നും ഗവേഷകർ അഭിപ്രായപ്പെടുന്നു. മലിനമായ വായു ദീർഘകാലം ശ്വസിക്കുന്നവരിൽ പിന്നീട് വിഷാദരോഗം ഉണ്ടാകാനുള്ള സാധ്യത കൂടുതലാണെന്ന് സൂചിപ്പിക്കുന്ന പഠനങ്ങളും നേരത്തെ പുറത്തുവന്നിരുന്നു.

English Summary : A study published in the Journal of Epidemiology and Community Health reveals that air pollution does not just harm physical health—it significantly impacts mental health. Exposure to toxic air pollutants increases the risk of clinical depression, anxiety, and suicidal ideation.