യുഎഇയിൽ കനത്ത മൂടൽമഞ്ഞ്; റെഡ്, യെല്ലോ അലർട്ടുകൾ പുറപ്പെടുവിച്ചു

യുഎഇയിൽ ഇന്ന് (നവംബർ 3, ചൊവ്വാഴ്ച) പൊതുവെ തെളിഞ്ഞതോ ഭാഗികമായി മേഘാവൃതമായതോ ആയ കാലാവസ്ഥയായിരിക്കുമെന്ന് ദേശീയ കാലാവസ്ഥാ നിരീക്ഷണ കേന്ദ്രം (NCM) അറിയിച്ചു. രാജ്യത്തിന്റെ തെക്കൻ മേഖലകളിൽ കനത്ത മൂടൽമഞ്ഞാണ് അനുഭവപ്പെട്ടത്. ഇവിടങ്ങളിൽ എൻസിഎം റെഡ്, യെല്ലോ അലർട്ടുകൾ പുറപ്പെടുവിച്ചിരുന്നു. കാഴ്ചപരിധി കുറയാനുള്ള സാധ്യതയും NCM ചൂണ്ടികാട്ടിയിരുന്നു.

റോഡുകളിലെ ഇലക്ട്രോണിക് ബോർഡുകളിൽ പ്രദർശിപ്പിക്കുന്ന വേഗപരിധിയിലെ മാറ്റങ്ങൾ ശ്രദ്ധിക്കണമെന്ന് അബുദാബി പൊലീസ് വാഹനയാത്രക്കാർക്ക് മുന്നറിയിപ്പ് നൽകി. ചില തീരദേശ, ഉൾനാടൻ മേഖലകളിൽ രാത്രിയിലും ബുധനാഴ്ച രാവിലെയും അന്തരീക്ഷ ഈർപ്പം വർധിക്കും. ഈ സമയങ്ങളിലും മൂടൽമഞ്ഞിനോ നേരിയ മഞ്ഞിനോ സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു.

രാജ്യത്ത് താപനില 19 മുതൽ 39 ഡിഗ്രി സെൽഷ്യസ് വരെയായിരിക്കും. അബുദാബിയിൽ കുറഞ്ഞ താപനില 26 ഡിഗ്രിയും ദുബൈയിൽ 27 ഡിഗ്രിയും റാസൽഖൈമയിൽ 23 ഡിഗ്രിയുമായിരിക്കും.

കാറ്റിന് സാധ്യത

തെക്കുകിഴക്കൻ ദിശയിൽ നിന്ന് വീശുന്ന കാറ്റ് പിന്നീട് വടക്കുപടിഞ്ഞാറൻ ദിശയിലേക്ക് മാറും. മണിക്കൂറിൽ 10 മുതൽ 20 കിലോമീറ്റർ വരെയായിരിക്കും കാറ്റിന്റെ വേഗം. ചില സമയങ്ങളിൽ ഇത് മണിക്കൂറിൽ 35 കിലോമീറ്റർ വരെ ശക്തി പ്രാപിക്കാനും സാധ്യതയുണ്ട്.
അതേസമയം അറേബ്യൻ ഗൾഫിലും ഒമാൻ കടലിലും കടൽ പൊതുവെ ശാന്തമായിരിക്കുമെന്നും എൻസിഎം പ്രവചിക്കുന്നു.

English Summary : The National Center of Meteorology (NCM) has issued red and yellow fog alerts across southern regions of the UAE for Tuesday, November 3, warning drivers of reduced visibility. Abu Dhabi Police advised motorists to monitor digital speed limit displays on roads due to changing conditions. Humidity levels are expected to rise overnight into Wednesday morning, increasing the chance of further fog formation in coastal and inland areas.