നമ്മുടെ എല്ലാവരുടെയും ആഗ്രഹമാണ് വീട്ടിലെ ആവശ്യങ്ങൾക്ക് ചെറിയ രീതിയിലൊരു കൃഷി. എന്നാൽ അടുക്കള തോട്ടത്തിൽ പെട്ടെന്ന് പരീക്ഷിക്കാന്‍ ഏതൊക്കെ ഇനങ്ങൾ തിരഞ്ഞെടുക്കും? കൃഷിക്കായി എന്തൊക്കെ മുൻകരുതലുകൾ എടുക്കണം? എങ്ങനെയാണ് കൃഷി ചെയ്യേണ്ടത്? എന്ന് തുടങ്ങി നിരവധി സംശയങ്ങൾ ആണ് എല്ലാവർക്കും. എളുപ്പത്തിൽ കൃഷി ചെയ്യാവുന്ന ഏഴ് ഇനങ്ങളാണ് ഇവിടെ പരിചയപ്പെടുത്തുന്നത്.

ബീൻസ്

വെള്ളം കെട്ടി നിൽക്കാത്ത നല്ല വെയിൽ കിട്ടുന്ന സ്ഥലമാണ് ബീൻസ് നടാൻ ഏറ്റവും അനുയോജ്യം. രണ്ടരയടി അകലത്തിൽ ചാലെടുത്തു നടണം. ഒരു സെന്റിലേക്ക് 3 കിലോ പൊടിഞ്ഞ കുമ്മായം ചേർത്തു മണ്ണിളക്കുക. ഗ്രോബാഗിലാണെങ്കിൽ 100 ഗ്രാം കുമ്മായം ചേർത്ത് രണ്ടാഴ്ചക്കുശേഷം പൊടിഞ്ഞ കംപോസ്റ്റ് ചേർത്തു വിത്ത് നടുക. വിത്തുകൾ തമ്മിൽ രണ്ടടി അകലം വേണം. നാലില പ്രായത്തിൽ തന്നെ താങ്ങുകാലും പന്തലും വെയ്ക്കാം. നല്ല വളർച്ചയ്ക്ക് 10 ദിവസത്തിലൊരിക്കൽ പൊടിഞ്ഞവളം നൽകണം.

ബീറ്റ്റൂട്ട്

തൈകൾ പ്രോട്രേയിൽ മുളപ്പിച്ചെടുക്കുന്നതാണു ഏറ്റവും നല്ലത്. അതുവഴി വേരിനു ക്ഷതം പറ്റാതെ പറിച്ചു നടാനാൻ സാധിക്കുന്നു. നടീൽമിശ്രിതമായി, ട്രൈക്കോഡെർമ ചേർത്തു സമ്പുഷ്ടീകരിച്ച ജൈവവളവും ചകിരിച്ചോർ കംപോസ്റ്റും ഒരേ അനുപാതത്തിലെടുക്കുക. ഇത് പ്രോട്രേയിൽ മുക്കാൽ ഭാഗം നിറച്ച് വിത്തിട്ടശേഷം മുകളിൽ നേരിയ കനത്തിൽ വിദിവസം വളർച്ച യെത്തുമ്പോൾ വേരിനു ക്ഷതം സംഭവിക്കാത്ത രീതിയിൽ പറിച്ചു നടുക. നടീൽമിശ്രിതം നിറച്ച ചെടിച്ചട്ടിയിൽ നേരിട്ടു വിത്തു പാകാം. 75 മില്ലി വെള്ളത്തിൽ 25 ഗ്രാം സ്യൂഡോമോണാസ് കലക്കിയ ലായനിയിൽ തൈ മുക്കി വച്ചു നടുന്നത് രോഗബാധ തടയും.

പാവൽ

മണ്ണ് നന്നായി കിളച്ചൊരുക്കി മാത്രമേ പാവൽകൃഷി തുടങ്ങാവൂ. ഒരു സെന്റിലേക്ക് 3 കിലോ പൊടിഞ്ഞ കുമ്മായം ചേർത്തു മണ്ണിളക്കണം. രണ്ടടി വ്യാസവും ഒരടി താഴ്ചയുള്ള തടത്തിൽ കരിയിലയും ട്രൈക്കോഡെർമ ചേർത്തു സംപുഷ്ടീകരിച്ച ചാണകപ്പൊടിയും മേൽമണ്ണും ചേർത്ത് തടം നിറയ്ക്കണം. വരികൾ തമ്മിൽ 2 മീറ്ററും തടങ്ങൾ തമ്മിൽ 1.5 മീറ്ററും അകലം നൽകണം. വള്ളികൾ പടർന്നു തുടങ്ങുമ്പോൾ പന്തലിട്ടു കൊടുക്കാം. വേനലിൽ 2 ദിവസം ഇടവിട്ടു നനയ്ക്കണം.

ചീര (അരുൺ)

പെരുമഴ കഴിഞ്ഞതിനുശേഷം ചീര നടാം. അതിനുള്ള നഴ്സറി ഇപ്പോൾത്തന്നെ ഒരുക്കാം. അതിനായി പ്രോട്രേ അല്ലെങ്കിൽ ചെടിച്ചട്ടി മതി. മേൽമണ്ണും ഉമിച്ചാരവും ട്രൈക്കോ ഡെർമ ചേർത്തു സമ്പുഷ്ടീകരിച്ച ചാണകപ്പൊടിയും ചേർത്ത് പ്രോട്രേ/ചട്ടി മുക്കാൽ ഭാഗം നിറച്ച് വിത്തു പാകാം. റോസ് കാൻ കൊണ്ട് നേരിയ നന നൽകണം. മുളച്ച് 18 ദിവസത്തിൽ പറിച്ചു നടാം.

വള്ളിപ്പയർ

പയർ എല്ലാക്കാലത്തും കൃഷി ചെയ്യാം. നല്ല സൂര്യപ്രകാശവും വളക്കൂറുള്ള മണ്ണും അത്യാവശ്യം. സെന്റിന് 3 കിലോ പൊടിഞ്ഞ കുമ്മായം ചേർത്ത് മണ്ണു നന്നായി കിളച്ചു മറിച്ചശേ ഷം ഒന്നരയടി അകലത്തിൽ ചാലു കോരാം. രണ്ടാഴ്ചയ്ക്കുശേഷം ട്രൈക്കോഡെർമ ചേർത്തു സംപുഷ്ടീകരിച്ച ജൈവവളം സെന്റിന് 80 കിലോ എന്ന തോതിൽ ഇളക്കിച്ചേർക്കുക. ചാലുകളിൽ അരയടി അകലത്തിൽ വിത്തു പാകാം. കീടങ്ങളെ അകറ്റാൻ ശീമക്കൊന്ന ഇല പുതയിടാം.

വെള്ളരി

എല്ലാത്തരം മണ്ണിലും വളരുന്നു. എങ്കിലും മണൽ കലർന്ന പശിമരാശി മണ്ണാണ് ഏറ്റവും യോജ്യം. മണ്ണ് നന്നായി കിളച്ചു നടാനുള്ള തടങ്ങൾ ഒരുക്കണം. 60 സെ.മീ. വ്യാസവും 40 സെ.മീ. ആഴവുമുള്ള തടങ്ങളാണ് പഥ്യം. വരികൾ തമ്മിൽ 2 മീറ്റർ അകലവും തടങ്ങൾ തമ്മിൽ 1.5 മീറ്റർ അകലവും വേണം. തടങ്ങളിൽ കരിയിലയോ ചവറോ ഇട്ട് കത്തിച്ചു വേണം കൃഷിക്ക് ഒരുങ്ങാൻ. ഓരോ തടത്തിലും 4 കിലോ ചാണകപ്പൊടിയും മേൽമണ്ണും ചേർക്കണം. ഓരോ തടത്തിലും 4 വിത്തുകൾ വീതം പാകാം. വിത്തു മുളച്ച് രണ്ടാഴ്ച കഴിയുമ്പോൾ കരുത്തുള്ള 2 തൈകൾ മാത്രം നിലനിർത്തി ബാക്കി പറിച്ചു കളയണം.

വെണ്ട

മഴക്കാലത്ത് എളുപ്പത്തിൽ കൃഷി ചെയ്യാവുന്ന വിള. കൃഷിസ്ഥലം നന്നായി കിളച്ചു മറിച്ച് സെന്റ് ഒന്നിന് 3 കിലോ പൊടിഞ്ഞ കുമ്മായം ചേർത്തിളക്കുക. 15 ദിവസത്തിനുശേഷം പൊടിഞ്ഞ ജൈവവളം ചേർക്കണം. 3 അടി അകലത്തിൽ വാരം കോരി 3 അടി അകലത്തിൽ വിത്തു പാകാം. തൈകൾ പറിച്ചു നടുന്നതിനെക്കാൾ നേരിട്ടു നടുന്നതാണു നല്ലത്. 75 മില്ലി വെള്ളത്തിൽ 25 ഗ്രാം സ്യൂഡോമോണാസ് കലക്കി അതിൽ 24 മണിക്കൂർ മുക്കിവച്ചശേഷം വിത്തു നടുന്നത് രോഗങ്ങളെ പ്രതിരോധിക്കാൻ ഫലപ്രദം.

Metbeat news