ന്യൂനമർദം ശക്തിപ്രാപിക്കുന്നു; യുഎഇയിൽ അഞ്ചുദിവസം മഴയ്ക്ക് സാധ്യത

യുഎഇയിലുടനീളം അടുത്ത അഞ്ച് ദിവസങ്ങളിൽ മഴയ്ക്ക് സാധ്യതയുണ്ടെന്ന് നാഷണൽ സെന്റർ ഓഫ് മെറ്റീരിയോളജി (NCM) കാലാവസ്ഥാ നിരീക്ഷകൻ ഡോ. അഹമ്മദ് ഹബീബ്. രാജ്യത്തിന്റെ കിഴക്കൻ മേഖലകളിലാണ് കൂടുതൽ മഴയ്ക്ക് സാധ്യത. ദുബായ്, അബുദാബി, അൽ ഐൻ എന്നിവിടങ്ങളിലും മഴ ലഭിച്ചേക്കും. ഹട്ടയ്ക്ക് സമീപം ഇതിനകം മഴ രേഖപ്പെടുത്തിയതായും അദ്ദേഹം വ്യക്തമാക്കി.

മഴയ്ക്ക് കാരണം കാലാവസ്ഥാ വ്യതിയാനം

കാലാവസ്ഥാ സംവിധാനങ്ങളിലുണ്ടാകുന്ന മാറ്റങ്ങളാണ് വരും ദിവസങ്ങളിൽ മേഘരൂപീകരണത്തിനും മഴയ്ക്കും അനുകൂല സാഹചര്യമൊരുക്കുന്നത്. തെക്ക്-കിഴക്ക് ദിശയിൽനിന്ന് യുഎഇയിലേക്ക് നീളുന്ന ഉപരിതല ന്യൂനമർദവും അന്തരീക്ഷത്തിന്റെ മുകൾത്തട്ടിലെ ന്യൂനമർദ മേഖലയുമാണ് കാലാവസ്ഥാ വ്യതിയാനത്തിന് കാരണം. നാളെയും മഴ മേഘങ്ങൾ രൂപപ്പെടാനും മഴ ലഭിക്കാനും സാധ്യത ഉണ്ട്.

UAE Weather : യുഎഇയിൽ ഇന്ന് കൂടുതൽ മഴയ്ക്ക് സാധ്യത; താപനില 40 ഡിഗ്രി വരെ ഉയരും
യുഎഇയിൽ ഇന്ന് (ഒക്ടോബർ 20) കൂടുതൽ മഴയ്ക്ക് സാധ്യതയെന്ന് ദേശീയ കാലാവസ്ഥാ കേന്ദ്രം (NCM).
https://metbeatnews.com/rain-expected-today-with-temperatures-reaching

ഇന്ന് കിഴക്കൻ മേഖലകളിൽ ആരംഭിക്കുന്ന മഴ വടക്കൻ പ്രദേശങ്ങളിലേക്കും പടിഞ്ഞാറൻ തീരപ്രദേശങ്ങളിലേക്കും വ്യാപിച്ചേക്കാം. തെക്ക്-പടിഞ്ഞാറൻ കാറ്റിലൂടെ അറബിക്കടലിൽനിന്ന് യുഎഇയിലേക്ക് എത്തുന്ന ഈർപ്പവും മഴയ്ക്ക് അനുകൂലമായ സാഹചര്യം സൃഷ്ടിക്കുന്നുണ്ട്. വ്യാഴാഴ്ച കിഴക്കൻ, പടിഞ്ഞാറൻ മേഖലകളിൽ മഴയ്ക്ക് സാധ്യതയുണ്ട്. വെള്ളിയാഴ്ച പൊതുവെ തെളിഞ്ഞതോ ഭാഗികമായി മേഘാവൃതമോ ആയ കാലാവസ്ഥയായിരിക്കുമെങ്കിലും ചില പ്രദേശങ്ങളിൽ മേഘങ്ങൾ രൂപപ്പെട്ടേക്കും.

ശക്തമായ കാറ്റിനും ആലിപ്പഴത്തിനും സാധ്യത

മഴയ്ക്കൊപ്പം ചിലയിടങ്ങളിൽ ചെറിയ ആലിപ്പഴം വീഴാനും സാധ്യതയുണ്ട്. എന്നാൽ വ്യാപകമായ ആലിപ്പഴവർഷത്തിന് സാധ്യതയില്ലെന്നാണ് കാലാവസ്ഥാ നിരീക്ഷകന്റെ വിലയിരുത്തൽ. നാളെ കാറ്റിന്റെ വേഗം മണിക്കൂറിൽ 50 കിലോമീറ്റർ വരെ ഉയർന്നേക്കും. ഇത് പൊടിപടലങ്ങൾ ഉയരുന്നതിനും കാഴ്ചാപരിധി കുറയുന്നതിനും കാരണമാകാം.

മലനിരകളിൽ ശക്തമായ മഴ

യുഎഇയുടെ കിഴക്കൻ മേഖലയിലെ മലനിരകളിൽ ശക്തമായ മഴ ലഭിച്ചേക്കും. ഇതോടെ വാദികളിലൂടെ വെള്ളമൊഴുകാനുള്ള സാധ്യതയുള്ളതിനാൽ ജാഗ്രത പാലിക്കണമെന്നും മുന്നറിയിപ്പുണ്ട്. ഒക്ടോബർ 23, 24 തീയതികളിൽ ന്യൂനമർദ സംവിധാനം ക്രമേണ ദുർബലമായേക്കും. എങ്കിലും അന്തരീക്ഷത്തിന്റെ മുകൾത്തട്ടിൽ അവശേഷിക്കുന്ന ഈർപ്പം മലനിരകൾക്കു മുകളിൽ മേഘങ്ങൾ രൂപപ്പെടാൻ സഹായിച്ചേക്കും.

മൂടൽമഞ്ഞിനും സാധ്യത

തീരപ്രദേശങ്ങളിലും ഉൾപ്രദേശങ്ങളിലും രാത്രിയിലും പുലർച്ചെയും അന്തരീക്ഷത്തിലെ ഈർപ്പം വർധിക്കാൻ സാധ്യതയുണ്ട്. ഇതിന്റെ ഭാഗമായി ചിലയിടങ്ങളിൽ മൂടൽമഞ്ഞോ മഞ്ഞോ രൂപപ്പെട്ടേക്കാം.

English Summary : The National Center of Meteorology (NCM) in the UAE has issued a 5-day weather alert forecasting scattered rainfall, strong winds reaching up to 50 km/h, and potential hail across eastern, northern, and western coastal regions.