കാലാവസ്ഥാ പ്രതിസന്ധിയുടെ പിടിയിൽ ഇന്ത്യൻ കുട്ടികൾ, പുതിയ റിപ്പോർട്ട് പുറത്ത്

ഇന്ത്യയിലെ കുട്ടികളിൽ 97 ശതമാനവും ഒന്നിലധികം കാലാവസ്ഥാ (Climate) അല്ലെങ്കിൽ ദുരന്ത (Disaster) ഭീഷണികൾക്ക് വിധേയരാകുന്നുവെന്ന് ഐക്യരാഷ്ട്രസഭയുടെ ശിശുക്ഷേമ സംഘടനയായ യൂണിസെഫ് (UNICEF) പുറത്തിറക്കിയ പുതിയ റിപ്പോർട്ട്. രാജ്യത്തെ ഏകദേശം 41.16 കോടി കുട്ടികൾ കുറഞ്ഞത് രണ്ട് കാലാവസ്ഥാ-ദുരന്ത ഭീഷണികളെങ്കിലും നേരിടുന്നുണ്ടെന്നാണ് പുതിയ കണ്ടെത്തൽ.

ജൂൺ 16-ന് പുറത്തിറക്കിയ റിപ്പോർട്ടിൽ വരൾച്ച (Drought), അതിതീവ്ര ചൂട് (Extreme Heat), പ്രളയം (Flood), ഉഷ്ണമേഖലാ ചുഴലിക്കാറ്റ് (Tropical Storm), കാട്ടുതീ (Wildfire), മണൽ-പൊടിക്കാറ്റ് (Sand and Dust Storm) തുടങ്ങിയ അപകടസാധ്യതകളാണ് പ്രധാനമായി ചൂണ്ടിക്കാണിക്കുന്നത്.

രാജ്യത്തെ 23.4 കോടിയിലധികം കുട്ടികൾ കുറഞ്ഞത് മൂന്ന് കാലാവസ്ഥാ ഭീഷണികളെങ്കിലും ഒരേസമയം നേരിടുന്നവരാണെന്ന് പറയപ്പെടുന്നു. ഇത് ഇന്ത്യയിലെ ആകെ കുട്ടികളുടെ 55 ശതമാനത്തോളം വരും. ആരോഗ്യസംരക്ഷണം (Health), വിദ്യാഭ്യാസം (Education), പോഷകാഹാരം (Nutrition), സുരക്ഷ (Safety) എന്നിവയെല്ലാം ഇതിലൂടെ ഗുരുതരമായി ബാധിക്കപ്പെടുന്നുവെന്ന് റിപ്പോർട്ട് മുന്നറിയിപ്പ് നൽകുന്നു.

ഇരട്ട ഭീഷണി

ഏറ്റവും കൂടുതൽ കുട്ടികളെ ബാധിക്കുന്ന അപകടസാധ്യതയുടെ സംയോജനം വരൾച്ചയും അതിതീവ്ര ചൂടുമാണ്. ഏകദേശം 15.88 കോടി കുട്ടികളാണ് ഈ ഇരട്ട ഭീഷണി നേരിടുന്നത്. അതേസമയം, 8.41 കോടി കുട്ടികൾ ചുഴലിക്കാറ്റ്, വരൾച്ച, അതിതീവ്ര ചൂട് എന്നീ മൂന്ന് അപകടങ്ങൾക്കും ഒരുമിച്ച് വിധേയരാകുന്നു.

ഏറ്റവും വലിയ വെല്ലുവിളി വരൾച്ച

ഇന്ത്യയിലെ കുട്ടികളെ ഏറ്റവും കൂടുതൽ ബാധിക്കുന്ന കാലാവസ്ഥാ അപകടം വരൾച്ചയാണെന്ന് റിപ്പോർട്ട് വ്യക്തമാക്കുന്നു. രാജ്യത്തെ 96 ശതമാനത്തിലധികം കുട്ടികൾ, അതായത് 41 കോടിയിലധികം പേർ, കാർഷികമോ കാലാവസ്ഥാ സംബന്ധമായോ വരൾച്ച ബാധിക്കുന്ന പ്രദേശങ്ങളിലാണ് താമസിക്കുന്നത്.

ഇത് ഭക്ഷ്യസുരക്ഷ (Food Security), പോഷകാഹാര ലഭ്യത, കുടുംബങ്ങളുടെ ഉപജീവനമാർഗങ്ങൾ എന്നിവയെ നേരിട്ട് ബാധിക്കുന്നു. അതേസമയം, 15.57 കോടി കുട്ടികൾ ചുഴലിക്കാറ്റ് ഭീഷണിയുള്ള മേഖലകളിലാണ് ജീവിക്കുന്നത്. ശക്തമായ മഴയും കാറ്റും വീടുകൾക്കും സ്കൂളുകൾക്കും ആരോഗ്യകേന്ദ്രങ്ങൾക്കും വലിയ നാശനഷ്ടങ്ങൾ ഉണ്ടാക്കുന്നതായി റിപ്പോർട്ട് ചൂണ്ടിക്കാട്ടുന്നു.

ചൂടും പ്രളയവും

രാജ്യത്തെ ഏകദേശം 8.93 കോടി കുട്ടികൾ ഹീറ്റ് വേവ് (Heatwave) ബാധിത പ്രദേശങ്ങളിലാണ്. 6.69 കോടി കുട്ടികൾ നദീപ്രളയ (Riverine Flood) സാധ്യതയുള്ള മേഖലകളിൽ താമസിക്കുന്നു.
ഇത്തരം ദുരന്തങ്ങൾ പലപ്പോഴും ഒരേസമയം സംഭവിക്കുകയോ ഒന്നിന് പിന്നാലെ മറ്റൊന്ന് ഉണ്ടാകുകയോ ചെയ്യുന്നതാണ് സ്ഥിതിഗതികൾ കൂടുതൽ ഗുരുതരമാക്കുന്നതെന്ന് യൂണിസെഫ് വ്യക്തമാക്കുന്നു. കുടുംബങ്ങൾക്കും സമൂഹങ്ങൾക്കും ദുരന്തങ്ങളിൽ നിന്ന് കരകയറാനുള്ള സമയം പോലും ലഭിക്കാതെ വരികയാണ്.

ഗുരുതര ഭീഷണിയാകുന്ന ദുരന്തങ്ങൾ

കാലാവസ്ഥാ വ്യതിയാനവുമായി നേരിട്ട് മാത്രം ബന്ധപ്പെട്ടതല്ലെങ്കിലും വായു മലിനീകരണവും (Air Pollution) മലേറിയയും (Malaria) കുട്ടികൾക്ക് വലിയ വെല്ലുവിളികളാണെന്ന് റിപ്പോർട്ടിൽ പറയുന്നു.

ഇന്ത്യയിലെ ഏകദേശം 42.1 കോടി കുട്ടികൾ അപകടകരമായ തോതിലുള്ള വായു മലിനീകരണത്തിന് വിധേയരാകുന്നു. രാജ്യത്തിന് 10ൽ 9.94 എന്ന അതീവ ഉയർന്ന വായു മലിനീകരണ അപകടസാധ്യതാ സ്കോറാണ് റിപ്പോർട്ട് നൽകുന്നത്.

അതേസമയം, ഏകദേശം 29.41 കോടി കുട്ടികൾ മലേറിയ വ്യാപന സാധ്യതയുള്ള പ്രദേശങ്ങളിലാണ് താമസിക്കുന്നത്. ഉയർന്ന താപനിലയും മഴയുടെ വ്യതിയാനവും രോഗവ്യാപന സാധ്യത വർധിപ്പിക്കുന്നതായി റിപ്പോർട്ട് വ്യക്തമാക്കുന്നു.

പോഷകാഹാര പ്രതിസന്ധി രൂക്ഷമാകുമോ?

വരൾച്ചയും പ്രളയവും കൃഷിയെ ഗുരുതരമായി ബാധിക്കുന്നതിനാൽ ഭക്ഷ്യവിതരണ ശൃംഖലയും (Food Supply Chain) തകരാറിലാകുന്നു. ഇതോടെ കുട്ടികളിലെ പോഷകാഹാരക്കുറവും (Malnutrition) വർധിക്കാൻ സാധ്യതയുണ്ടെന്ന് റിപ്പോർട്ട് മുന്നറിയിപ്പ് നൽകുന്നു.

ഇന്ത്യയിലെ ഏകദേശം 40 ശതമാനം കുട്ടികളും ഇതിനോടകം തന്നെ കടുത്ത ഭക്ഷ്യദാരിദ്ര്യത്തിലാണ് (Severe Food Poverty) ജീവിക്കുന്നത്. കാലാവസ്ഥാ പ്രതിസന്ധി ഈ സാഹചര്യം കൂടുതൽ മോശമാക്കുമെന്നാണ് വിലയിരുത്തൽ.

ലോകവ്യാപകമായി 2050 ഓടെ കാലാവസ്ഥാ വ്യതിയാനം മൂലം 2.8 കോടി കുട്ടികൾക്ക് കൂടി ഗുരുതര പോഷകാഹാരക്കുറവും (Wasting), 4 കോടി കുട്ടികൾക്ക് വളർച്ചാ മുരടിപ്പും (Stunting) ഉണ്ടാകാൻ സാധ്യതയുണ്ടെന്നും റിപ്പോർട്ട് വ്യക്തമാക്കുന്നു.

സ്കൂൾ വിദ്യാഭ്യാസത്തിനും തിരിച്ചടിയാവുന്നു

കാലാവസ്ഥാ ദുരന്തങ്ങൾ വിദ്യാഭ്യാസ മേഖലയെയും സാരമായി ബാധിക്കുന്നതായി റിപ്പോർട്ട് ചൂണ്ടിക്കാട്ടുന്നു. 2024-ൽ ലോകത്തെ 85 രാജ്യങ്ങളിലായി 24.2 കോടി വിദ്യാർത്ഥികളുടെ പഠനം കാലാവസ്ഥാ ദുരന്തങ്ങൾ കാരണം തടസ്സപ്പെട്ടു.
ഇതിൽ 5.47 കോടി വിദ്യാർത്ഥികൾ ഇന്ത്യയിൽ നിന്നുള്ളവരാണ്. അതിതീവ്ര ചൂടാണ് വിദ്യാഭ്യാസ മേഖലയെ ഏറ്റവും കൂടുതൽ ബാധിച്ച ഘടകമെന്ന് റിപ്പോർട്ട് വ്യക്തമാക്കുന്നു.

ഒഡീഷയിൽ അഞ്ച് ജില്ലകളിലെ സ്കൂളുകൾ 2026 ജൂൺ 20 വരെ അടച്ചിടേണ്ടിവന്നതും, ഉത്തരപ്രദേശ്, മഹാരാഷ്ട്ര, ബിഹാർ, മധ്യപ്രദേശ് തുടങ്ങിയ സംസ്ഥാനങ്ങളിൽ സ്കൂൾ സമയക്രമം മാറ്റുകയും വേനലവധി നേരത്തെ പ്രഖ്യാപിക്കുകയും ചെയ്തതും റിപ്പോർട്ടിൽ ഉദാഹരണമായി ചൂണ്ടിക്കാണിക്കുന്നു.

ഇന്ത്യയിലെ 15 വയസ്സിന് താഴെയുള്ള കുട്ടികളിൽ ഏകദേശം 48 ശതമാനം പേരും സാമൂഹിക സുരക്ഷാ പദ്ധതികളുടെ (Social Protection Programmes) പരിധിക്ക് പുറത്താണെന്നാണ് റിപ്പോർട്ട് പറയുന്നത്. ദുരന്തങ്ങൾ ഉണ്ടാകുമ്പോൾ അടിയന്തര ധനസഹായമോ മറ്റ് പിന്തുണകളോ ലഭിക്കാത്ത കുടുംബങ്ങൾ കൂടുതൽ പ്രതിസന്ധിയിലേക്ക് നീങ്ങുന്നതായും റിപ്പോർട്ട് ചൂണ്ടിക്കാട്ടുന്നു.

നിർദേശങ്ങളുമായി യൂണിസെഫ്

ഹരിതഗൃഹ വാതകങ്ങളുടെ (Greenhouse Gas Emissions) പുറന്തള്ളൽ കുറയ്ക്കുക, കാലാവസ്ഥാ അനുയോജന പദ്ധതികൾ (Climate Adaptation) ശക്തിപ്പെടുത്തുക, ദുരന്ത മുന്നൊരുക്ക സംവിധാനങ്ങൾ (Disaster Preparedness Systems) മെച്ചപ്പെടുത്തുക, സ്കൂളുകളും ആശുപത്രികളും ജലവിതരണ സംവിധാനങ്ങളും കൂടുതൽ പ്രതിരോധശേഷിയുള്ളതാക്കുക എന്നിവയാണ് യൂണിസെഫിന്റെ പ്രധാന നിർദേശങ്ങൾ.

കുട്ടികളുടെ ആവശ്യങ്ങളും അഭിപ്രായങ്ങളും കാലാവസ്ഥാ നയങ്ങളിലും (Climate Policy) കാലാവസ്ഥാ ധനസഹായ തീരുമാനങ്ങളിലുമെല്ലാം കേന്ദ്രസ്ഥാനത്ത് വരണമെന്നും റിപ്പോർട്ട് ആവശ്യപ്പെടുന്നു.

അതേസമയം കാലാവസ്ഥാ പ്രതിസന്ധി ഭാവിയിലെ പ്രശ്നമല്ല; ഇന്ത്യയിലെ കോടിക്കണക്കിന് കുട്ടികൾ ഇന്ന് തന്നെ അതിന്റെ ആഘാതം നേരിടുകയാണ്” എന്ന മുന്നറിയിപ്പോടെയാണ് യൂണിസെഫ് റിപ്പോർട്ട് അവസാനിക്കുന്നത്.

English Summary : A chilling new report by the United Nations Children's Fund (UNICEF) highlights that 97% of children in India are currently exposed to one or more climate or disaster-related hazards. This equates to approximately 41.16 crore children who are living under the constant threat of at least two overlapping crises, compromising their health, education, nutrition, and safety.