കോട്ടയത്ത് 12 നാടൻ പശുക്കൾ മിന്നലേറ്റ് ചത്തു

എരുമേലി ചെറുവള്ളി എസ്റ്റേറ്റിൽ ‘ചെറുവള്ളി കുള്ളൻ’ എന്നറിയപ്പെടുന്ന നാടൻ ഇനത്തിൽപ്പെട്ട 12 പശുക്കളെ ചത്തനിലയിൽ കണ്ടെത്തി. ബുധനാഴ്ച വൈകീട്ടുണ്ടായ ശക്തമായ മഴയിലും ഇടിമിന്നലിലുംപെട്ടാണ് പശുക്കൾ ചത്തതെന്നാണ് പ്രാഥമിക നിഗമനം. എന്നാൽ, പശുക്കളുടെ മരണത്തിന് മറ്റെന്തെങ്കിലും കാരണങ്ങളുണ്ടോയെന്നും പരിശോധിക്കണമെന്ന ആവശ്യം ഉയർന്നിട്ടുണ്ട്.

ആദ്യം കണ്ടത് തോട്ടം തൊഴിലാളികൾ

ഒരു തൊഴിലാളിയുടെ മൂരി, പശുക്കൾ, കിടാക്കൾ എന്നിവയുൾപ്പെടെ എട്ടെണ്ണവും മറ്റ് രണ്ട് തൊഴിലാളികളുടെ നാല് പശുക്കളുമാണ് ചത്തത്. ബുധനാഴ്ച വൈകീട്ട് 5.30-ഓടെ പ്രദേശത്ത് കനത്ത മഴയും ഇടിമിന്നലുമുണ്ടായിരുന്നു. എസ്റ്റേറ്റിന്റെ വിവിധ ഭാഗങ്ങളിൽ അന്ന് മേയാൻ വിട്ട പശുക്കൾ സന്ധ്യയായിട്ടും തിരിച്ചെത്തിയില്ല. വ്യാഴാഴ്ച രാവിലെ ജോലിക്കെത്തിയ തോട്ടം തൊഴിലാളികളാണ് ഇവയെ ചത്തനിലയിൽ കണ്ടെത്തിയത്.

മിന്നലേറ്റതാണ് മരണകാരണമെന്ന പ്രാഥമിക വിവരമാണ് അധികൃതർ നൽകുന്നത്. പശുക്കൾ ചത്തുകിടന്നതിന് സമീപത്തെ റബർ മരത്തിന്റെ ചുവട്ടിലെ മണ്ണ് ഇളകിത്തെറിച്ച നിലയിലായിരുന്നു. ജില്ലാ വെറ്ററിനറി ഡോക്ടർ ഉൾപ്പെടെയുള്ളവർ സ്ഥലത്തെത്തി പോസ്റ്റുമോർട്ടം നടത്തി. തുടർന്ന് എസ്റ്റേറ്റിൽ യന്ത്രസഹായത്തോടെ കുഴിയെടുത്ത് പശുക്കളെ സംസ്കരിച്ചു.

അതേസമയം, എസ്റ്റേറ്റിൽ വിവിധയിടങ്ങളിൽ കൈതക്കൃഷി സജീവമാണ്. കൃഷിയിടങ്ങളിൽ ഉപയോഗിക്കുന്ന വളം മഴവെള്ളത്തിലൂടെ സമീപ പ്രദേശങ്ങളിലേക്കും നീർച്ചാലുകളിലേക്കും ഒഴുകിയെത്താൻ സാധ്യതയുണ്ടെന്നും ഇത് പശുക്കളുടെ മരണത്തിന് കാരണമായിട്ടുണ്ടോയെന്ന് പരിശോധിക്കണമെന്നുമാണ് ആവശ്യം. എന്നാൽ, വളം മൂലമാണ് പശുക്കൾ ചത്തതെന്നതിന് നിലവിൽ സ്ഥിരീകരണമില്ല.

ചെറുവള്ളിക്കുള്ളൻ

‘ചെറുവള്ളിക്കുള്ളൻ’ എന്ന വിളിപ്പേരിൽ അറിയപ്പെടുന്ന നാടൻ പശുക്കൾ പാൽ ഉൽപാദനത്തിൽ കുറവാണെങ്കിലും ഔഷധഗുണമുള്ള പാലിന് പേരുകേട്ടവയാണെന്നാണ് കരുതപ്പെടുന്നത്. ഇവയുടെ പാൽ, ചാണകം, കിടാക്കൾ എന്നിവയുടെ വിൽപനയാണ് എസ്റ്റേറ്റിലെ തൊഴിലാളികളുടെ പ്രധാന വരുമാനമാർഗങ്ങളിലൊന്ന്. പശുക്കളുടെ കൂട്ടമരണം തൊഴിലാളികൾക്ക് വലിയ സാമ്പത്തിക നഷ്ടമാണ് ഉണ്ടാക്കിയിരിക്കുന്നത്.

English Summary : English Summary : A tragic incident occurred at the Cheruvally Estate in Erumely, where 12 indigenous cattle—popularly known as the ‘Cheruvally Dwarf’ breed—were found dead following heavy rain and lightning on Wednesday evening.