നിങ്ങൾ യുഎഇയിൽ കറങ്ങാൻ ആഗ്രഹിക്കുന്നുണ്ടോ? ഇതാ പുതിയ പാക്കേജ്, 11 ദിവസത്തെ യാത്ര

യുഎഇയിലെ പ്രധാന കാഴ്ച്ചകൾ കാണാൻ ഒരു പുതിയ അവസരം വന്നിരിക്കുന്നു. യുഎഇയിലെ ഏഴ് എമിറേറ്റുകളും ഒരൊറ്റ യാത്രയിൽ സന്ദർശിക്കാൻ അവസരമൊരുക്കിയിരിക്കുകയാണ് ദേശീയ ടൂറിസം പദ്ധതി. ഈ യാത്ര 11 ദിവസവും 10 രാത്രിയും നീളുന്ന യാത്രാ പാക്കേജുകൾ ആണ്. യാത്രയ്ക്കായി ഓൺലൈനായി ബുക്ക് ചെയ്യാം. UAEGrandTour.com എന്ന പുതിയ ദേശീയ ടൂറിസം പ്ലാറ്റ്‌ഫോമിലൂടെയാണ് ബുക്കിങ് സൗകര്യം ഒരുക്കിയിരിക്കുന്നത്.
ഇനി ഒരാൾക്ക് എത്ര രൂപയാണെന്നല്ലേ, 10,446 ദിർഹം മുതലാണ് പാക്കേജ് നിരക്ക്. ഇതിൽ തന്നെ ഹോട്ടൽ താമസം, യാത്രാ സൗകര്യം, വിനോദസഞ്ചാര കേന്ദ്രങ്ങളിലെ സന്ദർശനം, ഭക്ഷണം തുടങ്ങി യാത്രയുടെ പ്രധാനപ്പെട്ട എല്ലാ ഘടകങ്ങളും ഉൾപ്പെടുത്തിയിട്ടുണ്ട്.

പദ്ധതിയുടെ ലക്ഷ്യം യുഎഇയിൽ കൂടുതൽ ദിവസം

കൂടുതൽ ദിവസം യുഎഇയിൽ തങ്ങാൻ യാത്രക്കാരെ പ്രോത്സാഹിപ്പിക്കുകയാണ് പദ്ധതിയുടെ പ്രധാന ലക്ഷ്യമെന്നാണ് യുഎഇ സാമ്പത്തിക-ടൂറിസം മന്ത്രി അബ്‌ദുല്ല ബിൻ തൗഖ് അൽ മർറി (Minister Abdulla bin Touq Al Marri) പറയുന്നത്. രാജ്യത്തെ കൂടുതൽ പ്രദേശങ്ങൾ സന്ദർശിക്കാൻ ഈ യാത്ര ഏറെ പ്രയോജനപ്പെടുമെന്നും അദ്ദേഹം പറയുന്നു. ഈ യാത്രയിലൂടെ യുഎഇയുടെ ഭംഗി അനുഭവിക്കാൻ ആളുകളെ പ്രേരിപ്പിക്കുകയാണ് പദ്ധതിയിലൂടെ ലക്ഷ്യമിടുന്നതെന്നും അദ്ദേഹം വ്യക്തമാക്കി.

വിവിധ തരത്തിലുള്ള 5 പാക്കേജുകൾ

വിവിധതരത്തിലുള്ള അഞ്ചോളം പാക്കേജുകൾ നിലവിൽ ലഭ്യമാണ്.
ഗ്രാൻഡ് ക്ലാസിക്, ഗ്രാൻഡ് അഡ്വഞ്ചർ, ഗ്രാൻഡ് ബീച്ചസ്, ഗ്രാൻഡ് ഇക്കോ ഫ്രണ്ട്‌ലി, ഗ്രാൻഡ് ഫാമിലി എന്നിങ്ങനെയണവ. വിവിധ തരത്തിലുള്ള ഈ പാക്കേജുകളാണ് നിലവിൽ പ്ലാറ്റ്‌ഫോമിൽ ലഭ്യമാക്കിയിരിക്കുന്നത്. ഏഴ് എമിറേറ്റുകളിലും 10 രാത്രികൾ താമസിച്ച് പ്രധാന വിനോദസഞ്ചാര കേന്ദ്രങ്ങൾ സന്ദർശിക്കാവുന്ന രീതിയിലാണ് യാത്രാപദ്ധതി. ഇതിൽ ഗ്രാൻഡ് ക്ലാസിക് പാക്കേജിന് 11 ദിവസവും 10 രാത്രിയും ദൈർഘ്യമുണ്ട്. ഒരാൾക്ക് 10,446 ദിർഹം മുതലാണ് നിരക്ക്. രണ്ട് മുതിർന്നവർക്ക് 20,891 ദിർഹം മുതലാണ് പാക്കേജ് നിരക്ക്.

തിരഞ്ഞെടുത്ത ഫോർ സ്റ്റാർ, ഫൈവ് സ്റ്റാർ ഹോട്ടലുകളിലെ 10 രാത്രി താമസം, ദിവസേനയുള്ള പ്രഭാതഭക്ഷണം, യാത്രാപദ്ധതിയിൽ ഉൾപ്പെടുത്തിയിട്ടുള്ള മറ്റ് ഭക്ഷണങ്ങൾ എന്നിവ പാക്കേജിന്റെ ഭാഗമാണ്. എയർ കണ്ടീഷൻ ചെയ്‌ത സ്വകാര്യ വാഹനവും ഇംഗ്ലീഷ് സംസാരിക്കുന്ന ഡ്രൈവർ-ഗൈഡും യാത്രക്കാർക്ക് ലഭിക്കും.

യാത്രയിൽ ഉൾപ്പെടുത്തിയ വിനോദ സഞ്ചാര കേന്ദ്രങ്ങൾ

ദുബൈ ക്രീക്കിലൂടെയുള്ള പരമ്പരാഗത അബ്ര ബോട്ട് യാത്ര, മരുഭൂമി സഫാരി എന്നിവയാണ് പാക്കേജിലെ പ്രധാന സ്ഥലങ്ങൾ. അതേസമയം പ്രധാന വിനോദസഞ്ചാര കേന്ദ്രങ്ങളിലേക്കുള്ള സന്ദർശനങ്ങളും പ്രവേശന ഫീസും പാക്കേജിൽ ഉൾപ്പെടും.
മാത്രമല്ല മരുഭൂമി സഫാരിയിൽ ഡ്യൂൺ ബാഷിങ്, ഒട്ടക സവാരി, ബാർബിക്യൂ ഡിന്നർ തുടങ്ങിയ അനുഭവങ്ങളും ലഭിക്കും. യാത്രയ്ക്കിടെയുള്ള കുപ്പിവെള്ളവും പ്രാദേശിക നികുതികളും പാക്കേജിൽ ഉൾപ്പെടുത്തിയിട്ടുണ്ട്.

എന്നാൽ അന്താരാഷ്ട്ര വിമാന ടിക്കറ്റുകൾ, ആവശ്യമായ സാഹചര്യങ്ങളിലെ യുഎഇ വിസ ഫീസ്, യാത്രാ ഇൻഷുറൻസ്, ടൂറിസം ദിർഹം ഫീസ്, വ്യക്തിഗത ചെലവുകൾ, ടിപ്പുകൾ എന്നിവ പാക്കേജിൽ ഉൾപ്പെടില്ല.

അതേസമയം ദുബൈ അന്താരാഷ്ട്ര വിമാനത്താവളത്തിൽ നിന്ന് ആരംഭിച്ച് അവിടെത്തന്നെയാണ് ഈ 11 ദിവസത്തെ യാത്ര അവസാനിക്കുക. പാക്കേജ് ബുക്ക് ചെയ്യാൻ കുറഞ്ഞത് രണ്ട് മുതിർന്നവർ ഉണ്ടായിരിക്കണം. യാത്രക്കാരുടെ പാസ്‌പോർട്ടിന് കുറഞ്ഞത് ആറ് മാസത്തെ കാലാവധിയും ആവശ്യമാണ്.
സമീപകാല പ്രതിസന്ധികൾ മൂലമുണ്ടായ തടസങ്ങൾക്ക് ശേഷം യുഎഇയിലെ ടൂറിസം മേഖല വീണ്ടും സജീവമാകുന്നതിനിടെയാണ് രാജ്യത്തെ ഏഴ് എമിറേറ്റുകളെയും ഒരൊറ്റ യാത്രയിൽ ബന്ധിപ്പിക്കുന്ന പുതിയ ടൂറിസം പദ്ധതി അവതരിപ്പിച്ചിരിക്കുന്നത്.

English Summary : The UAE Ministry of Economy and Tourism, led by Minister Abdulla bin Touq Al Marri, has unveiled a new national tourism initiative—the UAE Grand Tour. Designed to encourage longer visitor stays and showcase all seven emirates in a single trip, this 11-day, 10-night itinerary covers Dubai, Abu Dhabi, Sharjah, Ajman, Umm Al Quwain, Ras Al Khaimah, and Fujairah.